Zabuli 109 - Bibilia Ilagano Lya Kale 2015

Kūlomba banishi bamalīlwe shiilī

Kūlwa ntongeeji wa bīmbi. Zabuli ya ng'wa Daūdi.

¹ Ee Mulungu, bebe ūyo nakakūkumīlījaga, ūtahuumūlage.

² Nguno banhū babūbi na balomolomo bakwikalaga būnasamīla milomo yabo; ī ndīmi jabo jikūnilembekejaga.

³ Banipīndije hose hose kūnū bakūniponangījaga mihayo mu kūnikolwa, bakūnūūbūkīlaga nū mhayo ndūhū.

⁴ Ūlū nabīītīla ya būtogwa hū banihaya kībi, alīyo ū nene nalī munhū wa kwikala mu kūlomba.

⁵ Bakūnilīpaga mibi ū kū misoga īyo nakwītaga, ūlū noolecha būtogwa a boi banikolwa.

⁶ Bakwiwīlaga, “Nsolelagi munhū wabūbi wa kwilwisha nang'hwe, mūūji wa kūng'wīmīīla kū nkono gwakwe gwa būlyo.

⁷ Ūlū wīmīīla ng'wibanza abonwe alī mu būhūbi, nī mihayo ya kūlomba kwakwe ībalwe kūbiza shibi.

⁸ Ī shikū ja būlamu wakwe jigehiwe, ū nīmo gwakwe gwa būtongeeji gūding'we na ūngī.

⁹ A baana bakwe bagayiwe ū saabo, nū nke wakwe abize nchīlwa.

¹⁰ Hama a baana bakwe babize biyūngi ba kwikala bakwilombelejaga, nīyo bapeejiwe nū mu mapagale gabo ayo bakwikalaga, bīnge mo.

¹¹ Ntondi w'igasa ashisole pyī ī shikolo shakwe īsho alī nasho; balobeji bagalye a matwajo ga milīmo ya lūyīlo lwakwe.

¹² Nīyo atizilonga munhū wa kūnchīla shigongo, nūūlū wa kūbasaatwa a baana bakwe abo baachīlwa saabo.

¹³ Ū būbyīle wakwe būmalwe pye, būjimīīle; Ī lina lyakwe lījimiwe ū mu shibyalilwe īsho shilalondeele ha numa.

¹⁴ Ū būhūbi wa bakūlūgenji bakwe wizūkīlwe ū mu būtongi bo ng'wa SEEBA, nī shibi sha ng'wa nina shitizūjimangūchiwa.

¹⁵ Shose shenīshi shibize mu būtongi bo ng'wa SEEBA ilalī, shijimīīlīke shose shose sha kūbīīta banhū bang'wizūkwe.

¹⁶ Nguno walī atizūkagwa kūchīla shigongo, alīyo a bahabī na a bagayiwa na a babo batī na sha kwisagīlwa, wabakūūbīlījaga kūshisha kūcha kwabo.

¹⁷ Walī atogilwe kūzuma bangī, leka agwīlwe izumo nang'hwe; walī atatogilwe kūlombela mbango, ni atizagūpandīka nū wei.

¹⁸ Īkī ī lizumo walīzwalaga gītī shizwalo, nīyo lyalī lyang'wingīla ū mu mīlī gītī minzī, kūshisha lyūmīta nū mu maguha gītī maguta,

¹⁹ hūna lūūlū ī haha leka lībize gītī kache mbeho yakwe ya kwigumīīla, gītī nkoba gwakwe gwa kwitunga mu nkīmbīlī.”

²⁰ Ī yenīyī leka ībize shilīpīlo sha ng'wa SEEBA ū kū babūūji bane, abo bakūnisondagūlaga.

²¹ Alīyo ū bebe, Ee Seeba MULUNGU, kūlwa lina lyako nīītīlage yawiza; nipījage īkī ū būtogwa wako būlī wawiza.

²² Ū nene nalī ng'habī na ngayiwa, ū mu gatī nalabūkile ī ng'holò yane.

²³ Nalīshila wangū gītī nengeeji mu makanza ga līīmi līkūsalalījaga, nakūselengetiagwa sagala sagala gītī njige.

²⁴ A mazwi gane gaamalile ī nguzu kūlwa kūdīīla nzala, nū mīlī gwane gūlī maguha gike ī haha.

²⁵ Ū kū babūūji bane nalī shikolo sha kwineenelegejiwa, ūlū banibona bakūshingishaga mitwe.

²⁶ Ee SEEBA Mulungu wane, nigunage, nipījage kūlenganīla na būtogwa wako.

²⁷ Boolekejage badeebe gīkī ū gwenūyū gūlī nkono gwako, hū bebe SEEBA wagwītile ū gwenūyū.

²⁸ A boi bene ni bazumage, alīyo ū bebe ūkwenha mbango; balīnūūbūkīla alīyo bakūgooka, ū ntūmami wako ni ayegage.

²⁹ A babūūji bane bakūzwīkwa minala, bakūkundīkījiwa magooke gītī ng'wenda.

³⁰ Ū nene nakūnkumīlīja ū SEEBA na nomo gwane, nakūngongoola ha gatī y'ibità.

³¹ Nguno akīmīīlaga hīgīyī kū nkono gwa būlyo gwa ngayiwa, anwīlīīle na kūmpīja kūfuma kū babūūji bakwe.