Yohana 4 - Bibilia Ilagano Lya Kale 2015

Yesu na nkīma Nsamalia

¹ Hūna lūūlū, ū Seeba akadeeba gīkī, a Bafalisayo bigwile gīkī ū Yesu akūpandīkaga bahemba bingī kūtinda ū Yohana, na kūbabatīīja.

² Gwike ū Yesu walī atabatīījaga ū wei ng'wenekīlī, babatīījaga bahemba bakwe.

³ Aho wagūdeeba ū mhayo gwenūyo, wīnga ī Būyudaya ūja hangī Galilaya.

⁴ Ī nzīla īyo akabītīla yalī ībītile mu Samalia.

⁵ Ūshika mu nzengo nebe gwa Samalia, gwitanagwa Sikali, gwalī hihī n'ilaale ilebe, Yakobo walī wang'winha ng'witūnja wakwe Yosefu.

⁶ Lwalīmo na lwinzī lokwe ū Yakobo. Hūna lūūlū ū Yesu īkī walī wanojiwa lūgendo, aho washika a ha lwinzī lwenūlo wigasha; gaalī makanza gītī ga sa itandatū limi.

⁷ Kwimanīla nkīma Nsamalia wiza kūdaha minzī; ū Yesu ūng'wīla, “Mayū ninhage minzī nang'we.”

⁸ A bahemba bakwe baalī baja mu nzengo kūjūgūla shilīwa.

⁹ Ū nkīma ū Nsamalia ng'wenūyo ūng'wīla gīkī, “Tūhaya ūlī Nyudaya ahene ū bebe, hama nibūlī ūlīnilomba minzī, alīyo ū nene nalī nkīma Nsamalia?” (Nguno a Bayudaya batī na būsangī na Basamalia).

¹⁰ Nang'hwe ū Yesu ūnshokeja ūng'wīla, Ūlū ni ulimanile īlī nong'ho lya ng'wa Mulungu, nū yūyo alīkūwīla gīkī, ‘Ninhage minzī nang'we,’ nang'ho ni wanomba akwinhe minzī gali na bupanga.”

¹¹ Ū nkīma ūng'wīla gīkī, “Bebe baba wagafunya halī a minzī gali na bupanga, alīyo nī lidahījo ūtī nalyo; hama nū lwinzī lwenūlū lūshimu gīkī?

¹² Ū bebe ūlī ntaale kūnkīla ū sīswe ū Yakobo, ūyo watūlekela ū lwinzī lwenūlū? Īkī nū wei ng'wenekīlī wang'welaga henaha aha, pye na a baana bakwe, nī mitugo jakwe!”

¹³ Ū Yesu ūnshokeja ūng'wīla, “Būlī ng'wene ūyo akagang'waga a minzī genaya akakolagwa nota hangī.

¹⁴ Alīyo ose ose ūyo ūgang'wa a minzī ayo nakūng'winha nene, atūkolwa nota welelo bose, a minzī ayo nakūng'winha gakūbiza lūzwīlo ū mulī wei, lwa kwikala lūkūpumunhikaga būja na būja pyī ī shikū.”

¹⁵ Ū nkīma ūng'wīla gīkī, “Ninhage nane baba a minzī genayo, nooye ū kūkolwa ī nota, nooye na kwikala niza aha kūdaha minzī!”

¹⁶ Nang'hwe ū Yesu ūng'wīla, “Jaga ūkang'witane ū ngoshi wako ng'wize aha.”

¹⁷ Ū nkīma ūnshokeja ūng'wīla, “Natī na ngosha wane.” Nang'hwe ū Yesu ūng'wīla, “Watūngīlīja ū kūhaya gīkī, ‘Natī na ngosha wane.’

¹⁸ Nguno washishaga bagosha batanò, hama nū yūyo ūlī nang'hwe ī haha atī ngoshi wako. Ohaya ūmo īlī gete!”

¹⁹ Ū nkīma ūng'wīla, “Baba ī gete nabona ūlī ng'hangi ū bebe.

²⁰ A bakūlūgenji bise balamījaga mu lūgūlū lwenūlū ūlū, alīyo a bing'we mukahayaga gīkī ī lipandī īlo shiigeleelilwe kūlamīja moilīī Yelusalemu!”

²¹ Nang'hwe ū Yesu ūng'wīla, “Nizunīlījage gete mayū; gīkī, līliza ikanza īlo mukoya kūgonga kūnamīja ū Baba mu lūgūlū ūmu, nūūlū Yelusalemu.

²² A bing'we mukalamyaga īsho mutashimanile, alīyo a bise tūkanamyaga ūyo tūūmanile; nguno ū būpīji būfumile kū Bayudaya.

²³ Gwike ī likanza līliza, nīyo ī haha līlīho, ī lya balamya ba ng'wa ng'hana kūyūnamya ū Baba mu moyo na mu ng'hana; nguno ū Baba abatogilwe a balamya abo bakanamyaga mu mbika yenīyo.

²⁴ Ū Mulungu alī Moyo, a balamya bakwe nabo shibigelile kūnamya mu moyo na mu ng'hana.”

²⁵ Ū nkīma ūng'wīla, “Namanile gīkī akwiza Masīya, ūyo akitanagwa Kilisito, na lūūlū ūlū wiza ū ng'wenūyo, hū ng'wene ūyo akūtūgoloolela pyī ī yose.”

²⁶ Ū Yesu ūng'wīla, Ū Nene ūyo nalīyomba nang'ho, hū nalī ng'wene.”

