Zabuli 136 - Bibilia Ilagano Lya Kale 2015

Būtogwa bo ng'wa SEEBA būtashilaga

¹ Nūmbagi SEEBA, nguno alī wawiza, ī Kīgongo chakwe shilī sha welelo na welelo.

² Nūmbagi ū Mulungu wa bamulungu bose, ī Kīgongo chakwe shilī sha welelo na welelo.

³ Numbagi ū SEEBA wa baseeba bose, ī Kīgongo chakwe shilī sha welelo na welelo;

⁴ ūyo we wike akīītaga ya kūkumya mitaale, ī Kīgongo chakwe shilī sha welelo na welelo;

⁵ ūyo kūlwa būmani bokwe akabeeja igūlū, ī Kīgongo chakwe shilī sha welelo na welelo;

⁶ ūyo akītūūla ī sī higūlya ya minzī, ī Kīgongo chakwe shilī sha welelo na welelo;

⁷ ūtūūla ho shikolo sha kwenha isana, ī Kīgongo chakwe shilī sha welelo na welelo;

⁸ Ī līīmi līsuge kwandīja dilū kūshisha mhīndī, ī Kīgongo chakwe shilī sha welelo na welelo;

⁹ ū ng'weji nī sonda shisuge būjikū, ī Kīgongo chakwe shilī sha welelo na welelo.

¹⁰ Hū ng'wene ūyo akababūlaga babyalwa ba kwandya mu Misili, ī Kīgongo chakwe shilī sha welelo na welelo.

¹¹ A Baisilaeli ūbafunya ū mu sī yabo, ī Kīgongo chakwe shilī sha welelo na welelo.

¹² Akabafunya mo na nkono gwa būdūla, ī Kīgongo chakwe shilī sha welelo na welelo.

¹³ Ū wei ūyo akīlekanya ha bīlī ī Nyanza Yaza, ī Kīgongo chakwe shilī sha welelo na welelo;

¹⁴ a Baisilaeli ūbabītīja henaho būūkīla, ī Kīgongo chakwe shilī sha welelo na welelo.

¹⁵ Ū Falao na a bashilikale bakwe ūmpyagūlīla mu Nyanza Yaza, ī Kīgongo chakwe shilī sha welelo na welelo.

¹⁶ Hū wei wabatongeelaga a banhū bakwe aho balī ngw'itogolo, ī Kīgongo chakwe shilī sha welelo na welelo.

¹⁷ Na batemi bataale hū ng'wene akabatūla, ī Kīgongo chakwe shilī sha welelo na welelo.

¹⁸ Batemi ba ngunzu ūbabūlaga, ī Kīgongo chakwe shilī sha welelo na welelo;

¹⁹ Sihoni ntemi wa Baamoli, ī Kīgongo chakwe shilī sha welelo na welelo;

²⁰ nū Ogu, ntemi wa Bashani, ī Kīgongo chakwe shilī sha welelo na welelo,

²¹ Ī sī yabo wīfunya kūbiza wingīji, ī Kīgongo chakwe shilī sha welelo na welelo;

²² wingīji kūlī ntūmami wakwe Isilaeli, ī Kīgongo chakwe shilī sha welelo na welelo.

²³ Ū wei akatwizūkagwa mu būgokolo wise, ī Kīgongo chakwe shilī sha welelo na welelo,

²⁴ akatūpījaga kwīnga mu banishi bise, ī Kīgongo chakwe shilī sha welelo na welelo.

²⁵ Nīyo hū ng'wene akashinhaga shilīwa pyī ī shiseeng'wa, ī Kīgongo chakwe shilī sha welelo na welelo.

²⁶ Nūmbagi ū Mulungu wa ng'wigūlū, ī Kīgongo chakwe shilī sha welelo na welelo.