Yoshwa 19 - Bibilia Ilagano Lya Kale 2015

Sī ya lūganda lwa ng'wa Simioni

¹ Ī mbale ya kabīlī īkabagwīīla banhū ba lūganda lwa ng'wa Simioni, kūlenganīla nū mumo jalī ī ndūgū jabo. Ī sī ya wingīji wabo yūbiza ha gatī ya sī ya banhū ba lūganda lwa ng'wa Yuda.

² Ī mizengo īyo baalī nayo yaalī, Beelisheba (nūūlū Sheba), Molada,

³ Hazaali-shuali, Bala, Ezemu,

⁴ Elitoladi, Betuli, Holima,

⁵ Zikilagi, Beti-makoboti, Hazaali-susa,

⁶ Beti-lebaoti, na Shaluheni; mizengo ikūmi n'idatū, hamò na magūngūli gaho.

⁷ Aini, Limoni, Eteeli, na Ashani; mizengo īnè hamò na magūngūli gayo.

⁸ Na a magūngūli pye ayo gaalī gīpīndije ī mizengo yenīyī gaalī gabo, kūshisha ipaandī lya Balaati-beeli (h'ī Lama ya Negevu). Ū wenūbū hū walī wingīji wa banhū ba lūganda lwa ng'wa Simioni, kūlenganīla nū mumo jalī ī ndūgū jabo.

⁹ Ū wingīji wa banhū ba lūganda lo Simioni būkasolwa kūfuma mu sī ya wingīji wa banhū ba lūganda lwa ng'wa Yuda, nguno ū ngabo gwa banhū ba lūganda lwa ng'wa Yuda gwaalī gūkīlanīgije no ū būtaale. Na lūūlū a banhū ba lūganda lwa Simioni būpandīkīla nabo ng'wenūmo ū wingīji wabo.

Sī ya lūganda lwa ng'wa Zabuloni

¹⁰ Ī mbale ī ya kadatū yūbagwīīla banhū ba lūganda lwa ng'wa Zabuloni, kūlenganīla nū mumo jalī ī ndūgū jabo. Ū lūbīmbī lwa sī ya wingīji wabo lwalī lūshikile Salidi.

¹¹ Ū kūja ī ng'weli lūūshika Malala, lūbiza gītī lwakuumya Dabesheti, hūna lūūkolobela kūshisha kū longa lwa Yokineamu.

¹² Ū kwīnga ī Salidi lūūtūla kuluba kūlola kīya, lūūkabīmbīkanwa na sī ya Kisiloti-tabooli, lūūgoloola lūjile Dabeela, hūna lūūlinha kūja Yafia.

¹³ Longeja kūlola kīya dūhū, lūūkashika Gaati-hefa, na Eti-kazini; lūūpulukīla mu Limoni hūna lūūgalūka kūja Nea.

¹⁴ A henaho ū lūbīmbī lwenūlo lūūtūja lūlolile sukuma kūja Hanatoni, lūūkagelela mu sī ya ntubīlo gwa Ifateeli.

¹⁵ Ū mu sī yenīyo yalīmo mizengo ya Katata, Nahalalī, Shimuloni, Idala, na Betelehemu; mizengo ikūmi n'ībīlī, hamò na magūngūli gayo.

¹⁶ Ī mizengo yenīyī na a magūngūli gayo hū walī wingīji wa banhū ba lūganda lwa ng'wa Zabuloni, kūlenganīla nū mumo jalī ī ndūgū jabo.

Sī ya lūganda lwa ng'wa Isakaali

¹⁷ Ī mbale ī ya kanè yūbagwīīla banhū ba lūganda lwa ng'wa Isakaali, kūlenganīla nū mumo jalī ī ndūgū jabo.

¹⁸ Ū mu sī ya wingīji wabo baalī na mizengo īyī, Yezileeli, Kesuloti, Shunemu,

¹⁹ Hafalaimu, Shioni, Anahalati,

²⁰ Labiti, Kishioni, Ebezi,

²¹ Lemeti, Enganimu, Enihada na Beti-pazezi.

²² Ī sī yabo yalī ībimbīkanilwe na Tabooli, Shahazuma, na Beti-shemeshi; hūn'ū lūbīmbī lwabo lūūkakalīkīla ha mongo gwa Yolodani. Yalī mizengo ikūmi n'ītandatū hamò na magūngūli gayo.

²³ Ī mizengo yenīyī hamò na a magūngūli gayo hū yeene yalī ya wingīji wa banhū ba lūganda lwa Isakaali, kūlenganīla nū mumo jalī ī ndūgū jabo.

Sī ya lūganda lwa ng'wa Asheli

²⁴ Ī mbale ya kataano yūbagwīīla banhū ba lūganda lwa ng'wa Asheli, kūlenganīla nū mumo jalī ī ndūgū jabo.

²⁵ Ū mu sī ya wingīji wabo baalī na mizengo īyī, Helikati, Haali, Beteni, Akisafu,

²⁶ Alameleki, Amadi na Mishaali. Ū kū ng'weli ū lūbīmbī lwalī lūshikile kū lūgūlū lwa Kalimeeli na Shihooli-libunati.