²⁷ Ī likanza lyenīlo būshika a bahemba bakwe, būkumya ū kūmona alīyomba na nkīma. Alīyo nūūlū ūmò wabo atabūgije gīkī, Ūlīkooba kī?” Nūūlū gīkī, “Nibūlī ūlīhoya nang'hwe?”

²⁸ Ū nkīma ng'wenūyo ūlūleka ū lūnno lokwe ūshoka mu nzengo ūūkabawīla a banhū gīkī,

²⁹ “Bing'we ka nzūgwi kūūnū munole ūūyū munhū, waniwīla pyī īyo nakīītaga; akūduuma kūbiza Kilisito gete ū ng'wenūyū?”

³⁰ Būfuma ū mu nzengo būhūūma bajile ūko walī.

³¹ Ū ng'wikanza lyenīlo a bahemba būng'wīla ū Yesu gīkī, “Rabi ka lyaga!”

³² Nang'hwe ūbawīla, Ū nene nalī na shilīwa īsho mutashimanile a bing'we.”

³³ A bahemba būyiwīla gīkī, “Hamo munhū walī wang'wenhela shilīwa?”

³⁴ Nang'hwe ū Yesu ūbawīla, “Ī shilīwa shane ū nene, shilī kwīta īyo atogilwe ūyo anitūmile; kūgūshikīlīja ū nīmo gokwe.

³⁵ Ī gīsī mutiwīlaga gīkī, ‘Yasaagaga myeji īne gashike magesa?’ Ali lūūlū, ī haha nalīmuwīla būūchagi a miso ging'we, mulole ū mu migūnda, mukūbona gīkī a magesa gashikaga.

³⁶ Ī haha ū ngesi wandije kwanukūla mheela, akūkumingaga matwajo kūlwa būpanga, bupanga butashilaga; ībize gīkī ū ngesi nū mībi bayegele hamò.

³⁷ Nguno ū mu gīko gūkubiza gūlī gwa ng'hana ū mhayo ūyo gūhayile gīkī, ‘Ū mībi ūngī, nū ngesi ūngī.’

³⁸ Nalīmutūma kūshigesa īsho mutashikoyelile a bing'we, bashikoyela bangī; a bing'we mulingīla mu nīmo ūyo gwandiwa na bangī.”

³⁹ Basamalia bingī ū mu nzengo gwenūyo bakanzunya, kūlwa mhayo gwa nkīma ūyo akagūhaya; ī gīkī, “Waniwīlaga pyī īyo nakīītaga.”

⁴⁰ Hūna lūūlū a Basamalia aho bashika, būnomba ū Yesu alende lende hamò nabo; na ng'hana wikala nabo shikū ibīlī.

⁴¹ Na bangī hangī bakazunya kūlwa mhayo gokwe.

⁴² Būng'wīla ū nkīma gīkī, “Ī haha twigwaga bise benekīlī, na lūūlū twazunyaga; alīyo ītī kūlwa nguno ya mhayo gwako dūhū, twamanaga gete gīkī ū munhū ng'wenūyū ng'hana Mpīja wa ba mu sī.”

Kūpījiwa kwa ng'witūnja wa nsugi

⁴³ Aho jabīta shikū ibīlī, ū Yesu wīnga a henaho ūja Galilaya.

⁴⁴ Gwike walī wamala kūhaya hape gīkī, Ū ng'hangi atinhagwa ikūjo ū mu sī ya ng'wawe!”

⁴⁵ Hūna aho washika ī Galilaya bingī ba bana Galilaya būng'wanukūla, nguno baalī bībona īyo akībeeja aho alī Yelusalemu kū shigukulu, īkī nabo baalī ko.

⁴⁶ Ūja ūūkashika hangī ī Kana ya Galilaya, ūko walī wagalūcha minzī gūbiza mvinya. Walīho nsugi nebe muna Kapelanaumu, walī asaatīlilwe ng'witūnja wakwe.

⁴⁷ Aho wigwa gīkī ū Yesu wīngile ī Būyudaya, alī mu Galilaya, wiza kūng'wikūmbīlīja atulumenhe, aje akampīje ū ng'wana wakwe. Nguno walī mandetendete, hihī na kūcha!

⁴⁸ Alīyo ū Yesu ūng'wīla gīkī, “A bing'we ūlū mutabonile shimanīkījo nūūlū mihayo ya kūkumya, angū mmho mutūdūla gete ū kūzunya!”

⁴⁹ Ū nsugi ng'wenūyo ūng'wīla gīkī, “Baba ka tulumenhaga wangū, kūko kataalī kūcha u ngwanone!”

⁵⁰ Ū Yesu ūng'wīla gīkī, “Jaga ū ng'wana wako mpanga.” Ū munhū ng'wenūyo ūgūzunya ū mhayo ūyo akawīlwa na Yesu, ūja ng'hana.

⁵¹ Aho alīshoka ūmanhya na batūmami bakwe, būng'wīla gīkī ū ng'witūnja wakwe wapīlile.

⁵² Wahayūbabūja ī likanza īlo akandya kūbeeja, būng'wīla, “Igolo aho lyandya kūhūga ī līīmi; mu makanza gītī ga sa mpungatī, gwandya kwika ū nswiza.”

⁵³ A henaho ū ise ūmana hū lyene ī likanza īlo Yesu akang'wīla gīkī, Ū ng'wana wako mpanga.” Na lūūlū ūbiza nzunya, nī kaya yakwe pyī ī yose.

⁵⁴ Ī shenīsho shalī shimanīkījo sha kabīlī īsho a kabeeja ū Yesu aho alī mu sī ya Galilaya, hanze ya Būyudaya.