Yohana 8 - Bibilia Ilagano Lya Kale 2015

¹ Alīyo ū Yesu ūja kū lūgūlū lwa mizeituni.

² A ha ntondo yaho ī dilū wiza hangī ū mu hekalu; na a banhū pye a bose biza ū kūlī we, nang'hwe wigasha wandya kūbalanga.

³ Kūhayimanīla balangi ba shilagīlo na Bafalisayo bang'wenha nkīma nebe, walī wasangīlijiwa mu būshihani ūding'wa; aho bashika būng'wīmīlīja kū būtongi wa banhū.

⁴ Hūna būng'wīla ū Yesu gīkī, “Nangi ū nkīma ng'wenūyū wasangīlijiwa gwa mu būshihani.

⁵ Alīyo ū mu shilagīlo, ū Musa atūlagīlile kūyūbabūlaga bo kūbaponda mawe a ba mbika yenīyī; al'ū bebe ūlīhaya ginehe?”

⁶ Ū mhayo gwenūyū bakagūhaya gīkī bapandīkīle ho nguno ya kūnsola būbi. Alīyo ū Yesu winama dūhū, wandya kwandīka ha sī na lwala lokwe.

⁷ Aho bongeja no no no ū kūngaagaanīla, nose ūgūngūmūka ūbawīla gīkī, Ūyo atī na shibi ū mu bing'we ni andyage ū kūmponda ī liwe.”

⁸ Winama hangī ongeja ū kwandīka a ha sī.

⁹ Aho bigwa gīko bandya kūfuma hanze ūmò ūmò, kwandīja a banamhala; nose ūsaaga wei iyene nū nkīma aho walī īmīīlile.

¹⁰ Wahayūgūngūmūka ū Yesu ūmūja, “Baja halī mayū, atigelile nūūlū ūmò wa kūkwinha nsango?”

¹¹ Nang'hwe ūhaya, “Atigelile baba!” Hūna ū Yesu ūng'wīla, “Jaga nū nene natūkwinhaga nsango; gwike ūtizīīta shibi hangī kūfuma lelo.”]

¹² Ū Yesu wandya hangī kūbawīla alīhaya gīkī, Ū nene nalī Isana lya ba mu sī; ū wa kūnilondeela atūshimīzīla mu giiti, alīyo akūbiza n'isana lya būpanga.”

¹³ A Bafalisayo būng'wīla, Ū būkaanīji wako ū bebe būtī bo ng'hana, nguno ūkwikaanīlaga bebe ng'wenekīlī.”

¹⁴ Nang'hwe ū Yesu ūshosha ūbawīla gīkī, Ū nene nūūlū nikaanīla ng'wenekīlī, ū būkaanīji bone būlī bo ng'hana, nguno namanile ūko nafumile nū kūko najile; al'a bing'we mutamanile ūko nafumile nū kūko najile.

¹⁵ A bing'we mukalamulaga banhū bo kūtūmamīla masala ging'we dūhū, alīyo ū nene natalamulaga munhū nūūlū ūmò.

¹⁶ Hama nūūlū nūlamula nahene, nakatūngīlījaga nguno natī iyene, alīyo ū Baba ūyo anitūmile alī hamò nū nene.

¹⁷ Nū mu shilagīlo shing'we handīkilwe gīkī, ū būkaanīji bo banhū babīlī būlī bo ng'hana.

¹⁸ Ū nene ī chene nalikaanīla ng'wenekīlī, alīyo nū Baba ūyo anitūmile, nang'hwe akūnikaanīlaga.”

¹⁹ Hūna būmūja gīkī, “Ni alī halī ū so?” Nang'hwe ū Yesu ūshosha, “A bing'we īkī mutanimanile ū nene, nū Baba mutūdūla ū kūmana; alīyo ūlū ni munimanile ū nene, ni mumanile nū Baba.”

²⁰ Ī mihayo yenīyī aho alīyīhaya, walī mu hekalu walangaga mu chumba sha kūbīkīla sabo; alīyo atigelile nūūlū ūmò wa kūndima. Nguno ī likanza lyakwe lyalī lītaalī ū kūshika.

²¹ Hūna ūbawīla hangī gīkī, Ū nene nalīnga; mukūnikooba no, alīyo mukūchīla mu shibi shing'we dūhū, ūko najile mutūdūla a bing'we ū kwiza ko.”

