Yoshwa 1 - Bibilia Ilagano Lya Kale 2015

SEEBA Kūnagīla Yoshwa

¹ Ū Musa ū ntūmami o ng'wa SEEBA aho waacha, ū SEEBA ūng'wīla ū Yoshwa ng'witūnja o ng'wa Nuni, na ntūmami o ng'wa Musa; ūhaya gīkī,

² “Ū ntūmami wane ū Musa wazumalīkile, alilūūlū ū bebe na a banhū benaba, ibeeja beejagi mugūkīle ū mongo gwa Yolodani, muje ū mu sī īyo nalībinha a banhū benaba, a Baisilaeli.

³ Būl'ipandī īlo mukūlīpanda na mhambala jing'we nakūng'winha lībize ling'we, gīt'ūmo nakang'wisagīja Musa.

⁴ Ū lūbīmbī lwing'we lūkūbiza kwandīja kwitogolo na sī ya Lebanoni kūshisha ū kū mongo ntaale, ū gwa Flati. Ī sī ya Bahītī ī yose īkūbiza ying'we, kūshisha kū būgwa līīmi, ū kū nyanz'ī nhaale.

⁵ Atīho munhū nūūlū ūmò, wa kūdūla kūkūchaama pyī ū mu shikū ja būlamu wako. Nakūbiza hamò nang'ho gīt'ūmo naalī hamò na Musa; natīko kūkūlekanīja nūūlū kūkwīība.

⁶ Ū bebe, īdadīlage dūhū ūtimbye ng'holò, nguno ūkūbatongeela a banhū benaba bingīle ū mu sī ya wingīji wabo īyo naabilahīlīla bakūlūgenji babo gīkī nakūbinha.

⁷ Idadīlage dūhū ū bebe ūtimbye ng'holò; hama ūbize ng'welwa ng'holò ū kūshimizīla ū mu shilagīlo īsho ntūmami wane Musa wakwinha. Yaya gete ū kūshileka ūgalūkīle kū būlyo nūūlū kū lūmoso, ūpandīke kwīlūkīlwa būlī kwene ūko ūlaaje.

⁸ Ī shitabo shenīshi, ī sha shilagīlo, yaya ū kūshileka nose shīnge ū mu nomo gwako. Shiideedeeng'hanyage līīmi na būjikū, hūna ūkūdūla kūbiza ndeeba ū mu kwīshikīlīja pyī īyo yandīkilwe mo. Ū mu gīko ūkūbiza na mbango, nīyo nī mihayo yako īkūja chiza.

⁹ Angū natakūlagīlile nene? Bebe ng'wene idadīlage dūhū, hangī ūtimbye ng'holò. Yaya ū kūdetema nūūlū kogoha; nguno ū SEEBA Mulungu wako akūbiza hamò nang'ho būlī kwene ūko ūkūja.”

Kūlagīlwa kwigolanya kūlwa kūkīla mongo

¹⁰ Ū Yoshwa ūbalagīla a bagunanhi ba banhū alīhaya,

¹¹ “Bītagi hose pyī ū mu ng'hambī muje mukūbawīlaga a banhū gīkī, ‘Golanyagi ī mhamba jing'we, nguno ūlū jūbīta shikū idatū mukūgūkīla ū mongo gwa Yolodani gwenūyū; nīyo mukūgūkīlīla henaha aha, muje mukīdiime ī sī īyo SEEBA Mulungu wing'we alīng'winha kūbiza ying'we.’”

¹² Alīyo a ba lūganda lwa Lubeni nū lwa ng'wa Gaadi, nī nusu ya lūganda lwa Manase, ū Yoshwa ūbawīla gīkī,

¹³ “Shiizūkagwi ī shilagīlo īsho Musa ntūmami o ng'wa SEEBA akang'winha alīhaya, ‘Ū SEEBA Mulungu wing'we akūng'wifuuja, nī sī yenīyī alīng'winha.’

¹⁴ Na lūūlū a bake bing'we na a baana bing'we h'abo bakūsaaga ū mu sī īyo Musa wang'winha kū kīya ya mongo gwa Yolodani; bakūsaaga nī mitugo jing'we. Alīyo pye a bagosha ba nguzu abo balīmo ū mu bing'we shibigeleelilwe basole shilanga, bakīle hamò na a badūgū bing'we.

¹⁵ Kūshisha ū SEEBA abinhe nabo kwifuula gīt'ūmo wang'winhīlile a bing'we; kūshisha nabo bīsole ī sī īyo SEEBA Mulungu wing'we alībinha. A hanuma ya yenīyo hū mukūja lūūlū na a bing'we ū kū sī ying'we īyo wang'winhile Musa ntūmami o ng'wa SEEBA; īyo īlī kū kīya ya mongo gwa Yolodani, ū kū būfuma līīmi.”

¹⁶ Nabo būnshokeja ū Yoshwa balīhaya gīkī, “Būlī mhayo ūyo watūlagīlaga kūgwīta tūkūgwīta, na būlī kwene ūko ūlatūtūme tūkūja.

¹⁷ Ūmo twang'wigwīlaga Musa mu būlī mhayo, nū bebe tūkūkwigwa gīko. Ū SEEBA Mulungu wako ni abizage hamò nang'ho dūhū, gīt'ūmo walī hamò na Musa.

¹⁸ Ose ose ūyo ūshilema ī shilagīlo shako, ūlema ū kwīyigwa ī mihayo yako yose yose īyo ūkūlagīla yītwe, ū ng'wenūyo akūbūlagwa. Ū bebe ng'wene idadīlage dūhū ūtimbye ng'holò!”