Zabuli 110 - Bibilia Ilagano Lya Kale 2015

Ū SEEBA akang'winhaga būtindi ū ntemi

Zabuli ya ng'wa Daūdi.

¹ Ū SEEBA akang'wīla ū Seeba wane, “Igashaga kū nkono gwane gwa būlyo; kūshisha nabīīte a banishi bako kūbiza būtūūlīlo bo mhambala jako.”

² Ū būdūla wa nang'ha gwako gwa būsugi, ū SEEBA akūwīta būje hose pye kūfuma Sayuni. Ūkūbasuga a banishi bako.

³ Ū mu lūshikū lwako lwa kūtongeela mabità gako mu wela w'ikūjo, a banhū bako bakwifunya mu wiyaabī wabo boi benekīlī. Kūfuma wandījo w'ikīngo, ū būdinha wako būkūkūshokela gītī lūme lwa dilū.

⁴ Ū SEEBA wamala kūlahīla, atīko kūgalūcha a maganiko gakwe, “Ū bebe ūlī Ngabīji wa welelo bose, mu mbika ya būgabīji bo ng'wa Melikizedeki.”

⁵ Ū SEEBA alī kū nkono gwako gwa būlyo, ū mu lūshikū lwa būpelanu wakwe akūtobagūla batemi.

⁶ Akūlamula mahanga aleke matūūgo ga mibimba būlī kwene, na kūbatobagūla a basugi ba sī jose.

⁷ Akūng'wa minzī mu mongo bbihī na nzīla, hūna akūgūngūmūla ntwe gwakwe higūlya.