Yohana 6 - Bibilia Ilagano Lya Kale 2015

Kūlisha banhū shihūmbī shitanò

¹ Hama hangi, ū Yesu wīnga a henaho ūja kū nkīlo gwa nyanza ya Galilaya (h'ī ya Tiberia).

² N'ibita itaale lya banhū lyūnondeela, nguno baalī bashibona ī shimanīkījo īsho walī washīta ū kū basaatu.

³ Hūna ū Yesu na a bahemba bakwe būja mu lūgūlū, būūkigasha ng'wenūmo.

⁴ Ī likanza lyenīlo shigukulu sha pasaka ya Bayudaya shalī hihī kūshika.

⁵ Aho wabūūcha a miso gakwe ū Yesu, ūlībona ī libita lya banhū balīnkūūbīja; ūng'wīla Filipo gīkī, “Tūkagūle halī shilīwa sha kūbalisha a banhū benaba?”

⁶ Gwike akagūhaya ū mhayo gwenūyo kūlwa kūngema, nguno ū wei walī amanile ū gwa kwīta.

⁷ Ū Filipo ūnshokeja gīkī, “Nūūlū shikabiza shilīwa sha denali magana abīlī, gīkī būlī munhū apandīke twa kwilambya dūhū, nahene shitūbigela.”

⁸ Andulea, ūmò wa bahemba bakwe, ū nzunaye wa ng'wa Simoni Petelo, ūng'wīla gīkī,

⁹ “Ūyū nyanda aha alī na migatī ītanò ya shayili na tūdīlo tūbīlī. Alīyo nahene ī shenīshi shilī shikolo kī, ū kū banhū bingī gīkī?”

¹⁰ Nang'hwe ū Yesu ūhaya, “Bawīlagi a banhū bigashe.” Ī lipandī lyenīlo gaalīho maswa mingī, bigasha ng'hana a banhū, a bagosha baalī gītī shihūmbī shitanò.

¹¹ Ū Yesu wīsola ī migatī yenīyo, ūlūmba hūna ūbagabanhya pye abo baalī bigasha; nū tūdīlo wīta gīko. Būlī ng'wene ūpandīka gīt'ūmo boolī būdūla bo kalīīle kakwe.

¹² Aho bigeja ūbawīla a bahemba bakwe gīkī, “Gakumingagi a masaajiwa, shitizūjimīīla shose shose.”

¹³ Būgakuminga, bokaja matangwa ikūmi na abīlī ga masaajiwa ayo gakasaaga kūfuma ū mu migatī īy'ītanò ya shayili īyo bakalya yenīyo.

¹⁴ Hūna a banhū aho babona wīta shimanīkījo shilī gīko, bandya kūhaya, “Ī gete ū ng'wenūyū na ng'wene ū ng'hangi ūyo shing'wigelile kwiza mu sī!”

¹⁵ Ū Yesu aho wabona gīkī balīhaya kwiza kūndima bantemye bo makaala, ūbīngīla; ūja mu lūgūlū iyene hangī.

¹⁶ Aho lyabiza lya mhīndī, a bahemba bakwe būja kū nyanza,

¹⁷ būūkingīla mu lyato būbuga bajile Kapelanaumu, kū nkīlo gwa nyanza. Nguno būkila nose ū būjikū, alīyo ū Yesu walī ataalī ū kwiza aho baalī.

¹⁸ Kwimanīla gwabūūka nyaga ntaale, yūlibangūka no ī nyanza.

¹⁹ Aho balībuga bajile, bahayuja kabukule ho hado ine gīko, būmona ū Yesu walyegeela ī lyato alīshimīza higūlya ya nyanza; bakogoha kībi no.

²⁰ Alīyo ū wei ūbawīla, “Mutogohage nalī nene.”

²¹ Būbona hambū hambū nang'hwe ingīle ū mu lyato, gwike haho na haho ī lyato lyūshika ha ng'walo gwa sī īyo bajaga.

²² Ū kū ntondo yaho ī libita lya banhū abo baalī basaaga kū nkīlo gwa nyanza bakadeeba gīkī, ī igolo yaho lyalīho lyato līmò dūhū. Bizūkwa gīkī ū Yesu atajile nabo a bahemba bakwe ū mu lyato lyenīlo, bakaja boi bike.

²³ Kwimanīla giza na mato gangī gafumile Tiberia, gūshika gūkola hihī nī lipandī īlo bakalīīla migatī aho ū Seeba akalūmba.

²⁴ Hūna ī libita lya banhū aho babona gīkī ū Yesu walī atīho na a bahemba bakwe, bingīla mu mato būbuga bajile Kapelanaumu, balīnkooba ū Yesu.

²⁵ Būūkampandīkīla kū nkīlo gwa nyanza; būng'wīla, “Rabi washikaga nanalī ū kūūnū?”

