Zabuli 101 - Bibilia Ilagano Lya Kale 2015

Ntemi na kwisagīja kwakwe

Zabuli ya ng'wa Daūdi.

¹ Nakwīmba shigongo na būtūngīlīja, Ee SEEBA, nakūkwīmbīla bebe.

² Nakwilang'hana nashimīzīle mu nhūngwa jigoloolile. Ūkwiza nanalī ū kūlī nene? Ū mu numba yane nakūshīmīza na ng'holò īgoloolile.

³ Ū mhayo gwabūbi natūgūtūūla kū būtongi wa miso gane. Ī milīmo ya nyagomi nīīkolilwe no, yaya ū kwisanja mo ū nene nūūlū hado.

⁴ Ī ng'holò ng'hūganu natiyegeela nayo ū nene, natī na nīmo na mhayo gose gose gwa malofu.

⁵ Ū wa kwikala ūnsīīga nzenganwa ng'wiye, ū nene nakūng'huumūja ilalī. Ūyo alī na kalolele ka nyadooshi na wa ng'holò nikumīlīja, ū ng'wenūyo atī na gwakwe ū kūlī nene.

⁶ A miso gane gakwikala nabo a basanyiwa ū mu sī, badūle kwikala hamò nane; ū wa nhūngwa jitī na shisembo, h'ūyo akūnitūmamīla.

⁷ Atīho munhū wa kwigasha mu numba yane ūyo akīītaga ya būmaama; nūūlū atīho wa kwīmīīla kū būtongi wane ūyo akalūngalūngagaga ya būlomolomo.

⁸ Būlī dilū nakūbayagaja pye a ba malofu ū mu sī, pye a babūbi nakūbakenaagūla bashile ū mu nzengo go ng'wa SEEBA.