Yoshwa 9 - Bibilia Ilagano Lya Kale 2015

Būlomolomo wa Bagibeoni

¹ Hūna a batemi ba kū ntambūko gwa ng'weli ya mongo gwa Yolodani aho bīyiigwa ī yenīyī, batemi ba Bahītī, Baamooli, Bakanaani, Bapelizi, Bahīvī, na Bayebusi; abo baalī bazengile mu sī ya magūlya, na kū sī ja ntubīlo, na a ba kū mbalama ya Nyanza ī Nhaale kūshisha mhandī ja Lebanoni;

² pye a bose benabo bakibilinga hamò, kwilwisha būlūgū nū Yoshwa na a Baisilaeli.

³ Alīyo a banhū ba Gibeoni aho bīyiigwa īyo ū Yoshwa walī wabīītīla bana Yeliko na bana Ai,

⁴ a bene būbona batūmamīle masala ga kūlomaloma. Būja gītī banhū batūmilwe, balī na nzobe jabo jibūūkije magūnīla makūlūkūlū ga shikolo, na mhīnda ng'hūlūkūlū ja kūbūūkīja divai, nīyo jalī jitandagūkile hūna jūsung'wa.

⁵ Ū kū mhambala jabo būzwaala shilatū shishilile shūtūūlīlwa shilaka, hama nī shizwalo īsho baalī baazwaala shalī shishila shilile; ī migatī ya kūja bakūlyaga mu nzīla nayo būsola yakale, mikalamūku hama īlī na booba.

⁶ Hūna a banhū benabo būja ū kūlī Yoshwa, ū kū ng'hambī ī Giligaali; būūkang'wīla ū wei na a Baisilaeli a bangī gīkī, “Twafuma kū sī ya kūle, na lūūlū beejagi ilagane hamò nise.”

⁷ A Baisilaeli būbawīla a Bahīvī benabo gīkī, “Hamo īdūlīkanile kūbiza muzengile mu bbihī bbihī na bise ūmu; ūlū gīko nūmho tūkūdūla kinehe ū kūbeeja ī lilagane ning'we?”

⁸ Būng'wīla ū Yoshwa gīkī, “A bise tūlī basese bako!” Alīyo ū Yoshwa ūbabūūja, “Ī gete mulī ba naani a bing'we, na ng'wafumaga halī?”

⁹ Nabo būnshokeja balīhaya, “A bise basese bako twafumaga kū sī ya kūle no, twizaga kūlwa lūkumo lwa ng'wa SEEBA Mulungu wako. Nguno twalwigwile ū lūkumo lwakwe, īyo wīyīīta mu sī ya Misili;

¹⁰ nī yose īyo wabīītīlile batemi babīlī ba Baamooli ū kū ntambūko gwa kīya ya mongo gwa Yolodani, ū ntemi Sihoni wa Heshiboni nū Ogi ū ntemi wa Bashani, ūyo wikalo wakwe walī Ashtalooti.

¹¹ Hūna lūūlū a banamhala bise na a banhū ba mu sī yise būtūwīla gīkī, ‘Bing'we solagi mhamba ja kūja mulītūmamīla mu nzīla; muje mukabagīshe a banhū benaba, mubawīle na gīkī, A bise tūlī basese bing'we, beejagi ilagane hamò nise.’

¹² Ī migatī yise yenīyī yaalī misebu aho twīsolaga kūfuma ū mu kaya jise, ū mu lūshikū lwa kwandya lūgendo lwa kwiza kūūnū; alīyo ī haha angū mulīyībona ūmo yūmīlile yūkīīta na booba.

¹³ Nī mhīnda jise ja divai aho tūlījookaja ī divai jalī mhya, alīyo ī haha mulījibona najo ūmo jakūlūhalīlile, jūūkatandagūka na kūtandagūka. Nī shizwalo shise shenīshi nī shilatū shise shashilīlile mu lūgendo.”

