Yoshwa 18 - Bibilia Ilagano Lya Kale 2015

Kūmalīīja kūgabīla banhū wingīji wabo

¹ Hanuma ya kwīdima na kwīīsuga pyī ī sī, a Baisilaeli a bose bakikuminga kū nzengo gwa Shilo, būlyīmīlīcha kwenūko ī liheema lya kwibilingīla.

² Gwike baalīho banhū ba mu ng'anda mpungatī ja Baisilaeli, abo baalī bataalī ū kwanukūla ū wingīji wabo.

³ Hūna ū Yoshwa ūbawīla a Baisilaeli gīkī, “Mukwikala mulī bagokolo gīkī kūshisha nanalī, hū ng'wingīle kwīdima ī sī īyo SEEBA Mulungu wa bakūlūgenji bing'we wang'winha?

⁴ Solanhyagi banhū badatū badatū kūfuma būlī lūganda; nabatūme baje bakwīlolaga chiza ī sī, pyī ī mihayo īyo balayībone moi baje bakwīyandīkaga, gīt'ūmo būlī wingīji wa būlī lūganda lwa banhū; hūna bize hangī kūlī nene.

⁵ Ī sī mukwīgabanhya mapandī mpungatī. Ī Yuda yene īkwikala ū ng'wipandī lyaayo ū kū dakama, ī numba yang'wa Yosefu nayo ū ng'wipandī lyaayo ū kū sukuma.

⁶ Ūlū ng'ūmala ū kwīyandīka ī mihayo īyo mulīībone ū mu mapandī ga sī ayo mpungatī genayo, nenhelagi aha namutūlīgīje mbale kū būtongi bo ng'wa SEEBA Mulungu wise.

⁷ Gwike a Balawī yaya ū kūsola ū wingīji hamò ning'we, nguno ū nīmo gwa būgabījibo ng'wa SEEBA hū gūlī wingīji wabo. Hama a banhū ba lūganda lwa ng'wa Gaadi nū lwa ng'wa Lubeni, nī nusu ya lūganda lwa ng'wa Manase baamala kwanukūla ū wingīji wabo ū kū kīya ya mongo gwa Yolodani. Ū Musa ū ntamami o ng'wa SEEBA akabinha.”

⁸ A banhū benabo aho beegeela kwīnga baje bakwīlolaga ī sī, ū Yoshwa ūbakomeleja alībawīla, “Jaagi ng'wīlola chiza gete ī sī, ng'wandīke pyī ī mihayo īyo mulīībone. Hūna mushoke kūlī nene kūūnū Shilo, nize namutūlīgīje mbale kū būtongi bo ng'wa SEEBA.”

⁹ Na ng'hana a banhū benabo bīnga, būja hose hose pyī ū mu mizengo ya sī yenīyo. Pyī ī mihayo īyo bīībonaga bīyandīka mu shitabo, bīīgabanhya mu magele mpungatī; hūna būshoka ū kū ng'hambī ī Shilo ū kūlī Yoshwa.

¹⁰ Ī Shilo kwenūko, ū Yoshwa ūbatūlīgīja mbale kū būtongi bo ng'wa SEEBA; ūbagabanhya a Baisilaeli ī sī alī henaho, a bose būpandīka kūlenganīla na wingīji bo ng'anda jabo.

Sī ya lūganda lwa ng'wa Benjamini

¹¹ Aho yabagwīīla ī mbale a banhū ba lūganda lwa Benjamini kūlenganīla na ndūgū jabo, yūbatūūla ha gatī ya sī ya banhū ba lūganda lwa ng'wa Yuda na lwa ng'wa Yosefu.

¹² Ū lūbīmbī lwabo ū kū sukuma lwandīja kū mongo gwa Yolodani, lūūbītīla kū ntulumenho gwa Yeliko, lūūlola ng'weli kū sī ya magūlya; lūūkanyamuka hangī kwiza kūshika ng'witogolo lya Beti-aveni.

¹³ Ū kūfuma ū kwenūko lūūtīna lūjile kū ntulumenho gwa sī ya Luzu (nūūlū Beeteli), hūna lwika lūlolile Atalooti-ada kū dakama ya ngūlya gwa Beti-holoni.

¹⁴ Ū kūfuma ū kū ngūlya ūyo gwilolile na Beti-holoni ī lipandī lya dakama, ū lūbīmbī lūūtūja lūjile dakama lūkūsīngījaga kūja ng'weli lūūkapulukīla Kiliati-baali (nūūlū Kiliati-yelimu). Ū gwenūyo gwaalī nzengo gwa banhū ba lūganda lwa Yuda. H'ū lūbīmbī lwa kū ng'weli ū lwenūlo.

¹⁵ Ū lūbīmbī lwa dakama lwaalī bbihī na nzengo gwa Kiliati-yelimu ū kū ng'weli yaho; ū kwīnga a henaho lūūgoloola lūjile kūshisha lūūkapulukīla kū nzwinzī ja minzī ga Nefutoa.

¹⁶ Lūūlūmbūlīla lwikile sīlīlī ya ngūlya gwa kwika kū ntubīlo gwa Beni-hinomu kū sukuma ya Lefaimu. Lūja nago ū ntubīlo gwa Hinomu, lūkūsīngījaga ntulumenho gwa dakama ya nzengo gwa Bayebusi; lūūkashika Eni-logeeli.

¹⁷ Ū kūfuma a henaho lūūtūja lūjile sukuma kūshisha Eni-shemeshi; lūūbītīlīja kūja Geliloti, īyo yilolile na nzīla ya Adumimu, hūna lwika kūja kwiwe lya ng'wa Bohani ng'witūnja o ng'wa Lubeni.

¹⁸ Lūūlūmbūlīla na ntulumenho gwa kūlola sukuma kūja Alaba, lūūkashikīīla ū mu Alaba yenekīlī.

¹⁹ Hama hangī ū lūbīmbī lwenūlo lūūlola sukuma kūīlīīla kū ntulumenho gwa Beti-hogila, lūūkapulukīla kwikondo lya sukuma ya Nyanza ya Munhu; dakama ya mongo gwa Yolodani, aho gwingīlīlile ū mongo gwenūyo. Ū lwenūūlū hū lwalī ū lūbīmbī lwa dakama.

²⁰ Ū lūbīmbī lwa kū kīya ū lwene gwalī ū mongo gwa Yolodani. Ī jenīji h'ī mbīmbī ījo jalī jīpīndīlīgije hose hose ī sī īyo bakinhwa banhū ba lūganda lwa ng'wa Benjamini kūbiza wingīji wabo, kūlenganīla nū mumo jalī ī ndūgū jabo.

²¹ Ī mizengo ya banhū ba lūganda lwa ng'wa Benjamini, kūlenganīla nī ndūgū jabo yaalī īyī, Yeliko, Beti-hogila, Emekezizi,

²² Beti-alaba, Zemalaimu, Beeteli,

²³ Avimu, Pala, Ofula,

²⁴ Kefaali, Amoni, Ofini, na Geba; mizengo ikūmi n'ībīlī, hamò na magūngūli gayo.

²⁵ Gibeoni, Lama, Beeloti,

²⁶ Misipa, Kefila, Moza.

²⁷ Pekemu, Ipeeli, Talala,

²⁸ Zela, Haelefu, nzengo gwa Bayebusi (h'ī Yelusalemu), Gibea na Kiliati; mizengo ikūmi n'īnè, hamò na magūngūlī gayo. Ū wenūbū hū walī wingīji wa banhū ba lūganda lwa Benjamini kūlwa ndūgū jabo pyī ī jose.