²⁶ Nang'hwe ū Yesu ūbashokeja ūhaya, “Leki namuwīle ū gwa ng'hana, a bing'we mutūnikoobaga kūlwa nguno mukabona shimanīkījo, alīyo kūlwa nguno mukalya migatī ng'wigūta.

²⁷ Lekagi ū kūkoya koyela shilīwa īsho shikashilaga, koya koyelagi ī sha kūshinga ho shiku jose; īsho alang'winhe ū Ng'wana wa Munhū, nguno hū ng'wene ūyo ameng'hilwe na Mulungu Baba.”

²⁸ Hūna būmūja gīkī, “Twīte mhayo kī tūbize tūkūbeejaga milīmo ya ng'wa Mulungu?”

²⁹ Ū Yesu ūbashokeja ūbawīla, Ū nīmo go ng'wa Mulungu gūlī gīkī, nzunyagi ūyo antūmile wei.”

³⁰ Būng'wīla hangī gīkī, Ūlībeeja shimanīkījo kī tūshibone tūkūzunye? Ūlīīta mhayo kī?

³¹ A bakūlūgenji bise aho balī kū matogolo balyaga mana, gīt'ūmo gwandīkilwe gīkī, ‘Wabinhaga ngatī gwa kūfuma ng'wigūlū balya.’”

³² Hūna ū Yesu ūhaya, “Zunyagi nalīmuwīla gwa ng'hana gīkī, walī atī Musa ūyo wang'winhaga ngatī gwa kūfuma ng'wigūlū, alīyo ū Baba hū ng'wene ūyo akūng'winhaga ngatī gwa ng'hana gwa kūfuma ng'wigūlū.

³³ Nguno ū ngatī go ng'wa Mulungu gwamalile kwika kūfuma ū ng'wigūlū, kūlwa kūbinha būpanga a ba mu sī.”

³⁴ Hūna būng'wīla gīkī, “Seeba ūlatwinhage būlī lūshikū ū ngatī gwenūyū.”

³⁵ Nang'hwe ū Yesu ūbawīla, Ū nene hū nalī ngatī gwa būpanga. Ūyo wiza kūlī nene atūtuuba, nū yūyo ūnizunya atūkolwa nota na hado yaya.

³⁶ Gwike nalīmuwīla ng'wamalile ū kūnibona, alīyo mutūzunyaga.

³⁷ Pye abo aninhile Baba bakwiza ū kūlī nene, na būlī ng'wene ūyo wiza kūlī nene, natūmponya hanze na hado yaya.

³⁸ Nguno natikile kūfuma ng'wigūlū kwiza kwīta īyo natogilwe nene, alīyo īyo atogilwe ūyo anitūmile.

³⁹ Ū būtogwa bokwe ūyo anitūmile būlī gīkī, ū mu bose abo aninhile natizūnjimīīja nūūlū ūmò wabo, alīyo nalabahimbuche a ha lūshikū lo būkalīkījo.

⁴⁰ Nguno ū būtogwa bo ng'wa Baba būlī gīkī, būlī ng'wene ūyo ūmona ū Ng'wana na kūnzunya, abize na būpanga butashilaga, nane nakūhimbucha a ha lūshikū lo būkalīkījo.”

⁴¹ A Bayudaya badya kuduguluma aho wahaya gīkī, Ū nene nalī ngatī ūyo gwikile kūfuma ng'wigūlū.”

⁴² Būyūhaya gīkī, Ū ng'wenūyū atī hū ng'wene ū Yesu, ū ng'witūnja o ng'wa Yosefu? Tūhaya na a ba ise nū nina tūbamanile? Hama nibūlī akwihayaga gīkī, ‘Nalī ngatī gwikile kūfuma ng'wigūlū?’”

⁴³ Nang'hwe ū Yesu ūshosha ūbawīla, “Mutadugulumage

⁴⁴ atīho nūūlū ūmò ūyo adūgije kwiza kūlī nene, ūlū atadutilwe na Baba ūyo anitūmile; nane nakūhimbucha a ha lūshikū lwa būkalīkījo.

⁴⁵ Ū mu shandīkwa shing'we handīkilwe gīkī, ‘Pye bakūbiza balangilwe na Mulungu.’ Hūna lūūlū, būlī ng'wene ūyo akwigwaga kūfuma kūlī Baba wahūgūka, akwizaga ū kūlī nene.

⁴⁶ Atīho ūyo wamala kūmona ū Baba ūlū atī we wike ūyo afumile kūlī Mulungu; ū ng'wene h'ūyo wamona ū Baba.

⁴⁷ Nalīmuwīla gwa ng'hana gīkī, ūyo ūzunya alī na būpanga butashilaga.

⁴⁸ Ū nene nalī ngatī gwa būpanga.

