Zabuli 116 - Bibilia Ilagano Lya Kale 2015

Kūlūmba kūlwa kūpījiwa mu kūcha

¹ Nantogilwe ū SEEBA, nguno akaliigwa ī lilaka lyane, nū kwikūmbīlīja kwane.

² Īkī akanigalūkīja ū gūtū gwakwe kūnidegeleka, nakūng'witana shikū jose ja būlamu wane.

³ Ī ngoye ja lūfu jalī jiniitaligīngije, ī lidetemya lya kūlimu lyūnikiimaalīla, nūyikala nakūlījiagwa būpīna.

⁴ Nose nūng'witana ū SEEBA mu lina lyakwe, “Ee SEEBA, nalīkwikūmbīlīja, nipījage ū būpanga wane.”

⁵ Ū SEEBA alī na shigongo hangī ntūngīlīja, ū Mulungu wise alī nsaatwa wa banhū.

⁶ Ū SEEBA akabalang'hanaga a badalahījiwa, aho naalī mu būluhi būtaale akanipīja.

⁷ Ee būpanga wane, shokaga mu kwifula kwako, nguno ū SEEBA wakwītīlile mihayo misoga no.

⁸ Nguno Ee SEEBA, ū būpanga wane ūkabūpīja kwīnga mu kūcha, a miso gane ūgapyagūla ī shisoji, nī mhambala jane ūjilang'hana natizūgwa;

⁹ nadūle kūshimīza kū būtongi bo ng'wa SEEBA mu sī ya bapanga.

¹⁰ Nakazunya, h'ī nguno yene nakayomba gīkī, “Ū nene nalī mu makoye no.”

¹¹ Hama kūlwa kūzwangana kwanwe nose nūhaya gīkī, “A banhū balomolomo pye a bose.”

¹² Nakūnīpa kī ū SEEBA kūlwa wiza bokwe bose ū kūlī nene?

¹³ Nakūshanukūla ī shikombe sha būpīji, hama nakūlīkumīlīja ī lina lya ng'wa SEEBA.

¹⁴ Ū kūlahīla kwane nakūnshiīkīlīgīja ū SEEBA, mu būtongi wa banhū bakwe bose.

¹⁵ Ū kūcha kwa beela bakwe ū SEEBA kūlī kwa mpango ntaale no ū kūlī we.

¹⁶ Ee SEEBA, ū nene nalī ntūmami wako, ntūmami wako, ng'wana wa nsese wako nkīma; hū bebe wanitungūlile ū mu būtungwa wane.

¹⁷ Nakūkūfunīja shitambò sha kūlūmba, hama nakūlīkumīlīja ī lina lyako.

¹⁸ Ū kūlahīla kwane nakūnshiīkīlīgīja ū SEEBA, mu būtongi wa banhū bakwe bose,

¹⁹ mu gwalugwa ja numba ya ng'wa SEEBA, mu gatī yako bebe, Ee Yelūsalemu. Nkumīlījagi SEEBA.