Yoshwa 4 - Bibilia Ilagano Lya Kale 2015

Mawe ga kwizūkīja

¹ Ī lihanga ī lyose aho lyamala kūgūkīla ū mongo gwa Yolodani, ū SEEBA ūng'wīla ū Yoshwa gīkī,

² “Solanhyaga bagosha ikūmi na babīlī kūfuma ū mu banhū, ūmò kūfuma būlī lūganda;

³ ūbawīle basole mawe ikūmi n'abīlī kūfuma a ha gatī gatī ya mongo gwa Yolodani, bagīnje aho bīmīīlaga a bagabīji; bagabūūche muje nago ūko mukūlaala ū būjikū wa lelo.”

⁴ Na lūūlū ū Yoshwa ūbitana ng'hana a banhū ab'ikūmi na babīlī abo waalī wabasolanhya kūfuma ū mu Baisilaeli, munhū ūmò kūfuma mu būlī lūganda.

⁵ Ūbawīla gīkī, “Jaagi ū kū būtongi w'isandīko lya ng'wa SEEBA Mulungu wing'we, būlī ng'wene akasole iwe kūfuma a ha gatī gatī ya mongo gwa Yolodani alīsesele h'ibega; a mawe gabize gīt'ūmo būūli ūbūkūmi bo ng'anda ja Baisilaeli.

⁶ Galabize lūmeng'ho lwing'we, ū kū shikū ja kū būtongi a baana bing'we ūlū būmubūūja gīkī, ‘A mawe geneya galī na makūlū kī?’

⁷ Mukūbawīla gīkī, a minzī ga mongo gwa Yolodani gakagabanhīka kūlwa nguno y'isandīko lya būlagane bo ng'wa SEEBA. Aho līlīkījiwa ū mongo gwa Yolodani, ū ng'hūūmo gwa minzī ga mongo gwenūyo gūkatīnīka. Na lūūlū a mawe genaya gakūbiza ga kūbizūkīja a Baisilaeli shikū jose.”

⁸ Na ng'hana a Baisilaeli bīīta gīt'ūmo akabalagīīlīla ū Yoshwa. Būsola mawe ikūmi na abīlī kūfuma a ha gatī gatī ya mongo gwa Yolodani, kūlenganīla nū wingī bo ng'anda ja Baisilaeli; ūmo SEEBA walī wang'wīlīla Yoshwa. Būgabūūcha būja nago ū kū ng'hambī yabo būūkagatūūla henaho.

⁹ Ū Yoshwa ūtūūla mawe gangī ikūmi na abīlī ū mu mongo gwa Yolodani, a ha ng'wanya gwa mawe ayo gakīnjiwa aho jalī jipandile mhambala ja bagabīji abo baalī balībūūkije ī lisandīko lya būkaanīji; gataalī galīho hoi kūshisha nī lelo īyī.

¹⁰ A bagabīji abo baalī balībūūkije ī lisandīko bakikala bīmīīlile ū mu mongo gwa Yolodani kūshisha a banhū būgwīta būlī mhayo ūyo SEEBA walī wanagīīla ū Yoshwa, gīt'ūmo Musa walī wanagīīla ū Yoshwa; a banhū būkangīlīja ū kūkīla.

¹¹ Aho baamalīīla ū kūkīla, ī lisandīko lya ng'wa SEEBA na a bagabīji bandya kūshimīza bajile ū kū ntambūko gwa mongo, pye a banhū balolile.

¹² Na a bagosha ba lūganda lwa Lubeni nū lwa ng'wa Gaadi, nī nusu ya lūganda lwa Manase būkīla babūūkije shilanga shabo; nīyo a bene baalī kū būtongi wa Baisilaeli, gīt'ūmo Musa walī wabawīīlīla.

¹³ Baalī gītī banhū shihūmbī makūmi anè abo bakakīla babūūkije shilanga shabo kū būtongi bo ng'wa SEEBA, bamalīīlile kūja kū būlūgū mu mbuga ja Yeliko.

¹⁴ Ū lūshikū lwenūlo ū SEEBA ūngūngūhya ū Yoshwa ū mu miso ga Baisilaeli a bose; būnkūja no pyī ū mu shikū ja būlamu wakwe, gīt'ūmo baalī bankūgīgije Musa.

Ya kūmalīīja ha kūkīla mongo

¹⁵ Hūna ū SEEBA ūng'wīla ū Yoshwa gīkī,

¹⁶ “Bawīlage lūūlū nabo a bagabīji abo balībūūkije ī lisandīko lya Būkaanīji bafume ū mu mongo gwa Yolodani.”

¹⁷ Na ng'hana ū Yoshwa ūbalagīla a bagabīji alībawīla, “Fumagi lūūlū ning'we ū mu mongo gwa Yolodani.”

¹⁸ A bagabīji būfuma ū mu mongo balībūūkije ī lisandīko lya būlagane bo ng'wa SEEBA. Aho batūūla dūhū ī mhambala jabo hasī nyūūmu, haho na haho a minzī ga mongo gwa Yolodani gūshoka ūmo giikalīlaga na kale, ū mongo gwenūyo gūtaala hangī gīt'ūmo gwaalī dūhū a ha kwandya.

¹⁹ A banhū bīnga a ha mongo gwa Yolodani mu lūshikū lw'ikūmi lwa ng'weji gwa kwandya, būlinha bajile Giligali būūkatūūla ng'hambī kwenūko, kīya ya Yeliko.

²⁰ Ū Yoshwa ūgatūūla Giligali a mawe ay'ikūmi na abīlī ayo baalī baagasola kūfuma mu mongo gwa Yolodani.

²¹ Hūna ūbawīla a Baisilaeli gīkī, “Ū kū shikū ja kū būtongi a banhū ba shibyalīlwe shing'we ūlū būbabūūja a babyaji babo, ‘A mawe genaya galī na makūlū kī ī gete?’

²² Mukūbawīla gīkī, ‘A Baisilaeli bakagūkīla ū mongo gwa Yolodani balīshimīza hasī nyūūmu.’

²³ Nguno ū SEEBA Mulungu wing'we akagūkamya ū mongo mu būtongi wing'we, kūshisha ng'ūkīla. Ū SEEBA Mulungu wing'we wītaga gīt'ūmo akīītīla kū Nyanza Yaaza, aho akagakamya a minzī gayo kūshisha tūūkīla.

²⁴ Ū gwenūyū wagwītaga kūlwa kūbamanīīkīja pye a banhū ba mu sī gīkī, ū nkono go ng'wa SEEBA gūlī na būdūla; na a bing'we mubize na logohano shikū jose ū kūlī SEEBA Mulungu wing'we.”