Zabuli 106 - Bibilia Ilagano Lya Kale 2015

Wiza bo ng'wa SEEBA kū banhū bakwe

¹ Nkumīlījagi SEEBA, ū SEEBA nūmbagi, nguno alī wawiza no, būtogwa wakwe būlī wa kūshinga ho welelo bose.

² Nani ūyo adūgije kūshikumūcha ī shītīle sha būdūla sha ng'wa SEEBA, nūūlū kūlyolecha ī likūjo lyakwe ī lyose?

³ Balī na lubango abo badimanile na būtūngīlīja, abo bakashimīzīlaga mu nzīla jigoloololile būlī makanza.

⁴ Ee SEEBA, nizūkagwe ū mu yawiza Īyo ūkūbīītīlaga banhū bako; ū ng'wikanza lya kūbapīja nigunage nū nene,

⁵ nane najilūmbe ī ja basolwa bako, nabize mo nane ū mu būyegi w'ihanga lyako, nane nakumīlīje hamò nabo a banhū ba wingīji wako.

⁶ Bose pyī tūlī bahūbi gīt'ūmo baalī a bakūlūgenji bise, tūlī bakenaagūji na bīīti ba mihayo yabūbi.

⁷ A bakūlūgenji bise aho baalī mu Misili, batashidīlīlile ī shītwa shako sha kūkumya; batawizūkilwe ū būtaale wa shigongo shako, aho balī kū Nyanza Yaza bakangomela.

⁸ Alīyo nahene akabapīja kūlwa nguno ya lina lyakwe, abooleeche ū būdūla wakwe.

⁹ Akīhama ī Nyanza Yaza; yūūkama, ūbabītya mu būjiba gītī balī mu sī ya nhogolo.

¹⁰ Ūbiza wabapīja mu nkono gwa banhū abo baalī babakolilwe, ūbīnja mu nguzu ja banishi babo.

¹¹ A minzī gūbakundīkīja a banishi babo, būshila pye, atapīlile nūūlū ūmò wabo.

¹² Hūna bīsanya ī mihayo yakwe, bīmba mīmbo ga kūngongoola we.

¹³ Alīyo lītabītile ikanza būyība Īyo walī wīyīta, būduuma ū kūbūlindīīla ū būganikīji wakwe.

¹⁴ Aho balī ng'witogolo būjananījiwa na kwikumvwa kwabo, ng'witogolo ng'wenūmo būngema ū Mulungu.

¹⁵ Ng'hana ūbinha īsho bakigongela, alīyo ūbatūmīla būsaatu wa kūbayagaja.

¹⁶ Aho balī mu ng'hambī būng'wītīla wilu ū Musa nū Alooni, ū ng'wela o ng'wa SEEBA.

¹⁷ Ī sī yūtandūka, Dasani ūhilimīkīla mo; Abilamu nang'hwe yūnkundīkīja n'ibità lyakwe.

¹⁸ Na moto gūbaka ū ng'wibità lyabo, ndali jūbanogoteja a bīīti ba malofu.

¹⁹ Bahayūshika Holebu būbeeja ndama, būyūlamya līshiikolile lya kūsula.

²⁰ Ūyo al'ikūjo lyabo būngalūcha kūbiza shiikolile sha ng'ombe, īyo īkadīīmaga maswa.

²¹ Būng'wība ū Mulungu mpīja wabo, ūyo walī wīta mitaale aho balī mu Misili,

²² shakūkumya ū mu sī ya ng'wa Hamu, na shītīle sha kogohya ū kū Nyanza Yaza.

²³ Kūlwa yose yenīyo akahaya abayagaje, nī gīsī wingīlīīla Musa, ū nsolwa wakwe, wīmīīla kū būtongi wakwe, ūbūgalūcha ū būpelanu wakwe atizūbabūlaga.

²⁴ Nī sī ī yawiza bīdalaha, boya ū kwīsanya īyo walī wabisagīja.

²⁵ Būyikala bakūdugumaga ū mu maheema gabo, Ī lilaka lya ng'wa SEEBA boya ū kūliigwa.

²⁶ Nose ūnunja nkono gwakwe ng'wigūlya, ūbilahīlīla gīkī akūbabūlaga pye, bashilīle ng'witogolo;

²⁷ na gīkī ī shibyalīlwe shenīsho akūshibbalasanya shikashilīle kū mahanga, shisambaale hose hose ū mu ma sī.

²⁸ Hama bakadimana na Lībaalī lya Peoli, būyūlya shitambò sha kūfunyiwa kūlwa nguno ya bafu.

²⁹ Ū SEEBA būmpelanya kūlwa shītīle shabo, būgulumūkīlwa ihūūya.

³⁰ Gwike Finehasi ūbūūka wingīlīīla ha gatī, lyūhangījiwa ī lihūūya.

³¹ Kūlwa mhayo gwenūyo ūbalīlwa būtūngīlīja, kūshisha shibyalīlwe na shibyalilwe ilalī.

³² Na a haho balī Meliba ha minzī bakampelanya, nose nū Musa ūgwa mu būbi kūlwa nguno yabo;

³³ bakagūpelanya ū moyo gwakwe, kūshisha ūhaya mihayo mu būtūdīlīla.

³⁴ Nū kūgayagaja a mahanga bakaleka, batītile ūmo walī wabalagīīlīla ū SEEBA.

³⁵ Alīyo biguulanya ū mu mahanga, nabo bilanga kwīta īyo īkīītagwa mu mahanga.

³⁶ Būyūshilamya ī shiikolile shabo, shūbiza lūbeto ū kūbo.

³⁷ Bitūnja babo na bashīke babo būyūbafunya shitambò kū masamvwa.

³⁸ Biita mininga gatī na shilingo, mininga ga bitūnja na bashīke babo, abo baababafunyaga shitambò kū mashiikolile ga Kanaani; ī sī yūsosohajiwa na mininga genayo.

³⁹ Īyo bīyītaga yenīyo yūbadabbalanhya, Ī shītīle shabo shūbenheleja kūneka ū Mulungu.

⁴⁰ Hūna lūūlū ū SEEBA ūbapelanīla a banhū bakwe, ūbakolwa a banhū ba wingīji wakwe.

⁴¹ Ūbatūūla mu makono ga mahanga, baluhya babo h'abo būbasuga.

⁴² Banishi babo būbiboneela, būbatūūla ha sīlīlī ya būdūla na būsugi wabo.

⁴³ Ng'hangala ningī wabapījaga, alīyo bikalaga būngomela dūhū, nguno h'ūmo jalī ī ng'hūmbū jabo, nose ī shibi shabo shūbenheleja kūdalahwa.

⁴⁴ Alīyo nahene aho wigwa ū kūlīla kwabo, ūbūdīlīla ū wiboneelwa wabo.

⁴⁵ Ūliizūkwa ī lilagane lyakwe kūlwa nguno yabo, ūshosha moyo kūlwa būtogwa wakwe būtaale.

⁴⁶ Ūbīīta kūchīlwa shigongo ū kū banhū abo baalī babatūūlile mu būding'wa.

⁴⁷ Ee SEEBA Mulungu wise, tūpījage; na tūbilingage kūfuma ū kū mahanga, tūdūle kūlīlūmba ī lina lyako lyeela, na kūyegela ng'wikūjo lyako.

⁴⁸ Ū SEEBA, ū Mulungu wa Isalaeli akumīlījiwe, kūfuma welelo kūshisha welelo. Nīyo pye a banhū bahoolanīje hamò kūhaya gīkī, “Alichene!” Akumīlījiwe ū SEEBA.