Yohana 3 - Bibilia Ilagano Lya Kale 2015

Yesu na Nikodemo

¹ Walīho munhū nebe, ūmò wa Bafalisayo, nsugi wa Bayudaya; lina lyakwe Nikodemo.

² Ū munhū ng'wenūyo akija kūlī Yesu ikanza lya būjikū ūng'wīla, “Rabi tūmanile gīkī ūlī Nangi ūyo afumile kūlī Mulungu, nguno atīho ūyo adūgije kūshīta ī shimanīkījo īsho ūkūshītaga bebe, ūlū Mulungu atī hamò nang'hwe!”

³ Ū Yesu ūnshokeja ūng'wīla, “Zunyaga nalīkūwīla go ng'hana gīkī, ū munhū ūlū atabyalilwe būpya, atūdūla ū kūbūbona ū būtemi bo ng'wa Mulungu.”

⁴ Nang'hwe ū Nikodemo ūng'wīla, Ū munhū ūlū ntaale adūgije kūbyalwa ginehe? Adūgije kwingīla mu nda ya ng'wa nina lūkangala lo kabīlī gīkī abyalwe hangī?”

⁵ Ū Yesu ūshosha ūhaya, “Nalīkūwīla go ng'hana gīkī, ose ose ūyo atūbyalwa na minzī na Moyo, atūdūla ū kwingīla ū mu būtemi bo ng'wa Mulungu.

⁶ Īsho shibyalilwe na mīlī shilī mīlī, nī shisho shibyalilwe na Moyo nasho shilī moyo.

⁷ Nose ūtakumyage ūmo nalīkūwīlīla, ī gīkī shiigelile mubyalwe būpya.

⁸ Ū nyaga gūkahembaga gūjile ūko gūtogelilwe, ūkūgwigwa dūhū ūlū gūlīhuyemba, alīyo ūtūdūla ū kūmana ūko gūfumile, nū kūko gūjile; h'ūmo īlī nū kūlī ose ose ūyo abyalilwe na Moyo Ng'wela!”

⁹ Ū Nikodemo ūnshokeja ūhaya gīkī, “Īdūlīkanile mu ginehe ī yenīyī?”

¹⁰ Nang'hwe ū Yesu ūnshokeja ūng'wīla, Ū bebe ūlī nangibo Baisilaeli, ūtīmanile ī yenīyī?

¹¹ Na lūūlū zunyaga gete nalīkūwīla gīkī, īyo twīmanile tūkwīhayaga, nī yīyo twībonile tūkwīkaanīlaga, alīyo ū būkaanīji wise mutūwanukūlaga.

¹² Ī gīsī ūlū namuwīla ya mu sī ng'walema ū kūzunya, mukūzunya ginehe ūlū nūmuwīla ya ng'wigūlū?

¹³ Nguno atīho munhū ūyo wamala kūlinha ng'wigūlū, ūlū atī Ng'wana wa Munhū dūhū, ūyo afumile ū ng'wigūlū.

¹⁴ Ūmo Musa akasungīla nzoka higūlya kū matogolo, h'ūmo nū Ng'wana wa Munhū shing'wigeleelilwe asungwe higūlya;

¹⁵ gīkī būlī ng'wene ūyo ūnzunya abize na būpanga butashelaga.

¹⁶ Nguno ū Mulungu abatogilwe no a ba mu sī, kūshisha nose ūmfunya Ng'wana wakwe ūmò wike; gīkī būlī ng'wene ūyo ūnzunya atizūyagala, alīyo abize na būpanga butashelaga.

¹⁷ Ū Mulungu atantūmile ū Ng'wana wakwe kwiza mu sī kūlwa kūbinha nsango a ba mu sī, alīyo a ba mu sī bapījiwe mu nzīla yakwe.

¹⁸ Būlī ng'wene ūyo ūnzunya atinhwa nsango, alīyo būlī ng'wene ūyo atanzunije alī mu nsango, nguno atalīzunije ī lina lya Ng'wana, ūyo alī Myalwa ūmò wike wa ng'wa Mulungu.

