Yohana 11 - Bibilia Ilagano Lya Kale 2015

Kūcha kwa ng'wa Lazalo

¹ Munhū nebe akasaata, lina lyakwe Lazalo muna Betania, chalo sha ba Malia na ng'wanong'wawe Malita.

² Ū Malia ūyo nsīzaye akasaata ng'wenūyo, hū ng'wene ūyo akang'witīīla maguta ū Seeba, nī mhambala jakwe ūjipyagūla na nzwīlī jakwe.

³ Hūna lūūlū a bashīke ba shikūlū na shizuna benabo būntūmīla nhūng'wa balīhaya gīkī, “Seeba ūyo ūntogilwe alīsaata!”

⁴ Nang'hwe ū Yesu aho wigwa ūhaya, Ū būsaatu wenūbo būtī bo kūbūlaga, ū boi bo kwenha ikūjo kūlī Mulungu, ū Ng'wana wa ng'wa Mulungu akūjiwe mu nzīla yenīyo.”

⁵ Ū Yesu walī abatogilwe no a ba Malita nū ng'wanong'wawe, hamò nū Lazalo.

⁶ Alīyo nahene nūūlū aho wigwa gīkī walī nsaatu akalenda shikū ibīlī ūko walī kwenūko.

⁷ Ha numa yaho ūbawīla a bahemba bakwe gīkī, “Tūjagi hangī ī Būyudaya.”

⁸ Nabo a bahemba bakwe būng'wīla, “Rabi tūje ko hangī alīyo haaha haaha dūhū a Bayudaya balūkoobaga kūkūbūlaga?”

⁹ Nang'hwe ū Yesu ūbashokeja gīkī, “Ī likanza lya līīmi ū mu lūshikū, lītī na sa ikūmi n'ibīlī? Ū munhū ūlū alīshimīza makanza ga līīmi atūdūla ū kwipama, nguno ī lisana lya mu sī līlīntwimīla.

¹⁰ Alīyo ūlū ūshimīza būjikū, akwipama nguno atī nalyo ī lisana.”

¹¹ Aho wamala kūhaya gīko ūbawīla, Ū nwani ng'wichiswi ū Lazalo olaalile, alīyo nalīja nakaamishe.”

¹² A bahemba bakwe būng'wīla, “Seeba ūlū gīkī alaalile dūhū, akūmisha.”

¹³ Alīyo ū Yesu wahayaga mhayo gwa lūfu lo ng'wa Lazalo; a bene biganika alīhaya mhayo gwa kūlaala tūlo dūhū.

¹⁴ Hūna lūūlū, nose ūbawīla hape ū Yesu; gīkī, Ū Lazalo wazumalīkile!

¹⁵ Gwike nalī na būyegi kūlwa nguno ying'we, īkī naalī natīko koi; mupandīke kūzunya. Na lūūlū tūjagi ūko alī!”

¹⁶ Hūna ū Tomaso, ūyo akitanagwa w'ibasa, ūbawīla a bahemba biye gīkī, “Tūjagi ko nise tūkache hamò nang'hwe!”

Yesu ng'wene bujūūko na būpanga

¹⁷ Hūna lūūlū ū Yesu aho washika ko, ūnsanga wamalile shikū ine alī mu shigila.

¹⁸ Ī Betania yalī hihī dūhū nī Yelusalemu, gītī lūgendo luguhi duhu.

¹⁹ Na Bayudaya bingī baalī biza ū kūbalangamīla a ba Malita nū Malia, kūlwa kūchīlwa na nsīza wabo.

²⁰ Hūna ū Malita aho wigwa gīkī ū Yesu aliza, ūja kūnsūng'wanha; ū Malia ūsaaga mu kaya igashije.

²¹ Ū Malita ūng'wīla ū Yesu gīkī, “Seeba ūlū ni walīho ni atachile ū nsīza wane.

²² Alīyo nī haha namanile gīkī, yose yose īyo ūnomba ū Mulungu akūkwinha dūhū!”

