Yoshwa 11 - Bibilia Ilagano Lya Kale 2015

Batemi ba sukuma kwikobya

¹ Ū ntemi Yabini wa Hazooli aho wīyiigwa ī yīnīyī, ūtūma nhūng'wa kūlī ntemi Yobabu wa Madoni, na kū batemi ba Shimuloni na Akishafu;

² na kū batemi ba sī ja kū ngūlū ja sukuma, na ba mapandī ga Alaba dakama ya Gineleji, na ba mapandī ga kū sī ja mitulumenho ya ngūlū ja ng'weli, na mapandī ga Dooli, kū mbalama ya Nyanza ya ng'weli.

³ Nū kū Bakanaani ba kū kīya na a ba kū ng'weli, a Baamooli, Bahītī, Bapelizi, nū ū kū Bayebusi ba kū sī ya magūlya, nū kū Bahīvī ba kū ntulumenho gwa lūgūlū lwa Helimoni, mhandī ja Mispa.

⁴ Pye a benaba biza nago a mabità gabo a gose, hamò na falasa na magogoteni mingī no; lyalī ibità itaale no gītī maseni ga ha ng'walo gwa nyanza.

⁵ A batemi bose benaba bisangīja lyūbiza ibità līmò, būtūūla ng'hambī īmò kū minzī ga Meloomu, bandya kwibeeja beeja kūlwa kwilwisha būlūgū na Baisilaeli.

Batemi ba sukuma kūpyenwa

⁶ Alīyo ū SEEBA ūng'wīla ū Yoshwa gīkī, “Yaya ū kūbogoha a benabo, nguno ī ntondo ikanza gītī īlī, nene ng'wenekīlī nakūbatūūla mu makono ga Baisilaeli; bakūcha pye a bose. Ī falasa jabo ūkūjitīna a matimba, hama a magogoteni gabo ūgapemba mu moto.”

⁷ Hūna ū Yoshwa ūja kūbadumīla alī nī libità lyakwe, ūbasanga balīko ī Meloomu ū kū minzī; ūbifumbūkīja batamanile.

⁸ Ū SEEBA ūbatūūla mu nkono gwa Baisilaeli, būbatūla būbapyena, būboolomya nhambo kūja Sidoni na Miselafoti-maini, na kū mbūga ya ntubīlo gwa Mispa ya kīya; būbabūlaga pye atasaagile mpanga nūūlū ūmò.

⁹ Ū Yoshwa ūbīītīla gīt'ūmo SEEBA walī walagīla, ī falasa jabo ūjitīna a matimba, na a magogoteni gabo ūgapemba moto.

¹⁰ Ī likanza lyenīlo ū Yoshwa ūgūgalūkīla na nzengo gwa Hazooli, ūgūdima, ū ntemi wa ng'wene ūmūlaga. Ū nzengo gwa Hazooli gwalī ntaale ū mu mabūtemi ga mhaandī jenījo.

¹¹ A bikaji ba mu nzengo gwenūyo pyī būbabūlaga na līlūshū. Pye gete ūbayagaja, atalekeelile nūūlū shimò ī sha kwesheema ū mu nzengo gwa Hazooli; nū nzengo gwenekīlī ūgūpemba moto.

¹² Nī mizengo ya batemi a bangī ū Yoshwa wīdima, ūbabūlaga a batemi baamo; akabakenaagūla pye gete gīt'ūmo Musa ntūmami o ng'wa SEEBA walī walagīīlīla.

¹³ Gwike a Baisilaeli batīīpembile moto ī mizengo īyo yalī īzengilwe ha maashilugu gabo; ūlū ītī gwa Hazooli dūhū, ūyo Yoshwa akagūpemba moto.

¹⁴ Ī shisonzwa sha kūfuma mu mizengo yenīyo pyī nī mitugo, būsola ī shose a Baisilaeli kūbiza sabo yabo, alīyo a banhū būbabūlaga būbamala pye gete, batalekeelile nūūlū ūmò wikale akwesheemaga.

¹⁵ Ūmo SEEBA akanagīīla ntūmami wakwe Musa, nū Musa nang'hwe hū ūmo akanagīīlīīla ū Yoshwa; hama ū Yoshwa nang'hwe ūshikīlīja; atalekeelile mhayo nūūlū gūmò ūyo SEEBA walī wanagīīla Musa.

Kūmalīīja kwīdima Kanaani ya sukuma

¹⁶ Na lūūlū ū Yoshwa ūbiza wīdima pyī ī sī yenīyo, ī sī ya magūlya nī Negevu, nī mhandī ja Gosheni, nī sī ja mitubīlo ya kū ngūlū ja ng'weli, nī Alaba, nī ngūlū ja Isilaeli nī mitulumenho yaajo.

¹⁷ Ūdima kwandīja kū lūgūlū lwa Halaki ūlo lwandīgije mhandī ja Seili, kūja Baali-gadi, kū malago ga Lebanoni ga kū sīlīlī ya Helimoni. Akabadima pye a batemi ba mhandī jenījo, ūbatūla pyī ūbabūlaga.

¹⁸ Ū Yoshwa akamala ikanza lya shikū ningī akwilwishaga būlūgū nabo a batemi bose benaba.

¹⁹ A bose benaba batabeegije ilagane lya mhola na a Baisilaeli, ūlū batī Bahīvī ba Gibeoni dūhū; a bangī pye būbiza baakūding'wa mu būlūgū.

²⁰ Nguno ū SEEBA walī wabinha ng'holò ndiimu, gīkī abakenaagūle mu nzīla ya kwilwisha būlūgū na a Baisilaeli; abamale pye gete, yaya nūūlū kūbachīla shigongo; gīt'ūmo SEEBA walī wanagīīlīla Musa.

²¹ Ū ng'wikanza lyenīlo ū Yoshwa ūbasanga kūbayagaja nabo a Baanaki abo bikalaga kū sī ja magūlya ga, Hebuloni, Debili na Anabu, na kūfuma kū sī ja magūlya ga Yuda; na a ba mu sī ja magūlya ī jose ī ja mu Isilaeli. Ū Yoshwa ūbakenaagūla gete pye a bose nī mizengo yabo.

²² Atalekeelile Baanaki bose bose ū mu sī ya Isilaeli; bakalekeelwa ba Gaza dūhū, na Gaasi, na Ashidodi.

²³ Na lūūlū ū Yoshwa ūbiza wīsola ī sī ī yose, gīt'ūmo walī wanagīīlīla Musa; wīgabanhya kūbiza wingīji ū kū Baisilaeli kūlenganīla nū mumo jilī ī ng'anda jabo. Hūna ī sī yūlembeela ū mu mihayo ya būlūgū.