Yohana 9 - Bibilia Ilagano Lya Kale 2015

¹ Aho ajile, ūmona munhū walī mboku kūfuma kūbyalwa kwakwe.

² A bahemba bakwe būmūja gīkī, “Rabi nani ūyo akīīta shibi nose ū munhū ng'wenūyū ūbyalwa mboku, wei ng'wenekīlī, nūūlū babyaji bakwe?”

³ Ū Yesu ūshosha ūhaya, “Ndūhū ūyo akīīta shibi; atī wei nūūlū batī babyaji bakwe. Alīyo kūlwa gīkī, ū mulī we yoolechiwe milīmo ya ng'wa Mulungu.

⁴ Shitwigeleelilwe kwītūmama ī milīmo yakwe ūyo anitūmile aho ītaalī līīmi; būkwingīla būjikū aho munhū ose ose atūdūla kūtūmama.

⁵ Ū nene aho nataalī mu sī, nalī Isana lya mu sī.”

⁶ Aho wīhaya ī mihayo yenīyo ūswa mate ha sī, ūbeeja malongo; a malongo genayo umila u bulolo wenubo ū munhū ng'wenūyo kū miso.

⁷ Huma ūng'wīla gīkī, “Jaga ūkilugute kwilambo lya Siloamu;” (makūlū gaho: Watūmagwa). Ng'hana ūja ūūkiluguta, ūshoka alībona.

⁸ A bazenganwa na a babo bamonaga kwīngīīla kale gīkī walī ng'wilombeleja bandya kūhaya, “Bing'we ū munhū ng'wenūyū atī ng'wene ūyo olikalaga igashije akwilombelejaga?”

⁹ Bangī būyūhaya, “Hū ng'wene,” bamò, “Yaya atī ng'wene, ikolile nang'hwe dūhū.” Hūna ū wei ng'wenekīlī ūhaya gīkī, “Nalī ng'wene!”

¹⁰ Būmūja, “Galoleechaga ginehe a miso gako?”

¹¹ Nang'hwe ūbawīla, Ū munhū ūyo akitanagwa Yesu walī wabeeja bulolo unibila a ha miso gane, hūna ūniwīla gīkī, ‘Jaga kū Siloamu ūkilugute;’ nūja nūkiluguta, nandya kūbona!”

¹² Nabo būmūja, “Alī halī ū munhū ng'wenūyo?” Nang'hwe ūhaya, “Natamanile!”

¹³ Ūyo walī mboku ng'wenūyo nose būntwala kū Bafalisayo,

¹⁴ nguno ū Yesu aho akabeeja malongo ūgafumbūla a miso gakwe, lwalī lūshikū lo sabato.

¹⁵ Hūna a Bafalisayo būmūja nabo hangī, ūmo īkajīla nose wandya kūbona. Nang'hwe ūbawīla gīkī, “Walī wanibila bulolo a ha miso gane nūkiluguta nandya kūbona.”

¹⁶ Bamò ba Bafalisayo būyūhaya gīkī, Ū munhū ng'wenūyū atafumile kūlī Mulungu, h'ī chene atūshidīlīlaga ī shilagīlo sha sabato.” Alīyo bangī būyūhaya, Ū munhū wa shibi adūgije kūbeeja shimanīkījo shilī gīkī?” Būbiza ho wikīla kīji a ha gatī yabo.

¹⁷ Hūna būmūja hangī ūyo walī mboku; gīkī, “Ī gīsī, ū bebe ūlīng'wiganikīla ginehe ū munhū ng'wenūyo īkī wafumbūlaga miso gako?” Nang'hwe ūhaya, “Ng'hangi ū ng'wenūyo!”

¹⁸ A Bayudaya batazunije ī gīkī walī mboku ī kwandya hanuma wandya kūbona, kūshisha būbitana a babyaji bakwe ūyo akinhwa kūbona ng'wenūyo.

¹⁹ Būbabūja balīhaya gīkī, “Angū ū ng'wenūyū na ng'wene ū ng'witūnja wing'we ūyo mukūhayaga gīkī wabyalwa mboku? Al'ī haha yajaga ginehe nose alībona?”

²⁰ Nabo a babyaji bakwe būshosha būhaya, “A bise tūmanile gīkī ū ng'wenūyū ng'witūnja wise, nī gīkī walī mboku kūfuma kūbyalwa kwakwe.