¹⁴ A Baisilaeli būzunya ū kūbeeja nabo ī lilagane, alīyo baalī batabūūgije ū kūlī SEEBA.

¹⁵ Hūna ū Yoshwa ūbeeja nabo ilagane lya mhola, gīkī balekwe bikale bapanga. Na a batongeeji ba banhū bizunīlīja nago ū mhayo gwenūyo, nīyo mu kūlahīla.

Bagibeoni kūtūūlwa būsese

¹⁶ Aho baalībeeja ī lilagane na a Bagibeoni, jahayūbīta shikū idatū a Baisilaeli bigwa gīkī gashi nīyo baalī banhū ba mu bbihī dūhū, bazenganwa bichaabo.

¹⁷ Hūna a Baisilaeli būbūūka bajile ko, būshimīza lūgendo lwa shikū idatū būshika ū kū mizengo yabo, Gibeoni, Kefila, Beeloti na Kiliati-yelimu.

¹⁸ Alīyo a Baisilaeli batabadumīlile, nguno a batongeeji babo baalī baamala kūbilahīlīla kū būtongi bo ng'wa SEEBA Mulungu wa Baisilaeli. Gwike a hene pye a banhū bakabadugumīla a batongeeji babo,

¹⁹ alīyo būbawīla dūhū gīkī, “Twamalile kūbilahīlīla kūlī SEEBA Mulungu wa Baisilaeli; na lūūlū ī haha tūtīko kūbakuumya gete.

²⁰ Gwike gūūyū ū gwa kūbīītīla: Tūkūbaleka bikale bapanga tūtizūgwīīlwa nsango, kūlwa kūkenaagūla shilahīlo īsho twabilahīlīlile.”

²¹ A batongeeji babo bongeja kūhaya gīkī, “Ni bikalage bapanga, alīyo bakūbiza baseenhi ba ng'hwi, na badahi ba minzī kūlw'ihanga igima.” Ū mu gīko ū kwisagīja kwa batongeeji ūmo baalī baabisagīīgīja kūbiza kwikala gīko.

²² Hūna ū Yoshwa ūbitana a Bagibeoni ūbawīla, “Nibūlī ng'watūlembile ng'ūtūwīla gīkī, ‘A bise tūzengile kūle no na a bing'we,’ alīyo gashi mulī muumu bbihī ūmu hamò nise dahū?

²³ Na lūūlū ī haha managi gīkī ng'wazumagwa, ū mu būlamu wing'we bose mukūbiza baseenhi ba ng'hwi, na badahi ba minzī kūlwa numba ya ng'wa Mulungu wane.”

²⁴ Nabo būnshokeja ū Yoshwa balīhaya, “A bise basese bako tūkawīīlwa hape gete gīkī, ū SEEBA Mulungu wako walī wanagīla ū Musa kūng'winha bing'we pyī ī sī yenīyī, na gīkī akūbamala pye a banhū ba ng'wenūmu bang'wīngīle a bing'we. H'ī chene tūkang'ogoha no a bing'we, tūbona tūtizūjimīīja būpanga wise; hū tūūgwīta ū mhayo gwenūyo.

²⁵ Alīyo ī haha tūlī mu makono gako; twītīlage ūyo ūlīgūbona gūtūngīlīgije na gwawiza ū mu miso gaako.”

²⁶ Ū Yoshwa ūbiza wabapīja ū kū kūfuma ū mu makono ga Baisilaeli, būleka ū kūbabūlaga.

²⁷ Alīyo ū mu lūshikū lwenūlo, ū Yoshwa ūbīīta kūbiza baseenhi ba ng'hwi, na badahi ba minzī kūlw'ihanga igima lya Baisilaeli, na kūlwa ng'walīlo go ng'wa SEEBA; kwipandī lyose lyose īlo SEEBA alaalīsole. H'ūmo bakwītīlaga kūshisha nī lelo īyī.