Yoshwa 8 - Bibilia Ilagano Lya Kale 2015

Kahelele ka kwīdumīla Ai

¹ Hanuma ya henaho ū SEEBA ūng'wīla ū Yoshwa, “Ūtizogoha nūūlū ūtizūtawa tawa. Līsolage pyī ī libità lya bashilikale ūje ūkagūdumīle ū nzengo gwa Ai. Nguno nantūūlile mu nkono gwako ū ntemi wa Ai na a banhū bakwe, nū nzengo gwakwe, pyī nī sī yakwe.

² Ū nzengo gwa Ai nū ntemi wago ūkūgwītīla nago gīt'ūmo walī wagwītīlile nzengo gwa Yeliko nū ntemi wago. Gwike ī shisonzwa nī mitugo ja mu Ai, shose shenīsho mukūsola jibize sabo jing'we. Ū nzengo ūkūgwibandīīla kū numa yago.”

³ Na lūūlū ū Yoshwa ūbūūka nabo pye a bashilikale bakwe, būja kwīdumīla ī Ai. Ūsolaanhya banhū shihūmbī makūmi adatū ū mu bashilikale bakwe a babūdūla gete, ūbatūma būja ko makanza ga būjikū.

⁴ Ūbalagīja alībawīla, “Degelekagi chiza, mukūgwizīīla ū nzengo kūfuma kū numa yaago, hūna ng'wibande pye a bose mu masaka; alīyo yaya ū kūbiza kūle nago.

⁵ Hūna ū nene na a bashilikale abo nakūbiza nabo, tūkūgūdumīla ū nzengo kūfuma kū būtongi; a banhū baamo ūlū būtūbona bakūtwihuutīīla gīt'ūmo bakīītīla ī kwandya, nise tūkūbapeela.

⁶ Bakūtūpeeja batūkūūbīgije kūshisha tūbasegendeje ū kū nzengo, nguno bakwiwīla gīkī, ‘Baabo baatūpeela hangī gīt'ūmo bakīītīla kwandya.’ Na lūūlū ū ng'wikanza lya kū tūpeeja,

⁷ a bing'we mukūpuluka kūfuma aho ng'wibandaga mugūdime ū nzengo. Ū SEEBA Mulungu wing'we akūgūtūūla mu makono ging'we.

⁸ Ūlū ng'ūgūdima ū nzengo gwenūyo gūtiimagi moto. Ītagi gīt'ūmo SEEBA alagīlile, ū nene nang'winha ī shilagīlo; ning'we mukwīdīīlīīla lūūlū ī yīngī.”

⁹ Hūna ū Yoshwa ūbaleka būja; nabo ng'hana būja ū kwipandī īlo lyigeleelilwe, būkibanda bbihī bbihī kwenūko, ha gatī ya Beeteli nī Ai. Alīyo ū wei ū Yoshwa ū būjikū wenūbo ūkeeyūla alī hamò na a banhū a bose.

Nzengo gwa Ai kūding'wa

¹⁰ Kū ntondo dilū ū Yoshwa ūbūūka ūbahela chiza a bashilikale bakwe; ū wei na a batongeeji ba Baisilaeli būtongela ū kū būtongi aho bajile ī Ai.

¹¹ Ī libità ī lyoise īlo lyalī hamò nang'hwe būshimīza bajile ū kū nzengo, aho beegeela ū kū būtongi waago būtūūla ng'hambī kū lwande lwa sukuma ya Ai; a ha gatī yabo nū nzengo gūbiza ho ntubīlo gwa mbūga.

¹² Hūna ū Yoshwa ūsola banhū gītī shihūmbī shitanò, ūbalagīla kwibanda ha gatī ya Beeteli na Ai, kū ng'weli ya nzengo.

¹³ A bashilikale a bose būhelwa chiza, būlī bene mu mapandī gabo; bamò baalī kū ng'hambī sukuma ya nzengo, na bangī bibanda kū ng'weli yaago ū nzengo, pye būmalīīla. Ū būjikū wenūbo ū Yoshwa ūja ūūkakeeyula kū ntubīlo gwa mbūga.

¹⁴ Ū ntemi wa Ai aho wabona gīko, ū wei na a banhū bakwe a bagosha ba mu nzengo gwenūyo būbūūka wangū wangū ītaalī dilū, būja kwamba būlūgū na a Baisilaeli kū ntulumenho gwa kūīlīīla kwitogolo lya Alaba. Alīyo walī atamanile ī gīkī baalīho banhū bang'wibandīīlile ū kū numa ya nzengo.

¹⁵ Ū Yoshwa na a Baisilaeli a bose būzunya ū kūpeejiwa balīshoshiwa kū numa; būpeela bajile kū nhogolo jaape.

¹⁶ A bagosha ba mu nzengo gwa Ai pye a bose bitanwa kūbakūūbya; būnkūūbya ū Yoshwa nī libità lya bashilikale bakwe, gashinaga balīdutwa kūsegenejiwa ū kū nzengo gwabo.

¹⁷ Pye gete a bagosha būfuma ū mu nzengo, atasaagile nūūlū ūmò ū mu mizengo ya Ai nī Beeteli, ū wa kūleka kūbapeeja a Baisilaeli. Būgūleka ng'waje ū nzengo būpeela kūbakūūbīja a Baisilaeli.

¹⁸ Hūna ū SEEBA ūng'wīla ū Yoshwa gīkī, “Līnunjage ng'wigūlya ī lichimu lyako īlo ūlībūūkije mu nkono gwako, ūlyolote kūlola Ai, nguno ū nzengo gwenūyo nakūgūtūūla mu nkono gwako.” Ng'hana ū Yoshwa ūlīnunja ng'wigūlya ī lichimu lyakwe kūlīloleja ī Ai.