²¹ Alīyo ūmo yajīlaga nose ī haha alībona, tūtamanile. Nū yūyo wagafumbūlaga a miso gakwe tūtaamanile; mūjagi akūhaya wei ng'wenekīlī īkī ntaale.”

²² A babyaji bakwe baalī babogoha a Bayudaya, nguno a Bayudaya baalī balya gwīnda, bizunīlīja gīkī munhū ose ose ūlū ūlinda ūhabūla kūhaya gīkī ū Yesu hū ng'wene ū Kilisito, akūkīndīkwa; afunyiwe ū ng'wisinagogi.

²³ H'ī nguno yene a babyaji bakwe bakahaya gīkī, “Mūjagi wei ng'wenekīlī īkī ntaale!”

²⁴ Hūna būng'witana hangī lūkangala lo kabīlī ū munhū ūyo walī mboku ng'wenūyo. Būng'wīla gīkī, “Bebe ng'ogohage Mulungu, a bise tūmanile gīkī ū munhū ng'wenūyū alī na shibi!”

²⁵ Nang'hwe ūbashokeja alīhaya, Ū nene natamanile ī gīkī alī na shibi, namanile mhayo gūmò dūhū, gīkī naalī mboku; alīyo ī haha nalībona!”

²⁶ Hūna būnkomela kūmūja gīkī, “Walī wakwītīla mhayo kī ī gete? Wagafumbūlaga ginehe a miso gako?”

²⁷ Ūbashokeja gīkī, “Angū namala kūmuwīla haha dūhū ng'ūlema ū kūnidegeleka, nibūlī mulītogwa kwigwa hangī? Ī gete hamo ning'we mulīkooba kūbiza bahemba bakwe shi?”

²⁸ Būnfīkīlīja balīhaya gīkī, Ū bebe angū hū ūlī ng'hemba wakwe ū munhū ng'wenūyo; a bise tūlī bahemba ba ng'wa Musa.

²⁹ Tūmanile gīkī ū Mulungu walūngalūngaga nū Musa; lelo ū munhū ng'wenūyo, ū ng'wene tūtamanile nū kūko afumile nīyo!”

³⁰ Ū munhū ūyo walī mboku kwandya ūbashokeja alīhaya, “Yee! Alīyo būlī, ū gwenūyū mhayo gwa kūkumya no, gīkī mutamanile ūko afumile, alīyo wafumbūlaga miso gane ū nene!

³¹ Tūmanile gīkī ū Mulungu atabigwaga a banhū ba shibi, alīyo ū munhū ūlū ūng'ogoha Mulungu na ūbiza nshikīlīja wa mihayo īyo ayītogilwe, ū ng'wenūyo akūng'wigwa.

³² Kūfuma kwandya na kwandya, gūtaalī kwigwiwa gwa gīkī munhū wafumbūla miso ga mboku kwīngīīla kūbyalwa kwakwe.

³³ Ū munhū ng'wenūyū ūlū ni walī atafumile kūlī Mulungu, ni atadūgije kwīta mhayo gose gose!”

³⁴ Bahayūshosha būng'wīla gīkī, Ū bebe angū nīyo wabyalīlwa mu shibi, nang'ho ūdūgije kūtūlanga mhayo kī a bise?” Būmpeeja, būnkīndīka na kūnkīndīka!

³⁵ Ū Yesu akigwa gīkī bampeegije ū munhū ng'wenūyo. Aho wamona ūng'wīla gīkī, “Bebe wanzunije ū Ng'wana wa Munhū?”

³⁶ Nang'hwe ūshosha ūhaya, “Ni nani shi baba nanzunye?”

³⁷ Nang'hwe ū Yesu ūng'wīla, “Wamonaga nguno ūyo alīyomba nang'ho hū ng'wene!”

³⁸ Nang'hwe ūhaya, “Nazunyaga Seeba!” Winama ūnamya.

³⁹ Hūna ū Yesu ūhaya gīkī, Ū nene nizile kūbalekanya a ba mu sī; a babboku bayūbona, abo bakūbonaga babbokule!”

⁴⁰ Bamò ba Bafalisayo abo baalī nang'hwe aho bīyigwa ī yenīyo būng'wīla, “Bebe hū kūhaya gīkī na a bise tūlī babboku?”

⁴¹ Nang'hwe ū Yesu ūbawīla, Ūlū ni mulī babboku ni mutī na shibi; alīyo ī haha īkī mukwihayaga gīkī, ‘Tūkūbonaga’ mukwikala na shibi shing'we!”