Yohana 15 - Bibilia Ilagano Lya Kale 2015

Yesu ng'wene Nzabibu gwa ng'hana

¹ Ū nene nalī Nzabibu gwa ng'hana, ū Nang'hani ng'wene Baba.

² Būlī itambī īlo līlī mulī nene ūlū lītatwajaga matwajo akalyīnjaga, alīyo būlī lyene īlo līkatwajaga matwajo akalīkongoolelaga lyabeela, lyongeja ū kūtwaja.

³ A bing'we ng'wamalile kwela kūlwa nguno ya mhayo ūyo naamuwīlile.

⁴ Ikalagi ū mulī nene, nū nene ū mu bing'we; īlī gītī itambī ūlū lītī h'itina lya nzabibu lītūdūla ū kūtwaja matwajo lyoi lyenekīlī. Na a bing'we īlī gīko ūlū mutikala ū mulī nene.

⁵ Ū nene nalī Nzabibu, a bing'we mulī matambī. Ūyo wikala mulī nene nū nene mulī wei, ū ng'wenūyo akūtwaja matwajo mingī. Nguno ūlū natī nene a bing'we mutūdūla kwīta mhayo gose gose.

⁶ Ūlū ose ose ūleka kwikala mulī nene, akūbiza gītī itambī ūmo līkaponejiagwa, lyūūma. A matambī ga gīko gakakumingagwa gaponyiwa mu moto gapemva.

⁷ Ūlū ng'wikala ū mulī nene nī mihayo yane yikala ū mu bing'we, lombagi mhayo gose gose ūyo mutogilwe, mukwītīlwa.

⁸ Ū Baba akwinhwa ikūjo ūlū muyūtwaja matwajo mingī, nguno hū mukūbiza bahemba bane.

⁹ Ūmo Baba anitogelilwe ū nene, na a bing'we amutogilwe gīko. Ikalagi mo ū mu būtogwa bone.

¹⁰ Ūlū ng'ūshidima ī shilagīlo shane mukwikala ū mu būtogwa bone, gīt'ūmo nū nene nakikalaga mu būtogwa bo ng'wa Baba, īkī nashidimile ī shilagīlo shakwe.

¹¹ Ī yenīyī nalīmuwīla kūlwa gīkī ū būyegi bone būbize hamò ning'we; hama ū būyegi wing'we būshikane.

¹² Ī shilagīlo shane shilī gīkī, būlī ng'wene itogwe na biye, gīt'ūmo namutogelilwe ū nene a bing'we.

¹³ Atīho nūūlū ūmò ūyo alī na būtogwa būtaale kūtinda wenūbū, gīkī munhū kweega būpanga bokwe kūlwa banwani biye.

¹⁴ Ūlū ng'wīta īyo nalīmulagīla mukūbiza banwani bichane.

¹⁵ A bing'we natūng'witanaga gīkī mulī basese, nguno ū nsese atamanile īyo akwītaga ū ise būgonzo; a bing'we naling'witana mulī banwani bichane, h'ī nguno yene nalīmumanīkīja pyī īyo nakwīyigwaga kūfuma kūlī Baba.

¹⁶ Mutanisolile bing'we ū nene, ū nene hū namusolile a bing'we, nūng'winha nīmo gwa kūja mukūtwajaga matwajo. Hama a matwajo ging'we gabize ga kūshinga ho, hangī muyūnomba ū Baba būlī shikolo īsho mutogilwe, wang'winha mu lina lyane.

¹⁷ Alīyo nalīmulagīla gīkī, būlī ng'wene itogwe na biye.”

¹⁸ Ūlū yūmukolwa ī sī, managi gīkī, ī soolo ya mhayo īnikolilwe nene aho ītaalī kūmukolwa a bing'we.

¹⁹ Ūlū ni mulī ba mu sī, ī sī ni yamutogwa nguno ni mulī baamo; alīyo ī haha mutī ba mu sī, naamalile kūmusolanhya kwīnga mo ū mu sī, h'ī nguno yene ī sī īmukolilwe.

²⁰ Gwizūkagwi ū mhayo ūyo namalaga kūmuwīla; gīkī, ‘Ū nsese atī ntaale kūnkīla ū ise būgonzo.’ Ūmo bakūniluhījaga ū nene, na a bing'we bakūmuluhya gīko, ūlū ni bagūdimile ū mhayo gwane, nū gwing'we ni bagūdima.

²¹ Gwike bakūng'wītīla pyī ī yenīyī kūlwa nguno ya lina lyane īkī bataamanile ūyo anitūmile.

²² Ūlū ni natizile kūbawīla ni batī na shibi, alīyo ī haha batī na nzīla ya kwibūūlīla, ū mu kwikala nasho ī shibi shabo.

²³ Ūyo anikolilwe ū nene, ankolilwe nū Baba.

²⁴ Ūlū ni natīītaga milīmo īyo ataalī kwīta munhū ūngī nūūlū ūmò mubo, ni batī na shibi; alīyo ī haha bakūbonaga, hūna bongeja ū kūnikolwa ū nene, nū Baba.

²⁵ Gwike īlībiza gīko kūlwa kūshikīlījiwa kwa mhayo ūyo gwandīkilwe mu shilagīlo shabo gīkī, ‘Banikolilwe dalali!’

²⁶ Ūlū alize ū Ngunanhi ūyo nakūmutūmīla kūfuma kūlī Baba, ū Moyo wa ng'hana, ūyo afumile kūlī Baba, ū ng'wenūyo akūnikaanīla.

²⁷ Nīyo na a bing'we mukūkaanīla, nguno mulī hamò nū nene kūfuma ha wandījo.