¹⁹ Ū nsango ūyo gūlīho gwene gūlī gīkī, ī lisana lyamalile kwiza ū mu sī, alīyo a banhū bashitogilwe ī giiti kūtinda ī lisana, īkī ī shītwa shabo shilī shabūbi.

²⁰ Nguno būlī ng'wene ūyo akīītaga yabūbi alīkolilwe ī lisana, hangī atūdūla ū kwiza ū kūlyo, nguno atatogilwe ī shītwa shakwe shibonwe.

²¹ Alīyo ūyo akīītaga ya ng'hana, akizaga ū kwisana, shayūbonwa ī shītwa shakwe, gīkī shikwītagwa mu katongeelele ka ng'wa Mulungu.”

Yohana Matīīja

²² Ha numa ya yenīyo ū Yesu akaja nabo a bahemba bakwe mu sī ya Būyudaya, ūūkalenda nabo kwenūko, ūyūbatīīja.

²³ Nū Yohana wabatīījaga, gwike ū ng'wene walī Ainoni hihī na Salimu, nguno gaalīko minzī mingī. Na lūūlū a banhū bizaga kūbatījiwa,

²⁴ ū Yohana walī ataalī ū kūponyiwa mu jeela.

²⁵ Kwimanīla bobūūka wihalalīja ha gatī ya bahemba ba ng'wa Yohana na Nyudaya nebe, kūlwa mbika ja kwiyeeja.

²⁶ Biza ū kūlī Yohana būng'wīla gīkī, “Rabi ūyo walī nang'hwe kū nkīlo gwa Yolodani, ūyūnkaanīla na kūnkaanīla, nang'hwe alībatīīja; nīyo ī haha pye a banhū bakūjaga kūlī wei.”

²⁷ Nang'hwe ū Yohana ūshosha ūhaya, Ū munhū atūdūla kwanukūla shikolo īsho atinhilwe kūfuma ng'wigūlū.

²⁸ A bing'we benekīlī mulī bakaanīji bane ūmo nakahayīla, gīkī ū nene natī Kilisito, alīyo natūmilwe kū būtongi bokwe.

²⁹ Ūyo alī hamò nang'hwe ū Ntoolwa, hū ng'wene ū Ntooji; lelo ū nwani ng'wiye wa Ntooji, ng'wene wīmīīlaga ha mhūjo; okolaga būyegi, nguno alīliigwa ī lilaka lya Ntooji. Ū wenūbū hū būshikanu bo būyegi bone ū nene.

³⁰ Ū wei shing'wigeleelilwe kongeja kūhangama, lelo ū nene ng'wene nongeje kūdoha.”

Ūyo afumile ng'wigūlū

³¹ Ūyo afumile kwigūlya alī higūlya ya yose; nū wa mu sī nang'hwe wa mu sī dūhū, nī yīyo akalūngalūngaga nayo ya mu sī. Ūyo afumile ng'wigūlū alī higūlya ya yose;

³² Īyo ayībonile nī yīyo akwīyigwaga hū yene akwīkaanīlaga, alīyo atīho ūyo akūwanukūlaga ū būkaanīji bokwe.

³³ Ūyo ūwanukūla ū būkaanīji bokwe, akūbiza wazunyaga gīkī, ū Mulungu alī wa ng'hana.

³⁴ Nguno ūyo atūmilwe na Mulungu akahayaga mihayo ya ng'wa Mulungu, īkī ū Mulungu atinhaga ū Moyo Ng'wela mu kūgemeela.

³⁵ Ū Baba antogilwe no ū Ng'wana wakwe, na lūūlū pyī ī shikolo ashitūūlile mu nkono gokwe.

³⁶ Ūyo ūnzunya ū Ng'wana alī na būpanga butashilaga, lelo ūyo atūnzunya ū Ng'wana, atūbūbona ū būpanga, alīyo ū būpelanu bo ng'wa Mulungu būng'wikalīlile!”