Zabuli 144 - Bibilia Ilagano Lya Kale 2015

Kūnūmba SEEBA na kūlombela ihanga

Zabuli ya ng'wa Daūdi.

¹ Akumīlījiwe ū SEEA, ūyo alī shiganga shane, na akagalangaga a makono gane kalwīīle mu būlūgu; nī nzwala jane akajoolekejaga ī ya kwīta ū mu būlūgū.

² Ū we alī ntogwa wane no no no, hangī hū ng'wene ūyo alī Shiganga shane; Ipīlīlo lyane na Nkomooji wane, Lūmūda lwane ūyo mulī we nakapīlīlaga, hū ng'wene akatūūlaga banhū ha sīlīlī ya būsugi wakwe.

³ Ee SEEBA, ū munhū nang'hwe alī shikolo kī, nose ūndīlīle? Ū ng'wana wa munhū alī kī, ūng'wizūkwe?

⁴ Ū munhū atikīlile na myūyī dūhū, Ī shikū ja būlamu wakwe jilī ja kūbīta wangū gītī nengeeji.

⁵ Ee SEEBA, līdeemhyage ī ligūlū lyako, wike; jikuumyage ī ngūlū jizuuke lyochi.

⁶ Tūmaga ndabi jako ūbasambaaje a banishi bako, balasage na masonga gako ūbapyene.

⁷ Gūgoloolage ū nkono gwako kūfuma kwigūlya, nikomoolage ūnipīje kūfuma mu minzī mingī, kūfuma mu nkono gwa banhū abo natabamanile,

⁸ abo milomo yabo yokalile būlomolomo, nū nkono gwabo gwa būlyo gūtī na būng'hana.

⁹ Ee Mulungu, nakūkwīmbīla lyīmbo ipya, nakūkwīmbīla kūnū nakūtūlaga ndono.

¹⁰ Ū bebe ūyo ūkabinhaga būpyeni batemi, ūyo ūkampīja Daūdi ntūmami wako kūfuma mu nhabaala ya līlūshū.

¹¹ Nikomoolage ūnipīje kūfuma mu nkono gwa banhū abo natabamanile, abo milomo yabo yokalile būlomolomo, nū nkono gwabo gwa būlyo gūtī na būng'hana.

¹² A bitūnja bise ū ng'wikanza lya walūki wabo babize gītī mitī īkūfulumaga chiza; a bashīke bise nabo babize gītī ng'hīngī jibeegelejiwe chiza, kūlwa būlenji mu numba y'ikūlū.

¹³ A maluuli gise gokale pa, tūbize na shiigunanhīlo sha būlī mbika, ī ng'holo jise najo jiibyalane, jibize madaale mataale ga mashihumbī mingī ū kū madīīmīlo gise.

¹⁴ Ī ng'ombe jise jikūle, jibize na nguzu, na tūtizūdumīlwa nūūlū kūtwalwa mu būding'wa; nū mu mizengo yise shitizilonga shose shose sha kwenheleja būpīna.

¹⁵ Balī na lubango a banhū abo bakwīlūkīlwa Ī yenīyī, balī na lubango a banhū abo SEEBA alī Mulungu wabo.