Zabuli 104 - Bibilia Ilagano Lya Kale 2015

SEEBA nang'hani wa Shiseeng'wa shakwe

¹ Ee būpanga wane, nkumīlījage SEEBA, Ee SEEBA Mulungu wane, ūlī ntaale no, ūzwalīlile ikūjo na būdūla wa nyatemi.

² Bebe ūyo wigumīīlile isana gītī ng'handa, ūyo ūkalyamba ī ligūlū gītī iheema;

³ ūyo migamba ya wikalo wako wīhelile higūlya ya minzī; a malunde ūkagītaga kūbiza igogoteni lyako, a manana ga lūyaga gene ndamhī yako.

⁴ Ī miyaga ūkīyītaga kūbiza batūmījiwa bako, Ī ndali ja moto wajīīta kūbiza batūmami bako.

⁵ Ī sī wīkīndīka bebe a ha misingi yayo, aho ītīko kūsaamiwa nūūlū na hado yaya,

⁶ Ūkīkundīkīja minzī mingī gītī kachembeho, a minzī gakīmīīla kūshisha gūūkundīkīja na ngūlū.

⁷ Aho wagahama a minzī gūūpeela; gakaliigwa ī lilaka lya kūpalalūka kwako, gūūbela nhambo gajile;

⁸ gakahūūma kwīnga mu ngūlū, gūūholomoka gabītile mu njonga, gūūkashika ū kwipandī īlo wagabeegeja.

⁹ Ūkagatūūlīla lūbīmbī ūlo gatīko kūlūkīlanhya, gatizūshoka kwīkundīkīja hangī ī sī.

¹⁰ Ūkadūlūlaga nzwīlo ja minzī mu mitubīlo, gaayūsela gakūbītaga mu ng'hilimvwa ja ngūlū.

¹¹ Gakajing'wishaga pyī ī shinū ū kū matogolo, h'ayo na ndūūlū jikang'waga jamala notà.

¹² Noni ja hape najo jikatūūlaga ng'hambī yajo, ū mu matambī ga mitī ītī kwīmba nīyo ū kwene.

¹³ Kwīngīīla kwigulya ū kū wikalo wako, Ī ngūlū ūkajiisīīlaga minzī jaloba, nī sī yokala matwajo ga milīmo yako.

¹⁴ Maswa ga kūlya mitugo ūkagazwishaga bebe, pyī nī shikolo sha ng'wa munhū kūmanūhamba, ayūpandīka shilīwa kūfuma mu migūnda.

¹⁵ Hū bebe ūkang'winhaga divai ū munhū, Īyo īkazalabanyaga ng'holò yakwe, na maguta ga kwibila amyengele būshū; pyī nī shilīwa īsho shikīguzuhyaga ī ng'holò yakwe.

¹⁶ Nī mitī ya ng'wa SEEBA īkang'waga minzī yigeja, ī mikoola ya Lebanoni īyo wīhamba wei ng'wenekīlī.

¹⁷ H'ūmo na noni jikabeejaga chanjo shajo, mu mibanga h'ūmo gala akapandīkīlaga wikalo wakwe.

¹⁸ Ī ngūlū ī ndīīhu jene wikalo wa ngūlūgūlū, milala ya mu ngūlū wene būpīlīlo wa mhīmbī.

¹⁹ Ng'weji gwene ngabūji gwa kajīle ka ng'waka, līīmi nalyo līdeebile makanza ga kūgwa kwalyo.

²⁰ Bebe h'ūkabejaga giiti, wilonga būjikū; hūna shiinū na shiinū ū mu būjikū jiyita kūyela yela.

²¹ Baana ba shimba ītī kūzuumīīla ū kwene, bakūkoobaga ilya; bapandīke ngabo gwabo kūfuma kūlī Mulungu.

²² Ī līīmi lyakenya kūsūja basūsūūba bajile, baakisūmbya kūlambalala mu mahalo gabo hangī.

²³ Hūna ū munhū nang'hwe akapulukaga kūbona ya kwīta, na ng'hana akatumamaga milīmo līīmi tole.

²⁴ Ee SEEBA, ī milīmo yako īlī mitaale no! Būlī gwene ūgūbeegije mu masala mashimu, ī sī yokalile shiseeng'wa shako.

²⁵ Ī nyanza nayo īlīko ū kwenuko, nhaale hangī ngalī kīngī nasho; yokalile shiseeng'wa būhī na būhī, shitī na būbalīle; shiseeng'wa shipanga shitaale na shido.

²⁶ H'ūmo na meli jikibisanyaga jijile hose hose, nū Lewiasani alī ng'wenūmo, ūyo wameeja ayūtambīīlīla mo.

²⁷ Ī shose shenīshi shikūlolile bebe iyene, ūshinhe shilīwa mu makanza ayo gigeleelilwe.

²⁸ Ū bebe ūlū washinha shikabilingaga, ūlū wagūkundūla ū nkono gwako, shiigūta shikolo shawiza.

²⁹ Ūlū wabūbisa ū būshū wako shikazwanganaga, ūkashīngījaga ī myūyī yako shacha, shashoka mu lūbuubu.

³⁰ Ūlū wītūma ī myūyī yako shikaseemagwa, nīyo ū bebe ūkīshokejaga nī sī ū būpya wayo.

³¹ Ī likūjo lya ng'wa SEEBA ni līshingage ho welelo bose, ū SEEBA ayīyegele ī milīmo yakwe;

³² ūyo we wike akīlolaga ī sī yazuguma, nī ngūlū akajikuumyaga jazuuka lyochi.

³³ Ū SEEBA nakūng'wīmbīla shikū jose ja būlamu wane; ū Mulungu wane nakungongoola ikanza lyose lya būpanga wane.

³⁴ Ū kwidedeng'hanya kwane ni kūnyejage, nguno nanyegelile no ū SEEBA.

³⁵ Alīyo a bashibi a bene leka bayagajiwe ū mu sī, a babūbi batizikala mo ū musī. Ee būpanga wane, ngongoolage ū SEEBA! Ū SEEBA akumīlīijwe.