¹⁹ Aho wīta dūhū ī gīko, a banhū abo baalī bibanda būpuluka wangū wangū; būpeela bajile ū kū nzengo, būkingīla mo būgūdima, hama būgūtiima moto ī likanza lyenīlo.

²⁰ A banhū ba Ai aho bikībūka būlībona ī lyochi linunga kwigūlya kū malunde; alīyo būgayiwa ī lipandī ī lya kūpeelela kūlwa kwipīja, a Baisilaeli abo baabapeelaga kūīlīīla kwitogolo būbagalūkīla a bapeeja babo.

²¹ Nguno ū Yoshwa na a Baisilaeli a bose abo wapeelaga nabo aho babona gīkī abo baalī bibanda bagūsola ū nzengo, nī lyochi līlīdundumūka kūfuma ū kū nzengo gwenūyo, bakabagalūkīla a bana Ai bandya kūbabūlaga.

²² A bashilikale abo bakagūpemba moto ū nzengo nabo būbasanga; būbiza banyamanījiwa ha gatī; būlī lwandī būbiza ko Baisilaeli. A Baisilaeli bakababūlaga no, batalekeelile mpanga nūūlū ūmò, na atigelile wa kūpūlūgūka gīkī apeele.

²³ Alīyo ū ntemi wa Ai ū ng'wene būndima alī mpanga gīko, būntwaala kūlī Yoshwa.

Banhū ba Ai kūmalwa pye

²⁴ A Baisilaeli aho bamala ū kūbabūlaga a bana Ai abo baalī kū malaale na kū matogolo ūko baalī babakūūbīja, aho bamalwa kūbūlaaagwa pye a bose, a Baisilaeli būshoka ū kū nzengo gwa Ai, būkababūlaga pye abo baalīmo.

²⁵ Ū lūshikū lwenūlo būcha banhū shihūmbī igana na makūmi abīlī, bagosha na bakīma; pye a banhū ba mu nzengo gwa Ai.

²⁶ Nguno ū Yoshwa atagwikije ū nkono gwakwe ūyo gwalī gwalīnunja ng'wigūlya ī lichimu, kūshisha būshila pye gete a bikaji ba mu nzengo gwa Ai.

²⁷ Alīyo ī chene a Baisilaeli bakasola mitugo na shikolo shingī, kūbiza shisonzwa shabo kūfuma ū mu nzengo gwenūyo, gīt'ūmo SEEBA walī wanagīīla ū Yoshwa.

²⁸ Na lūūlū ū Yoshwa ūgūpemba moto ū nzengo gwa Ai, ūgwīta kūbiza itūūgo lya būsoso ilalī, ipandī lītī lya kwikalīlwa na banhū kūshisha lelo īyī.

²⁹ Ū ntemi wa Ai ūnungeleja ha līntī kūshisha mhīndī; aho lyasalalīja ī līīmi, ū Yoshwa ūlagīja gwīnjiwa ū mimba gwenūyo ū mu līntī, gūponyiwa ha mita gwa kwingīlīla mu nzengo. Hūna būtūlīīla ho ilūndo itaale lya mawe, īlo nī lelo īyī lītaalī līlīho hoi.

Ng'walīlo mu lūgūlū lwa Ebaali

³⁰ Hanuma ya henaho, ū Yoshwa ūzenga ng'walīlo mu lūgūlū lwa Ebaali kūlwa nguno ya ng'wa SEEBA Mulungu wa Baisilaeli,

³¹ gīt'ūmo Musa ntūmami o ng'wa SEEBA walī wabalagīīla a Baisilaeli. Akagūzenga kūlenganīla nū mumo handīkīlilwe ū mu shitabo sha shilagīlo sha ng'wa Musa, ng'walīlo gwa kūzengwa na mawe gatabeegelejilwe na munhū, ayo gatakuumiwe na shitūmamīlo sha chūūma shose shose. A higūlya yaago būmfunīja ū SEEBA shakwinha sha kūpemva; būfunya ho na shitambò sha būsangī.

³² Aho balī kwenūko, ū Yoshwa ūshandīka būpya ha mawe ī shilagīlo sha ng'wa Musa, īsho walī washandīka; ūshandīka a Baisilaeli balolile;

³³ Baisilaeli bose, bageni na a baana byalwa, hamò na a banamhala babo, na a bagunanhi na a balamuji babo; bose benaabo baalī ū kū mhandī būbīlī wajo ī j'isandīko lya ng'wa SEEBA ī lya būlagane, baalī bīmīīla būlolela ū kū banhū abo baalī balībūūkije, a bagabīji ba lūganda lwa Lawī. Nusu ya banhū baalī bīmīīla kū būtongi wa lūgūlū lwa Gelizimu, ī nusu ī yīngī kū būtongi wa lūgūlū lwa Ebaali, gīt'ūmo Musa ntūmami o ng'wa SEEBA walī wabalagīīlīla kūfuma kale, aho wabaganikīlaga mihayo ya kūbalombela a Baisilaeli.

³⁴ Hanuma ya henaho ū Yoshwa wīsoma pyī ī mihayo ya shilagīlo, ī na a mazumo, gīt'ūmo yandīkilwe mu shitabo sha Shilagīlo.

³⁵ Ū mu mihayo pyī īyo Musa walī walagīla, gūtasaagile nūūlū gūmò ūyo atagūsomile ū Yoshwa ū kū Baisilaeli bose abo baalī bibilinga, pye abo baalīho; a bakīma, baana, na a bageni abo bikalaga hamò nabo.