⁴⁹ A bakūlūgenji bing'we aho balī kū matogolo balyaga mana, alīyo nahene baacha.

⁵⁰ Ū ngatī ūyū gwene gwikile kūfuma ng'wigūlū, gīkī ose ose ūyo ūgūlya atizucha.

⁵¹ Ū nene nalī ngatī gwa būpanga ūyo gwikile kūfuma ng'wigūlū, ose ose ūyo ūgūlya ū ngatī gwenūyū, akūbiza mpanga shiku jose. Ū ngati uyo naling'winha hu mīlī gwane uyo naligufunya kulwa bupanga bo welelo.”

⁵² A Bayudaya bandya kūyoga hangī bakwihalalījaga balīhaya gīkī, Ū ng'wenūyū adūgije ginehe ū kūtwinha a bise ū mīlī gokwe tūgūlye?”

⁵³ Nang'hwe ū Yesu ūbawīla, “Nalīmuwīla gwa ng'hana gīkī, ūlū mutagūlile ū mīlī go ng'wana wa Munhū, na kūgang'wa a mininga gakwe, būtīmo ū būpanga ū mu bing'we.

⁵⁴ Ū wa kūgūlya ū mīlī gwane, na kūgang'wa a mininga gane, alī na būpanga butashilaga, nane nakūhimbucha a ha lūshikū lo būkalīkījo.

⁵⁵ Nguno ū mīlī gwane shilī shilīwa sha ng'hana, na a mininga gane nago shilī shakūng'wa sha ng'hana.

⁵⁶ Ū wa kūgūlya ū mīlī gwane ūgang'wa na a mininga gane, akwikala mulī nene; nū nene nakwikala mulī wei.

⁵⁷ Ūmo alī mpanga ū Baba ūyo anitūmile, nū nene h'ūmo nalī mpanga kūlwa nguno ya ng'wa Baba. Nū wa kūnilya nene, akūbiza mpanga gīko kūlwa nguno yane.

⁵⁸ Ū ngatī gwenūyū gūtabizile gīt'ūyo balyaga bakūlūgenji abo baacha, ūyū gwene gūlī ngatī ūyo gwikile kūfuma ng'wigūlū; ū wa kūgūlya akūbiza mpanga shiku jose.”

⁵⁹ Ī mihayo yenīyī akīhaya alī Kapelanaumu akūlangaga ng'wisinagogi.

⁶⁰ Hūna lūūlū bingī ba bahemba bakwe aho bigwa ī yenīyo bandya kūhaya gīkī, Ū mhayo gwenūyū ndiimu, nani ūyo adūgije kūgwitegeleja?”

⁶¹ Ū Yesu aho wabona gīkī a bahemba bakwe bandya kūkuuma kuuma kūlwa nguno ya mhayo gwenūyo ūbabūja gīkī, “Gūlīng'wipamya ū mhayo gwenūyū?

⁶² Īkūbiza ginehe lūūlū ūlū ng'ūmona ū Ng'wana wa Munhū alīlinha hangī ūko walī ī kwandya?

⁶³ Ū moyo h'ūyo gūkinhaga būpanga, ū mīlī gūtī na solobo nūūlū hado. Ī mihayo īyo nalīmuwīla h'īlī moyo, hama h'īlī būpanga.

⁶⁴ Alīyo balīho bamò bing'we abo batūzunyaga.” Kūfuma ha wandījo ū Yesu walī abamanile abo baalī batazunije, nū nodeeji wakwe walī aamanile.

⁶⁵ Ongeja hangī kūhaya, “Hī nguno yene naalī namuwīla gīkī ndūhū nūūlū ūmò ūyo adūgije kwiza kūlī nene, ūlū atinhilwe būdūla kūfuma kūlī Baba.”

⁶⁶ Kwandīja ikanza lyenīlo bingī ba bahemba bakwe būshoka kū numa, batadimanile nang'hwe hangī!

⁶⁷ Hūna ū Yesu ūbabūja nabo abo ikūmi na babīlī gīkī, “Hamo na a bing'we mutogilwe kūja?”

⁶⁸ Simoni Petelo ūshosha gīkī, “Seeba tūje kūlī nani hangī? Ū bebe hū ūlī nayo ī mihayo ya būpanga butashilaga!

⁶⁹ Twamalile kūzunya na kūbona hape gīkī, ū bebe hū ūlī ng'wene, ū Ng'wela o ng'wa Mulungu.”

⁷⁰ Nang'hwe ū Yesu ūnshokeja gīkī, “Natamusolile nene a bing'we ikūmi na babīlī, alīyo ūmò wing'we alī Shetani?”

⁷¹ Akang'haya Yuda ng'wana Simoni Isikaliote; nguno hū walī ūmò wa babo ikūmi na babīlī, ūyo walī n'iganiko lya kūnodeela.