²² A Bayudaya bandya kūhaya gīkī, “Kolaga hamo alīhaya kwibūlaga shi, nibūlī akwikalaga ūhaya gīkī, ‘Ūko najile mutūdūla a bing'we ū kwiza ko?’”

²³ Nang'hwe ūbawīla hangī gīkī, “A bing'we bene mulī ba ha sī, ū nene nalī wa kwigūlya, mulī ba mu sī, ū nene natī wa mu sī.

²⁴ H'ī nguno yene nalīmuwīla gīkī mukūchīla mu shibi shing'we; nguno ng'hana mukūchīla mo ū mu shibi shing'we ūlū mutazunije gīkī ū nene hū Nalī Ng'wene.”

²⁵ A henaho būmūja gīkī, “Ī gete ū bebe, ūlī nani?” Nang'hwe ū Yesu ūbawīla, Ū nene namalaga kūmuwīla kwīngīīla ha wandījo!

²⁶ Nīyo nalī nayo mingī ī ya kūmuwīla na kūmulamula, alīyo īkī ūyo anitūmile alī wa ng'hana, nū nene nakwīhayaga ū mu sī īyo nakwīyigwaga kūfuma kūlī we.”

²⁷ Batitegelegije ī gīkī wabawīlaga ya ng'wa Ise.

²⁸ Hūna lūūlū ū Yesu ūbawīla gīkī, Ūlū mulansunge higūlya ū Ng'wana wa Munhū, hū mukūmana gīkī Nalī Ng'wene, nī gīkī natīītaga mhayo gose gose nene ng'wenekīlī dūhū. Alīyo nakūhayaga gīt'ūmo Baba akūnilangīlaga.

²⁹ Nguno ūyo anitūmile alī hamò nane; atanilekile iyene, īkī pye a makanza nakīītaga īyo yīnyegije wei.”

³⁰ Aho wīyomba ī mihayo yenīyī bingī bakanzunya.

³¹ Hūna ū Yesu ūbawīla a Bayudaya abo bakanzunya gīkī, Ū mhayo gwane ūlū gwikala ū mu bing'we, mukūbiza bahemba bane.

³² Hama mukwimana ī ng'hana, nīyo ī ng'hana yenīyo īkūng'wīnja ū mu būsese.”

³³ Būnshokeja gīkī, “A bise tūlī ba lūganda lo ng'wa Abulahamu, tūtaalī kūbiza basese ba ng'wa munhū nūūlū ūmò na hado yaya. Ni ginehe ūlīhaya gīkī tūkwīnjiwa mu būsese?”

³⁴ Ū Yesu ūbashokeja alīhaya, “Nalīmuwīla gwa ng'hana gīkī, būlī munhū ūyo akīītaga shibi, ū ng'wenūyo nsese wa shibi.

³⁵ Hama ū nsese atī ng'wikaji wa ha kaya, ū ng'wana hū ng'wikaji wa ha kaya wa shikū jose.

³⁶ Hūna lūūlū ū Ng'wana ūlū ūng'winha wiyabī, mukūbiza mu wiyabī ng'hana.

³⁷ Namanile gīkī mulī ba lūganda lo ng'wa Abulahamu; alīyo mulīkooba kūnibūlaga, nguno ū mhayo gwane gūtīmo ū mu bing'we.

³⁸ Ū nene nakūhayaga īyo nakwībonaga kūfuma kūlī Baba, na a bing'we mukwītaga īyo mukigwaga kūfuma kūlī sīng'we.”

³⁹ Būnshokeja balīhaya gīkī, “A bise ū sīswe Abulahamu.” Nang'hwe ū Yesu ūbawīla, Ūlū ni mulī baana ba ng'wa Abulahamu, ni mukwītaga ī milīmo ya ng'wa Abulahamu.

⁴⁰ Ī gīsī ī haha mulīhaya kūnibūlaga, alīyo ū nene nalīmuwīla ya ng'wa ng'hana dūhū, īyo nayigwile kūfuma kūlī Mulungu; ū Abulahamu atīītile ī gīko na hado yaya.

⁴¹ A bing'we mukwītaga dūhū ī milīmo ya ng'wa sīng'we.” Būng'wīla, “A bise tūtī ba nda ya bū; tūlī na Sīswe ūmò, ng'wene Mulungu.”

