Zabuli 14 - Bibilia Ilagano Lya Kale 2015

Maganiko ga mbūūlī

Kūlwa ntongeeji wa bīmbi. Zabuli ya ng'wa Daūdi.

¹ Ū mbūūlī akahayaga ū mu ng'holò yakwe gīkī, “Atīho ū Mulungu.” Bahūbīkile, ī shītīle shabo shilī sha malofu; atīho ūyo akīītaga yawiza.

² Ū kūfuma ū ng'wigūlū, ū SEEBA akabalolaga a banhū, abone ūlū balīho bitegeleja bose bose; ūlū balīho abo bakankoobaga Mulungu.

³ Pye batalile, a bose bakenaagūkile, atīho ūyo akīītaga yawiza, ndūhū nūūlū ūmò!

⁴ Angū, pye abo bakīītaga yabūbi batamanile? Bakabalyaga a banhū bane gītī kūlya migatī, nī lina lya ng'wa SEEBA balemile ū kūlīhaya!

⁵ A benabo bakūgwīlwa ya kūbadetemya, nguno ū Mulungu alī hamò nī shibyalīlwe sha batūngīlīja.

⁶ A bing'we mukabakenaagūjaga a bahabī Īyo bakīhelaga, alīyo ū SEEBA alī būpīlīlo wabo.

⁷ Gīt'ūlū ni wilonga kūfuma Sayuni ū būpīji wa Baisilaeli! Ū SEEBA ūlū ūbashokeja a banhū bakwe, ū Yakobo akūyega, ū Isilaeli akūlūmba no.