Yohana 5 - Bibilia Ilagano Lya Kale 2015

Kūpījiwa kwa nsaatu wa myaka mingī

¹ Ha numa ya mihayo yenīyī, lyūshika ikanza lya shigukulu sha Bayudaya, ū Yesu ūlinha kūja Yelusalemu.

² Ū mu Yelusalemu lyalīmo ilambo hihī na mita nebe gwitanagwa gwa ng'holo, lyalī līpīndiwe mabīndo atanò, ū mu Shihebulania litanagwa Betizata.

³ Ū mu mabīndo genayo bikalaga balambalalile moi balwīle ba būlī mbika, babboku na balemehazu, būyaga na a būūmà būhaama.

⁴ Nguno makanza malebe malaika o ng'wa Seeba wikaga ū ng'wilambo lyenīlo, wagalibangūla a minzī. Ūyo wabizaga wa kwandya kwiponeja ū mu minzī ūlū galibangūka, wapīlaga pyī ū būlwīle ūbo walī nabo.

⁵ Hūna lūūlū, walīho hoi munhū nebe walī wamala myaka makūmi adatū n'īnaane asaatile.

⁶ Ū Yesu aho wamona alambalalile ūdeeba gīkī walī n'ikanza ilīhu alī henaho. Hūna ūmūja, Ūtogilwe ū kūpīla?”

⁷ Nang'hwe ū nsaatu ng'wenūyo ūshosha gīkī, “Baba ū nene natī na munhū wa kūniponeja ū ng'wilambo ūlū galibangūka a minzī; ahene nakagemaga ū kwiyanga yangīla, alīyo aho nataalī ū kūshikīīla, akiponejaga moi ūngī wanitanga ū nene!”

⁸ Hūna ū Yesu ūng'wīla, “Būūkaga ūshisole ī shilago shako, ūshimīze.”

⁹ Haho na haho ū munhū ng'wenūyo ūpīla, ūshibūūcha ng'hana ī shilago shakwe, wandya kūshimīza ajile! Nīyo ū lūshikū lwenūlo lolī lo sabato.

¹⁰ Hūna a Bayudaya būng'wīla ū munhū ūyo akapījiwa ng'wenūyo gīkī, “Bebe ī lelo sabato, ūtazunīlījiwe ū kūbūūcha shilago!”

¹¹ Nang'hwe ūbashokeja ūhaya gīkī, Ū munhū ūyo wanipījaga hū ng'wene walī waniwīla gīkī, ‘Shibūūchage ī shilago shako ūshimīze.’”

¹² Būmūja, “Nani ūyo wakūwīlaga ūshibūūche ūshimīze?”

¹³ Gwike ū munhū ūyo akapījiwa ng'wenūyo, atang'witegelegije; nguno ū Yesu akīnga a h'ipandī lyenīlo kūlw'ibita lya banhū.

¹⁴ Alīyo ū Yesu akīīta ūmonela mu hekalu ū munhū ng'wenūyo; ūng'wīla gīkī, Ū bebe wamalile kūpīla, ali lūūlū, ūtizīīta shibi hangī ūkagwīlwa mhayo gwabūbi kūtinda!”

¹⁵ Ū munhū ng'wenūyo ūja ūūkabawīla a Bayudaya, gīkī ūyo akampīja walī Yesu.

¹⁶ Hūna a Bayudaya bandya kūnuhya ū Yesu, nguno akabeeja mhayo gūlī gīko ha sabato.

¹⁷ Nang'hwe ūbashokeja gīkī, Ū Baba akūtūmamaga nī haha, h'ī nguno yene nū nene nalītūmama.”

¹⁸ Ū mhayo gwenūyo gūbenheleja a Bayudaya bongeje kūkooba kūmūlaga; nguno atagelelile kūkenaagūla sabato dūhū, alīyo akang'haya nū Mulungu gīkī alī Ise. Ūbiza wilenganīja na Mulungu!

Būdūla bo Ng'wana

¹⁹ Nang'hwe ū Yesu ūshosha ūhaya, “Nalīmuwīla gwa ng'hana gīkī, ū Ng'wana atīko kūbeeja nīmo nūūlū gūmò wei ng'wenekīlī, ūlū atūmonaga ū Ise akūbeejaga; nguno īyo akūbeejaga ū Baba h'īyo akūbeejaga nū Ng'wana.

²⁰ Ū Baba antogilwe no ū Ng'wana, na lūūlū akūng'oolekejaga pyī īyo akūbeejaga, na hangī akūng'oolekeja na mitaale kūtinda īyī, muyūkumya.

²¹ Nguno gīt'ūmo Baba akabahembuchaga a bafu wabinha būpanga, h'ūmo nū Ng'wana akwītīlaga; nang'hwe akūbinhaga būpanga abo ahayile kūbinha.

²² Na hangī ū Baba atalamulaga munhū nūūlū ūmò; anekelile Ng'wana pyī ū būlamuji,

²³ gīkī a bose bankūje ū Ng'wana, gīt'ūmo bankūgīgije ū Ise. Ūyo atankūgije ū Ng'wana atankūgije nū Ise, ūyo antūmile.