²⁷ Hūna ū kūfuma ū kwenūko lūūgalūka kūlola kīya, kūja Beti-dagoni, lūūkikuumya na sī ya banhū ba ng'wa Zabuloni, hamò na sī ya ntubīlo gwa Ifateeli, hanuma lūūgalūka kūlola sukuma kūshisha Beti-emeki na Neieli, kūbītīla Kabūlī; lūūgūpama kū lūmoso ū nzengo gwenūyo.

²⁸ Hūna lūūlola Abudoni, Lehobu, Hamoni na Kana, kūjūshika Sidoni.

²⁹ Ū kūfuma kwenūko ū lūbīmbī lūūgalūka hangī kūlola Lama, kūīlīīla kū nzengo gwa Tilo ūyo gwalī gūpīndīlījiwe ndugu, hūna lūūgalūka hangī kūlola Hosa, lūūpulukīla kū Nyanza Nhaale. Lwalī lūkūbanīgije na mizengo ya Akizibu,

³⁰ Uma, Afeki na Lehobu, ī mizengo ī yose yalī makūmi abīlī, hamò na magūngūli gayo.

³¹ Ī mizengo yenīyī na a magūngūli gaho hū walī wingīji wa banhū ba lūganda lwa ng'wa Asheli, kūlenganīla nū mumo jalī ndūgū jabo.

Sī ya lūganda lwa ng'wa Nafutali

³² Ī mbale ya katandatū yūbagwīīla banhū ba lūganda lwa ng'wa Nafutali, kūlenganīla nū mumo jalī ī ndūgū jabo.

³³ Ū lūbīmbī lwabo lwalī lūfumile Helefu lūūkabītīla na kū mitī mitaale ya mu Zananimu, ipandī lya Adami-nekebi na Yabuneeli kūja Lakumu, lūūkakalīkīla ha mongo gwa Yolodani.

³⁴ Hama ū kūfuma ī Azinoti-tabooli lūūlola ng'weli dūhū lūūkapulukīla Hukoki; ū kū dakama lwikuumya na sī ya banhū ba ng'wa Zabuloni, ī ng'weli lwikuumya na sī ya banhū ba ng'wa Asheli, ī kīya lūūshika kū mongo gwa Yolodani.

³⁵ Ī mizengo yaamo īyo yalī īpīndīlījiwe ndugu yaalī Zidimu, Zeeli, Hamati, Lakati, Gineleji,

³⁶ Adama, Lama, Hazooli,

³⁷ Kedeshi, Edilei, Eni-hazooli,

³⁸ Yiloni, Migidaleeli, Holemu, Betanasi, na Beti-shemeshi. Yaalī mizengo ikūmi na kenda, hamò na magūngūli gayo.

³⁹ Ī mizengo yenīyī na a magūngūli gayo hū walī wingīji wa banhū ba lūganda lwa ng'wa Nafutali, kūlenganīla nū mumo jalī ī ndūgū jabo.

Sī ya lūganda lo Dani

⁴⁰ Ī mbale ya mpungatī yūbagwīīla banhū ba lūganda lo Dani, kūlenganīla nū mumo jalī ī ndūgū jabo.

⁴¹ Ū mu sī ya wingīji wabo baalī na mizengo īyī, Zola, Eshitaoli, Ili-shemeshi,

⁴² Shaalabini, Aijaloni, Itila,

⁴³ Eloni, Timuna, Ekuloni,

⁴⁴ Eliteke, Gibetoni, Baalati,

⁴⁵ Yehudi, Bene-belaki, Gati-limoni,

⁴⁶ Me-yakoni, na Lakoni, nī lipandī īlo lyaalī lyilolile na Yopa.

⁴⁷ Gwike a banhū ba lūganda lwa ng'wa Dani bakalemeelwa ū kwīlang'hana ī sī yabo, yūja na banishi; nabo būūkagūdumīla nzengo gwa Leshemu, būgūdima, būbabūlaga pye a banhū na ng'wene, gūbiza gwabo boi. Aho balenda ū mu nzengo gwa Leshemu, būgūgalūcha ī lina būgwitana Dani, kūlwa kūng'wizūkwa saabo nkūlū Dani.

⁴⁸ Ī mizengo yenīyī na a magūngūli gayo hū walī wingīji wa banhū ba lūganda lwa ng'wa Dani, kūlenganīla nū mumo jalī ndūgū jabo.

Sī ya wingīji bo ng'wa Yoshwa

⁴⁹ Aho baamala ū kwīgabanhya ī sī kūlenganīla na a kahelelwe ka wingīji wabo, a Baisilaeli būng'winha nang'hwe ū Yoshwa ng'wana Nuni wingīji wakwe, nang'hwe ūpandīka wingīji hamò nabo,

⁵⁰ gīt'ūmo SEEBA walī walagīja; būng'winha ū nzengo ūyo akagūlomba, nzengo gwa Timuna-seela, gwa mu sī ya magūlya ya Efulaimu, ūūgūzenga būpya wikala mo.

⁵¹ Ī jenīji h'ī sī ja wingīji ījo ngabīji Elieza hamò na Yoshwa ng'witūnja o ng'wa Nuni bakajigabanhya, mu kūgunanhwa na batongeeji ba ndūgū ja Baisilaeli. Baajigabanhya balī Shilo, bo kūtūmamīla mbale kū būtongi bo ng'wa SEEBA, ha nyango gwa kwingīlīla ng'wiheema lya kwibilingīla. Būgūmala ū nīmo gwa kwīgabanhya ī sī.