Zabuli 115 - Bibilia Ilagano Lya Kale 2015

Mulungu iyene h'ūyo shiigelile akūjiwe

¹ Ee SEEBA, ītī kūlwa nguno yise, yaya ītī kūlwa nguno yise; alīyo ī likūjo lībize ho nguno ya lina lyako; kūlwa nguno ya būtogwa wako na būsanyiwa wako.

² Nibūlī a mahanga gahaye gīkī, “Ū Mulungu wabo alī halī?”

³ Ū Mulungu wise alī ng'wigūlū, akīītaga yose īyo yūnyeja.

⁴ Alīyo a bamulungu babo, jilī feza na zahabu, bakabeejiagwa na makono ga banhū.

⁵ Ī milomo balī nayo, alīyo batalūngalūngaga, na a miso balī nago, alīyo batabonaga;

⁶ a matū balī nago, alīyo batigwaga; Ī nindo balī najo, alīyo batanung'hīlagwa.

⁷ Balī na makono, alīyo gatī na nīmo, Ī mhambala balī najo, aliyo batashimīzaga. Batafunyaga nūūlū ilaka bo mamilo gabo.

⁸ Abo bakababeejaga a bamulungu benabo batikīlile nabo, pye na a bose abo babasanije.

⁹ Ee bing'we Baisilaeli, nsanyagi SEEBA; ū wei alī ngunanhi na lūmūda lwing'we.

¹⁰ Ee bing'we numba ya ng'wa Alooni, nsanyagi SEEBA; ū wei alī ngunanhi na lūmūda lwing'we.

¹¹ Ee bing'we abo mung'ogohile SEEBA, nsanyagi we; ū wei alī ngunanhi na lūmūda lwing'we.

¹² Ū SEEBA ataalī atwizūkilwe, akwīyīlūkīla ī numba ya Isilaeli, akwīyinha ī kaya ya ng'wa Alooni;

¹³ akūbinha abo bang'ogohile SEEBA; a bose bado na bataale.

¹⁴ Ū SEEBA ni ongejage kūmukwīja, a bing'we hamò na baana bing'we.

¹⁵ Ū SEEBA ang'wīlūkīle mbango, ū wei ūyo alī Meeja w'igūlū na sī.

¹⁶ Ī ligūlū līlī sabo ya ng'wa SEEBA, na a mapandī ga ng'wigūlū a gose; alīyo ī sī yene abinhile banhū.

¹⁷ A bafu batīko kūnkūja ū SEEBA, bose abo bakwikaga kwipandī lya būhuumūzu.

¹⁸ Alīyo a bise tūkūnkumīlīja ū SEEBA, kwandīja haha na kūshisha welelo bose.