Zabuli 123 - Bibilia Ilagano Lya Kale 2015

Kūlomba kūchīlwa shigongo

Lyīmbo ng'wikanza lya kūlamya.

¹ A miso gane nakūgabūūcha kūlola kūlī bebe, bebe ūyo isumbī lyako lya būtemi līlī ng'wigūlū.

² Ūmo miso ga batūmami gakagūlolelaga nkono go ng'wa saabo būgonzo, nū mumo miso ga ntūmami nkīma gakagūlolelaga nkono go ng'wa nina būgonzo, h'ūmo na a miso gise ganolelile ū SEEBA Mulungu wise, kūshisha atūchīle shigongo.

³ Tūchīlage shigongo, Ee SEEBA, tūchīlage shigongo; nguno watwigelile lūūlū ū būsondagūlwa ūbo būkūtūgwīlaga.

⁴ Jakwīlaga no ī shikū ū būpanga wise būlī mu kwiyūmīlīja, kūlwa būsondagūlwa kūfuma kū badooshi; na būdalahwa kūfuma kū bikumīlīja.