Yoshwa 7 - Bibilia Ilagano Lya Kale 2015

Wibītīlīja bo ng'wa Akani

¹ Gwike a Baisilaeli bakaleka ū kūshimīza na būtūngīlīja ū mu mihayo ya shikolo īsho shaalī shiigeleelilwe shifunyiwe kūlwa ng'wa SEEBA. Walīho ngosha ūmò lina lyakwe Akani, ng'witūnja o ng'wa Kalīmi ng'wana Zimli, wa numba ya ng'wa Zela, lūganda lwa Yuda. Ū ngosha ng'wenūyo walī wasola shikolo shilebe ū mu shenīsho; ū SEEBA ūbapelanīla no a Baisilaeli.

² Ū mu shikū jenījo ū Yoshwa ūtūma banhū kūfuma ī Yeliko, baje kū nzengo gwa Ai, bbihī na Bet-aveni, kīya ya Beeteli. Ūbawīla gīkī, “Jaagi mukīdate ī sī yenīyo.” Na ng'hana a banhū benabo būja būūkagūdata ū nzengo gwa Ai.

³ Aho bashoka ū kūlī Yoshwa būng'wīla gīkī, “Ītīho nguno ya kūja ko pye a banhū, twalaga banhū gītī shihūmbī shibīlī nūūlū shidatū dūhū gīko bakagūdiime ū nzengo; yaya ū kūbanoja noja pye a banhū, nguno balīmo banhū bageehu no ū mu nzengo gwenūyo.”

⁴ Na ng'hana banhū baakūshika gītī shihūmbī shidatū gīko būlinha bajile ko; alīyo būūkatūlwa no na a mana Ai, būpeela nhambo.

⁵ Banhū babo makūmi adatū na batandatū būbūlagwa na a mana Ai. Boolomiwa nhambo kūfuma a ha mita gwa nzengo kūshisha Shebalimu; būja bakūbūlagagwa ū mu ntulumenho gwenūyo. Ū mhayo gwenūyo gūbogohya no a banhū, jūbbaaha ī ng'holò jabo.

⁶ Ū Yoshwa ūtandūla shizwalo shakwe, wiponeja hasī kū būtongi w'isandīko lya ng'wa SEEBA, ūdīīla henaho kūshisha mhīndī. A banamhala ba Baisilaeli nabo bīīta gīko, bisaamagūlīla lūbuubu ū kū mitwe yabo!

⁷ Ū Yoshwa ūlīla alīhaya, “Ee SEEBA Ndūji wa shose, nibūlī a banhū benaba wabakīgije ū mongo gwa Yolodani, gashi nīyo ūliza kūtūtūūla mu makono ga Baamooli dūhū batūkenaagūle? Nguno nūūlū ū kwikala ū kū nkīlo gwa Yolodani ni twigegije dūhū!

⁸ Ī gīsī lūūlū ī haha nahaye mhayo kī SEEBA, īkī a Baisilaeli bapyeenwa gīkī na a banishi babo?

⁹ A Bakanaani na a banhū a bangī a ba mu sī yenīyī bakwigwa ūmo yajīlaga, batūsange kūfuma hose hose batūmale, balīpyagūle gete ī lina lise līshile ū mu sī. Ī gīsī gūlīho mhayo kī ūyo ūkūgwīta kūlwa lina lyako īlo līl'itaale?”

¹⁰ Ū SEEBA ūng'wīla ū Yoshwa, “Īmīīlaga ūgūngūmūke, winamaga hasī gīko ūlīīta mhayo kī?

¹¹ A Baisilaeli baakenije; baalīkenaagūlile ī lilagane lyane, īlo nakabalagīla gīkī shibiigelile kūlīdima. Baasolile shikolo īsho shiigeleelilwe kūfunyiwa kūlwa ng'wa SEEBA, biibile na baalomalomile, hūn'ī shikolo shenīsho būshitūūla hamò na shikolo shabo.

¹² H'ī nguno yene a Baisilaeli batūdūla ū kūbīmīla a banishi babo; bakūbinhīla ngongo baapeela, nguno babizile banhū abo bigeleeelilwe kūkenaagūlwa. Ū nene natūdūla ū kūbiza hamò ning'we hangī, kūshisha mushikenaagūle īsho shilī mu bing'we; īsho shiigeleelilwe kūkenaagūlwa.

