Yohana 16 - Bibilia Ilagano Lya Kale 2015

¹ “Ī yenīyī nalīmuwīla kūlwa gīkī mutizipama mukīnga ū mu kūzunya.

² Bakūyūmupeeja ū mu masinagogi; nīyo līkūshika n'ikanza lya ng'wa munhū ose ose kūmubūlaga, kūnū akwiganikaga gīkī alīntūmamīla Mulungu.

³ Pyī ī yenīyī bakūng'wītīla nguno bataamanile ū Baba, nūūlū ū nene.

⁴ Nalīmuwīla ī yenīyī, ī likanza ūlū lyūshika mulizūkwe, gīkī naamalile kūmumanya.” “Ī yenīyī natamuwīlile kūfuma ha wandījo nguno naalikalaga hamò ning'we.

Nīmo gwa ng'wa Moyo Ng'wela

⁵ Alīyo ī haha nalīja kūlī we ūyo anitūmile, gwike atīho nūūlū ūmò wing'we ūyo alīnibūja gīkī, ‘Ūjile halī?’

⁶ Ī haha īkī namuwīla ī mihayo yenīyī, īng'holò jing'we jokala būpīna.

⁷ Gwike nalīmuwīla gwa ng'hana gīkī, īkūmubeelela a bing'we ūlū nūja ū nene; nguno ūlū natajile numho ū Ngunanhi atiza ū kū bing'we; alīyo ūlū nūja nakūntūma ize ū kū bing'we.

⁸ Hūna lūūlū, ūlū wiza akūbakaanīlīja a ba mu sī mu mihayo ya, shibi, būtūngīlīja na būlamulwa.

⁹ Ū mu mhayo gwa shibi, kūlwa nguno batūnizunyaga ū nene.

¹⁰ Ū mu gwa būtūngīlīja, kūlwa nguno nalīja kūlī Baba, na mutūnibona hangī.

¹¹ Hama ū mu mhayo gwa būlamulwa, īlī kūlwa nguno ū nsugi wa mu sī alamulilwe īyī wamalaga kulamulwa.

¹² Nīyo ī ya kūmuwīla nataalī nayo mingī, gwike ī haha mutūdūla ū kwīyitegeleja.

¹³ Alīyo ūlū alize ū Moyo wa ng'hana, ū ng'wenūyo h'ūyo akūmutongeela ū mu ya ng'hana pyī ī yose. Nguno atūhaya yakwe ng'wenekīlī, alīyo akūhaya gīt'ūmo akwigwīlaga; hama akūmumanīkīja īyo īliza.

¹⁴ Ū wei akūninha nene ī likūjo, nguno akūyūyīsola ī mihayo yane wamulanja a bing'we.

¹⁵ Pyī ī yose ī ya ng'wa Baba īlī yane; h'ī nguno yene nalīhaya gīkī akūyūyīsola ī yane wamulanga.”

¹⁶ “Mukoya ū kūnibona ng'wikanza ido, alīyo hangī ūlū lyūbīta ikanza ido ng'ūnibona.”

¹⁷ A henaho bamò ba bahemba bakwe būhaya, Ū mhayo gwenūyū alīgūhaya, ni mhayo kī? Ī gīkī, ‘Mukoya ū kūnibona ng'wikanza ido?’ Nī gīkī, ‘Hanuma hangī ūlū lyūbīta ikanza ido ng'ūnibona?’ Hama nī gīkī, ‘Īkī nalīja kūlī Baba?’”

¹⁸ Hūna lūūlū būhaya gīkī, “Ī likanza ī lido īlo alikala ūlīhaya lyenīlī, ni mhayo kī? Tūtūgūmanaga ūyo alīgūhaya!”

¹⁹ Ū Yesu ūdeeba gīkī baalī na ng'hūmbū ja kūmūja; hūna ūbawīla, “Ng'wandya kwibūja būja īkī nahaya gīkī, ‘Mukoya ū kūnibona ng'wikanza ido, hama hangī ūlū lyūbīta ikanza ido ng'ūnibona?’

²⁰ Nalīmuwīla gwa ng'hana gīkī, a bing'we mukūlīla na kūpīnīhala, alīyo a ba mu sī bakūyega. Gwike ū būpīna wing'we būkūgalūka kūbiza būyegi.

²¹ Ū nkīma ūlū alī ng'wikanza lya kūbyala akasaatagwa no, nguno alīlung'wa būsūngū; alīyo ūlū ūmala kūmyala ū ng'wana, atūgizūkwa hangī a makoye nguno ya būyegi, īkī wamyala munhū mu sī.

²² Na a bing'we ī haha mulī na būpīna; alīyo nakūmubona hangī jiyege īng'holò jing'we. Hama atigela ose ose wa kūng'wīngīja ū būyegi wing'we.

²³ Ū mu lūshikū lwenūlo, mutūnibūja mhayo gose gose. Nalīmuwīla gwa ng'hana gīkī būlī shene īsho mukūnomba ū Baba mu lina lyane akūng'winha.

²⁴ Alīyo kūshisha haha mutaalī ū kūlomba shose shose mu lina lyane; lombagi mukwanukūla, ū būyegi wing'we būshikane.”

²⁵ “Ī mihayo yenīyī nalīmuwīla mu sumo; alīyo līkūshika ī likanza lya kūmuwīla hape hape; natikala nūmuwīla mu sumo ī mihayo ya ng'wa Baba.

²⁶ Ū mu lūshikū lwenūlo bing'we benekīlī mukūlomba mu lina lyane, natūmuwīlaga gīkī nakūmulombela nene ū kūlī Baba.

²⁷ Nguno ū Baba amutogilwe īkī munitogilwe ū nene, na hangī muzunije gīkī nafumile kūlī Baba.

²⁸ Nafumile kūlī Baba niza ū mu sī; alīyo a ba mu sī nalībaleka nashoke hangī kūlī Baba.”

²⁹ Hūna a bahemba bakwe būng'wīla gīkī, “Ī haha lūūlū wayūyomba hape hape, oya ū kūtūmamīla sumo.

³⁰ Tūlībona gīkī wīmanile pyī ī mihayo, ūtī na nguno ya kūbūjiwa na munhū ose ose; ū mhayo gwenūyo gwatwinha kūzunya gete gīkī ūfumile kūlī Mulungu.”

³¹ Hūna ū Yesu ūbashokeja gīkī, “Ī haha hū ng'wazunya?

³² Managi gīkī līkūshika ikanza lya kūbbalasana, nīyo ī lyene lyashikaga, būlī ng'wene aje lokwe munileke iyene, gwike ahene natī iyene, nguno ū Baba alī hamò nane.

³³ Nalīmuwīla ī yenīyī gīkī mubize na mhola ū mulī nene; ū mu sī mulī na būluhi, alīyo timbyagi ng'holò, naamalile kwīheeba ī sī.”