²⁴ Nalīmuwīla gwa ng'hana gīkī, ūyo ūgwigwa ū mhayo gwane hama ūnsanya ūyo anitūmile, alī na būpanga butashilaga. Atīko kwingīla mu nsango, nguno wīngaga ū mu kūcha, wingīlaga mu būpanga.

²⁵ Hangī nalīmuwīla gwa ng'hana gīkī, ikanza līliza; nīyo īlī h'ī lyene. A bafu bakwandya kūliigwa ī lilaka lya Ng'wana o ng'wa Mulungu, abo bakūliigwa bakūbiza bapanga.

²⁶ Nguno ūmo Baba alī na būpanga mulī wei ng'wenekīlī, h'ūmo ang'winhīlile nū Ng'wana, nang'hwe kūbiza na būpanga ū mulī wei ng'wenekīlī.

²⁷ Nū būdūla bo kūlamula ang'winhile wei, īkī alī Ng'wana wa Munhū.

²⁸ Mutagūkumyage ū mhayo gwenūyū, nguno ikanza līliza; a banhū abo balī mu shigila bakwigwa ilaka lyakwe

²⁹ bafume moi. Abo bīītaga yawiza, bakūjūūkila mu būpanga, alīyo abo bīītaga yabūbi, bakūjūūkila mu nsango.”

Kūkaanīlwa kwa ng'wa Yesu

³⁰ Ū nene natūdūla kwīta mhayo gose gose nene ng'wenekīlī dūhū. Nakalamulaga gīt'ūmo nakigwīlaga, nīyo ū būlamuji bone būtūngīlīgije. Nguno natakoobaga īyo nītogilwe nene ng'wenekīlī, alīyo īyo ayītogilwe ūyo anitūmile.

³¹ Ūlū nikaanīla nene ng'wenekīlī, ū būkaanīji bone būtūbiza bo ng'hana.

³² Alīho ūngī ūyo akūnikaanīlaga, hama namanile gīkī ū būkaanīji ūbo akūnikaanīlaga būlī bo ng'hana.

³³ A bing'we benekīlī mukatūma nhūng'wa kūja kūlī Yohana, nang'hwe ūkīkaanīla ī ng'hana.

³⁴ Gwike nahene ū nene natasendamīlile būkaanīji bo kwīngīīla kūlī munhū; ī yenīyī nalīyīhaya gīkī mupīle.

³⁵ Ū munhū ng'wenūyo walī chenge, shabakaga na kūmutiimīla; na hangī lyamuyejaga ī lisana lyakwe nūūlū īkī lyalī ly'ikanza iguhī.

³⁶ Alīyo ū nene nalī na būkaanīji būtaale kūtinda ū bo ng'wa Yohana. Ī milīmo īyo aninhile Baba kwīshikīlīja, hū wene ū būkaanīji bone. Ī milīmo īyo nakwīyītaga yenīyī, hū yene īkūnikaanīlaga gīkī ū Baba anitūmile.

³⁷ Nū Baba ūyo anitūmile nang'hwe akūnikaanīlaga. A bing'we mutaalī ū kūliigwa ī lilaka lyakwe nūūlū hado, nūūlū ī suso yakwe mutaalī ū kwībona.

³⁸ Pyī nū mhayo gokwe gūtīmo ū mu bing'we, nguno mutanzunije ūyo antūmile.

³⁹ Mukwikalaga ng'ūlola lola mu shandīkwa, nguno mukwiganikaga gīkī mukūkunga mo būpanga bo welelo, alīyo nī shene shikūnikaanīlaga nene!

⁴⁰ Lelo ū kwiza ū kūlī nene gīkī mubūpandīke ū būpanga, mutatogilwe!

⁴¹ Ū nene natūkoobaga kūkumīlījiwa na banhū.

⁴² Alīyo namumanile a bing'we; gīkī ū mu bing'we būtīmo ū būtogwa bo ng'wa Mulungu.

⁴³ Ng'walemile ū kūnanukūla ū nene īkī nizile mu lina lya ng'wa Baba; alīyo ūlū ūngī wiza mu lina lyakwe wei ng'wenekīlī, mukūng'wanukūla.

⁴⁴ Ī gīsī a bing'we īkī mukanukūlaga ikūjo kūfuma kū banhū biching'wi, mudūgije ginehe ū kūzunya alīyo mutakoobaga ikūjo lya ng'wa Mulungu ūyo alī we ūmò wike?

⁴⁵ Mutiganikage gīkī ū nene nakūmubūūla kūlī Baba, ū Musa ūyo munsendamīlile hū ng'wene akūmubūūla.

⁴⁶ Alīyo nahene ūlū ni munsanije ū Musa, nū nene ni ng'wanisanya, nguno ī shandīkwa shakwe shinihayile nene.

⁴⁷ A bing'we īkī mutashizunije ī shandīkwa shakwe, mudūgije kwīzunya ginehe ī mihayo yane?”