¹³ Hūna lūūlū ī haha jaga ūkabeeje a banhū; ūje ūkabawīle gīkī, ‘Bing'we iyeejagi kūlwa lūshikū lwa ntondo; nguno ū SEEBA Mulungu wa Baisilaeli alīhaya gīkī, Bing'we Baisilaeli ū mu bing'we shilīmo shikolo īsho shiigeleelilwe kūfunyiwa kūlwa ng'wa SEEBA; ūlū mutashīngije mutūdūla ū kūbīīmīla a banishi bing'we.

¹⁴ Na lūūlū ī ntondo ī dilū ikūmingagi, ng'wegeele kwiyoolecha būlī bene mu lūganda lwabo. Ū lūganda ūlo alalūsole ū SEEBA bakwegeela mu numba numba, ī numba īyo alayīsole ū SEEBA, bakwegeela kaya kaya, hama ī kaya īyo SEEBA alayīsole būlī munhū akwegeela.

¹⁵ Ūyo alading'we alīnasho ī shikolo īsho shiigelile kūfunyiwa kūlwa ng'wa SEEBA, akūbūlagwa apemve mu moto, hamò nī shose īsho shilī shakwe. Nguno walīkenaagūlile ī lilagane lya ng'wa SEEBA, na wenhelejaga mhayo gw'igiisha minala ū mu Isilaeli.’”

Akani kūpondwa mawe

¹⁶ A ha ntondo ī dilū, ū Yoshwa ūbalagīla a Baisilaeli kwegeela būlī lūganda loi lwenekīlī; lūganda lwa Yuda lūsolwa.

¹⁷ Hanuma ī numba ja lūganda lwa Yuda jegeela, yūsolwa ya ng'wa Zela; a Bazela begeela būlī bene mu kaya yabo, yūsolwa kaya ya ng'wa Zimli.

¹⁸ Ū Yoshwa ūng'wegeleja būlī munhū ū mu kaya yenīyo, ūsolwa Akani ng'witūnja o ng'wa Kalīmi ng'wana Zimli, wa mu kaya ya ng'wa Zela, lūganda lwa Yuda.

¹⁹ Hūna ū Yoshwa ūng'wīla, “Ng'wana wane, ng'winhag'ikūjo ū SEEBA Mulungu wa Baisilaeli; hama nīyo nkumīlījage we. Niwīlage īyo wīyītile, ūtizūnibisa mhayo nūūlū gūmò.”

²⁰ Ū Akani ūshosha alīhaya, “Ū gwene gwang'hana ī chene baba, nang'hūbile ū SEEBA Mulungu wa Isilaeli. Īyo nīītile yīyī:

²¹ Ū mu shikolo ī shisonzwa, nakabona mo kakanjo kawiza ka kūfuma sī ya Babeeli, na tū kilo tūbīlī na nusu twa feza, na kagili ka zahabu kaabūdito wa gītī nusu kilo gīko; aho natūbona ū tūshikolo twenūto nūtwikūmva nūtūsola. Ī haha tūlī ng'wiheema lyane tūsīmbīlilwe hasī, ū tūfeza tūlī ū kwitina.”

²² Ū Yoshwa ūtūma banhū būpeela ū kwiheema; na ng'hana būshisanga shibisilwe ū ng'wiheema lyakwe, ī feza jalī ū kwitina.

²³ Būshisola ī shikolo shenīsho būshenha ū kūlī Yoshwa na a Baisilaeli a bose, būshitenda ha ng'wape kū būtongi bo ng'wa SEEBA.

²⁴ Hūna ū Yoshwa na a Baisilaeli a bose būnsola ū Akani ū wa mu kaya ya ng'wa Zela, nī feza, nī ng'hanjo, na a kagili ka zahabu; pyī na a bitūnja bakwe, na a bashīke bakwe, nī ng'ombe jakwe, nī nzobe jakwe, hamò nī ng'holo jakwe, nī liheema lyakwe, nī shikolo shakwe ī shingī pyī īsho walī nasho; būntwaala kū longa lwa Akoli.

²⁵ Ū Yoshwa ūng'wīla, “Nibūlī watwenhelegije kūgwa mu mhayo gwabūbi gīko? Ī lelo ū SEEBA akūkūgwisīja mhayo gwabūbi no ū bebe!” Na lūūlū pye a Baisilaeli būmponda mawe kūshisha ūcha, hanuma na a bangī būbaponda mawe nabo būcha. Aho bababūlaga būbapemba mu moto;

²⁶ hūna būmpondekeja ilūndo itaale lya mawe, īlo nī lelo īyī lītaalī līlīho. A henaho lūūlū ū SEEBA ūgalūka wīnga ū mu būpelanu wakwe ū būkalī no no no. H'ī nguno ū longa lwenūlo lūkitanagwa longa lwa Akoli kūshisha lelo īyī.