Zabuli 145 - Bibilia Ilagano Lya Kale 2015

Ū SEEBA alī wa shigongo na wawiza

Lyīmbo lya ng'wa Daūdi, lya kūkumīlīja.

¹ Nakūkūgongoola Mulungu, bebe ūyo ūlī Ntemi wane, Ī lina lyako nakūlīkumīlīja welelo bose.

² Būlī lūshikū nakūkūkumīlīja, nakūlīgongoola ī lina lyako welelo na welelo.

³ Ū SEEBA alī ntaale, igeleelilwe kūkumīlījiwa no no no; atīho wa kūwitegeleja ū būtaale wakwe.

⁴ Banhū ba shibyalīlwe na shibyalīlwe bakwīkumūcha ī milīmo yako, bakūshikumūcha ī shītwa shako nguno shilī shitaale.

⁵ A banhū bakūbūkumūcha ū wiza w'ikūjo lya būdūla wako, nane nakūshiideedeng'hanya ī shītīle shako Ī sha kūkaamaja.

⁶ Bakūbūkumūcha ū būdūla wa shītīle shako sha kogohya; nane nakūbūsomboola ū būtaale wako.

⁷ Bakūlūhaya ūmo lūlī ū lūkumo lwa wiza wako nguno būlī būtaale, nū būtūngīlīja wako bakūbūgongoola mu mīmbo.

⁸ Ū SEEBA alī wa shigongo, na nsaatwa wa banhū, ndīzu kūpelana, na ookalile būtogwa.

⁹ Ū SEEBA alī wawiza kū banhū bose, na abasaatilwe a bose, nguno hū wei ū meeja wabo.

¹⁰ Ee SEEBA, ī mīlīmo yako yose īkūkūkumīlīja, na a beela bako bakūkūgongoola.

¹¹ Bakūlīhaya ī likūjo lya būtemi wako, nū būdūla wako bakūbūkumūcha,

¹² Ī shītīle shako sha būdūla shimanīke kū banhū bose, nū wiza w'ikūjo lya būtemi wako.

¹³ Ū būtemi wako būlī bo welelo na welelo, nū būsugi wako būlī bo kūshinga ho shibyalīlwe shose na shose. Ū SEEBA alī nsanyiwa ū mu wisagīja bokwe bose, na abatogilwe a bose, nguno hū wei ū meeja wabo.

¹⁴ Ū SEEBA akababūūchaga pye abo bakagwaga, na akabagūngūmūlaga pye abo bagung'humile.

¹⁵ A miso ga shiseeng'wa shose galolile kūlī bebe, nang'ho ūkashinhaga shilīwa shasho mu makanza ayo gigeleelilwe.

¹⁶ Ū nkono gwako ūlū wagūkundūla būlī shiseeng'wa shipanga shapandīka ūmo shitogelilwe.

¹⁷ Ū SEEBA ntūngīlīja mu nzīla jose, na alī na shigongo mu yose īyo akīītaga.

¹⁸ Ū Seeba alī hihī nabo pye abo bakang'witanaga, bose pye abo bakang'witanaga mu ng'hana.

¹⁹ Abo bang'ogohile akabashikīlīgījaga Ī ng'hūmbū jabo, akakwigwaga ū kūlīla kwabo ūbapīja.

²⁰ Ū Seeba ababaladile pye abo bantogilwe, alīyo a babūbi akabayagaja pye a bose.

²¹ Ū nomo gwane gūkūlūngalūnga ya kūnkumīlīja SEEBA, nīyo pyī ī shose īsho shilī na būpanga leka shilīkumīlīje ī lina lyakwe lyeela welelo na welelo.