Zabuli 105 - Bibilia Ilagano Lya Kale 2015

Ū SEEBA alizūkilwe ī lilagane lyakwe

¹ Nūmbagi ū SEEBA, līkumīlījagi ī lina lyakwe, bamanīkījagi a banhū īyo akwīyītaga.

² Ng'wīmbīlagi, īmbagi mungongoole, shikumūchagi pyī ī shītwa shakwe sha kūkumya.

³ Yegelagi mu lina lyakwe lyeela; leka jiyege ī ng'holò ja banhū abo bakūnkoobaga SEEBA.

⁴ Nkoobagi ū SEEBA, nī nguzu jakwe jikoobagi; shikū jose būkoobagi ū būshū wakwe.

⁵ Yizūkagwi ī ya kūkaamaja īyo wīyītile; Ī shakūkumya shakwe īsho akūshītaga, nū būlamuji wakwe ūbo wabūfunije.

⁶ Ee bing'we būbyīle o ng'wa Abulahamu ntūmami wakwe, bing'we basolwa bakwe, baana ba ng'wa Yakobo.

⁷ Ū wei alī SEEBA Mulungu wise, ū būlamuji wakwe būlī hose pyī ū mu sī.

⁸ Shikū jose alizūkilwe ī lilagane lyakwe, ū mhayo ūyo agūlagīlile kūshisha shibyalilwe shihūmbī;

⁹ Ī lilagane īlo akalībeeja na Abulahamu, Ī shilahīlo shakwe īsho akang'wilahīlīla Isaka.

¹⁰ Ū kūlī Yakobo ūshishokeela shūbiza shilagīlo, ū kūlī Isilaeli lyūbiza ilagane lya welelo bose.

¹¹ Akahaya, “Ī sī ya Kanaani nakūkwinha bebe, ū gwenūyo gwene ngabo gwa wingīji wako.”

¹² A henaho baalī bagehu ū būkūmi wabo, baalī bagehu no, hangī baalī bageni moi.

¹³ Bikalaga bakūyūngaga kūfuma ihanga īlī kūja ihanga līngī, na kwīnga būtemi būlebe kūja kū būngī.

¹⁴ Atanzunīlīgije munhū nūūlū ūmò abiboneele, kūlwa nguno yabo wahamaga batemi;

¹⁵ wabawīlaga, “Lekagi ū kūbakuumya a bitīīlwa maguta bane, benabo bahangi bane, mutizūbaminya.”

¹⁶ Akitana nzala yūyikalīla ī sī, ūbīngīja pyī ī shiliwa sha mhamba.

¹⁷ Gwike walī watūma munhū kū būtongi wabo, Yosefu ūyo akagūjiwa mu būsese.

¹⁸ Akatungwa gūminyiwa nhendele a magūlū, nū mu nhingo ūkonzeelwa chūma;

¹⁹ Aho yashikīīla īyo walī wīhaya, ū mhayo go ng'wa SEEBA gwīyoolecha ī ng'hana yakwe.

²⁰ Ū ntemi ūtūma banhū būntaligūlīla, ū nsugi wa banhū hū ng'wene ūntungūlīla,

²¹ ūntūūla ha būtaale wa kaya yakwe, na kūshisuga pyī ī shikolo shakwe.

²² A bataale ba ha ng'wakwe ayūbahūgūla ūmo atogelilwe, na a banamhala ba ha ng'wakwe abalange masala.

²³ Hūna ū Isilaeli ūja mu Misili, ū Yakobo ūlobela mu sī ya ng'wa Hamu.

²⁴ Ū SEEBA ūbongeja ū būbyīle wa banhū bakwe, na ūbinha nguzu ningī kūtinda a baluhya babo;

²⁵ abo akabagalūcha ī ng'holò jabo, gīkī babakolwe a banhū bakwe, būbīītīla yabūbi mu masala gabo.

²⁶ Hūna ūntūma Musa ntūmami wakwe, na Alooni ūyo walī ansolile.

²⁷ Būboolekeja shimanīkījo kūfuma kūlī we, shakūkumya shakwe ū mu sī ya ng'wa Hamu.

²⁸ Ūtūma giiti, ī sī yūbiza mu giiti sha gamha, nīyo batīgomelile ī mihayo yakwe.

²⁹ A minzi gabo ūgagalūcha kūbiza mininga, ūjenheleja kūshila kūcha pyī ī ndīlo jabo.

³⁰ Ī sī yabo yūgulumūkīlwa madanga, gookala kūshisha na mu chumba sha batemi babo.

³¹ Akayomba giza magi, gatī magi nīyo a gene, na mabūfune gokala hose pyī ū mu sī yabo.

³² Ī mbula yabo wīgalūcha kūbiza ya mawe, na ndabi ja ng'hūba jikūlabyaga pyī ū mu sī yabo.

³³ Ī mizabibu yabo wīkenaagūla, Ī mitini nī mitī ya mu sī yabo wībīnzagūla pyī ī yose.

³⁴ Akahaya mhayo, ī sī yabo yikīīlwa njige, na gū gū gū jitī na būbalīle, jūlamatīla mo.

³⁵ Ū mu sī yabo jikalya jūshikimbīja pyī īsho shikazwaga, jūfuulīlīja pye a matwajo ga sī yabo.

³⁶ A babyalwa ba kwandya ba mu sī yabo ūbatūla, Ī litwajo lya wandījo wa nguzu jabo ūbīngīja.

³⁷ A Baisilaeli ūbatongeela būfuma moi, baaja balamatīlile feza na zahabu; ū mu ng'anda jabo atigelile ngokolo nūūlu wa ngota.

³⁸ Aho bahūūma bajile, yūyega ī Misili, nguno ī lyogohya lyabo lyalī lyīyikalīla.

³⁹ Hūna ūbambīla ilunde, gīkī lībafīkīje; na moto gwa kūbatiimīla ī būjikū.

⁴⁰ Bahayūlomba, ūbenhela ng'hwale; hama ūbigūtya na shilīwa sha ng'wigūlū.

⁴¹ Akatandūla shiganga, shūpumunhīka minzi; mu mbūga gūtoloma minzī gītī mongo.

⁴² Nguno akaliizūkwa ī lilagane lyakwe lyeela, nū Abulahamu ū ntūmami wakwe.

⁴³ H'ūmo akabafunīja mu būyegi a banhū bakwe, a basolwa bakwe mu kwīmba na kūsangabala.

⁴⁴ Ūbinha sī ījo jalī ja mahanga, būbiza bingīji mu matwajo ga milīmo ya banhū,

⁴⁵ kūlwa gīkī bashidime ī shilagīlo shakwe, na a malange gakwe bagalondeele. Akumīlījiwe ū SEEBA!