⁴² Ū Yesu ūbawīla, Ū Mulungu ūlū ni Sīng'we ni munitogilwe nū nene, nguno nizile kūfuma kūlī Mulungu, natizile nene ng'wenekīlī dūhū, anitūmile wei.

⁴³ Ī gīsī nibūlī mutūyitegelejaga īyo nakwīsomboolaga? Angū īlī kūlwa nguno mutadūgije ū kūgwigwa ū mhayo gwane.

⁴⁴ A bing'we mulī ba ng'wa sīng'we Shetani, h'ī chene mutogilwe ū kwīta gīt'ūmo kūlī ū kwikūmva kwa ng'wa sīng'we. Ū wei alī mūlagi kūfuma kale na kale, na hangī atīmīīlaga a ha ng'hana, nguno ū mulī wei ītīmo ī ng'hana. Ūlū ūhaya būlomolomo numho alīhaya īyo īlī mulī we, nguno nomolomo, na ise wa būlomolomo.

⁴⁵ Alīyo ū nene, munikolilwe nguno nakūmuwīlaga ya ng'hana.

⁴⁶ Ī gīsī nani ū mu bing'we ūyo alīnikaanīla gīkī nalī na shibi? Hama ūlū namuwīla ī ya ng'hana, nibūlī mutūnizunīlījaga?

⁴⁷ Ūyo alī wa ng'wa Mulungu akīyigwaga ī mihayo ya ng'wa Mulungu, a bing'we mutūdūla ū kwīyigwa nguno mutī ba ng'wa Mulungu.”

⁴⁸ A Bayudaya būshosha būng'wīla, “Ī gīsī tūtūtūngīlījaga ūlū twahaya gīkī ūlī Nsamalia na hangī ūlī n'ihūgi?”

⁴⁹ Nang'hwe ū Yesu ūshosha gīkī, Ū nene natī n'ihūgi, nankūgije dūhū ū Baba, gwike a bing'we hū mutanikūgije ū nene.

⁵⁰ Ū nene natikoobelaga ikūjo lyane ng'wenekīlī; alīho ūyo akūlīkoobaga, nīyo hū ng'wene ū namuji.

⁵¹ Nalīmuwīla gwa ng'hana gīkī, ūlū munhū ūgūdima ū mhayo gwane atūlībona ī licha kūshisha welelo bose.”

⁵² A henaho a Bayudaya būng'wīla, “Ī haha lūūlū twamana gete gīkī ūlī n'ihūgi. Ū Abulahamu waacha, pye na a bahangi; ū bebe nang'ho ukuhayaga kūhaya gīkī, ‘Ūlū munhū ūgūdima ū mhayo gwane atūlībona ī licha kūshisha welelo bose!’

⁵³ Ū bebe ūlī ntaale kūtinda ū nkūlūgenji wise ū Abulahamu īkī waacha, na a bahangi pye a bose abo baacha? Ī gete, ū bebe ūligīmba gīkī ūlī nani?”

⁵⁴ Ū Yesu ūshosha, Ūlū nikumīlīja nene ng'wenekīlī nakūbiza natī n'ikūjo; ū Baba ūyo mulīng'haya gīkī Mulungu wing'we, ū ng'wene anikūgije.

⁵⁵ A bing'we mutaamanile, ū nene ng'wene naamanile. Ūlū nūhaya gīkī nataamanile nakūbiza nalinomolomo gīt'ūmo mulī a bing'we; ū nene naamanile, nū mhayo gokwe nagūmanile.

⁵⁶ Ū nkūlūgenji wing'we ū Abulahamu walī na ng'hūmbū ja kūlībona ī likanza lyane, aho walībona ūyega.”

⁵⁷ A Bayudaya būng'wīla, “Mm! Ū bebe ūtaalī nūūlū kūshisha myaka makūmi atanò, wamonelile halī ū Abulahamu?”

⁵⁸ Ū Yesu ūbashokeja ūhaya, “Nalīmuwīla gwa ng'hana gīkī, ū Abulahamu aho ataalī ū kūbiza ho, ū Nene nalīho!”

⁵⁹ Būsola mawe hangī gīkī bamponde, alīyo ū Yesu ūbitūlūganya wibisa; hūna ūfuma ū mu hekalu ūja.