²³ Ū Yesu ūng'wīla, Ū nsīzayo akūjūūka.”

²⁴ Ū Malita ūhaya gīkī, “Namanile akūjūūka mu būjūūko bo kū būkalīkījo w'ikanza!”

²⁵ Ū Yesu ūng'wīla, Ū Nene hū nalī būjūūko na Būpanga, ūyo ūnizunya nūūlū ūcha akūbiza mpanga.

²⁶ Na būlī munhū mpanga ūyo anisanije nene atūcha shiku jose. Ūlīgūzunya ū gwenūyū?”

²⁷ Ū nshīke ūng'wīla, “Alichene Seeba, nazunije gīkī ū bebe hū ūlī ng'wene ū Ng'wana wa ng'wa Mulungu; ū Kilisito ūyo shiigelile ize mu sī!”

²⁸ Aho wamala kūhaya gīko ūja ūūkang'witana ha mhūjo ū Malia, ū ng'wanong'wawe, ūng'wīla, Ūūyū kūūnū ū Nangi, nīyo alīkwitana!”

²⁹ Nang'hwe aho wigwa dūhū ī gīko ūbūūka wangū wangū, ūja ū kūlī Yesu.

³⁰ Ī likanza lyenīlo ū Yesu osangwa ataalī ūko Malita akansangīla, walī ataalī ū kūshikīīla ū mu chalo.

³¹ A Bayudaya abo baalī nang'hwe mu kaya ū Malia bakūnūngūjaga, aho bamona wabūūka wangū wangū ūfuma hanze, nabo būnkūūbīja; nguno bakiganika gīkī hamo wajaga kū shigila akalīle.

³² Hūna ū Malia wahayūshika aho walī ū Yesu, aho wamona ūngwīla mu magūlū, kūnū alīng'wīla gīkī, “Seeba ūlū ni walīho aha ni atachile ū nsīza wane!”

³³ Ū Yesu aho wamona alīlīla na a Bayudaya abo baalī nang'hwe nabo balīlīla, akasaatwa hataale no, ūkoya ū mu moyo.

³⁴ Hūna ūbūja, “Ng'wamīkile halī?” Būng'wīla, “Nzūgū ūlole Seeba!”

³⁵ Ū Yesu ūlīla shisoji!

³⁶ A Bayudaya būhaya gīkī, “Mulībona ūmo walī antogelilwe!”

³⁷ Bangī būhaya, Ūyū angū hū ng'wene ūyo walī wafumbūlile miso ga mboku, ni atanang'hanile nū ng'wenūyo atizūcha?”

³⁸ Ū Yesu aho alīja ū kū shigila ūkoya hangī ū mu moyo. Ī shigila shalī gīt'ihalo; a ha nyango lyūpilingītījiwa hoi iwe itaale lyūlugala.

³⁹ Hūna ū Yesu ūbawīla, “Lyīnjagi ī liwe!” Ū Malita ū ilūmbūye wa mfu ūhaya, “Seeba ī haha alīnung'ha, nguno ū lwenūlū lūshikū lwa kane agumilwe!”

⁴⁰ Nang'hwe ū Yesu ūng'wīla, “Natakūwīlile gīkī ūlū ūzunya ūkūlībona ī likūjo lya ng'wa Mulungu?”

⁴¹ Hūna lūūlū būlyīnja ho ī liwe. Ū Yesu ūbūūcha miso ūlangamīla kwigūlya; hūna ūhaya, “Baba nalīkūlūmba īkī ūkaniigwaga.

⁴² Na namanile gīkī ūkaniigwaga būlī gwa, alīyo ū mhayo gwenūyū nalīgūhaya kūlwa nguno y'ibita īlo lyīmīīlaga aha; bazunye gīkī, ū Bebe hū ng'wene ūyo ūnitūmile.”

⁴³ Aho wamala ū kūhaya ī yenīyo, ūhamuka n'ilaka itaale gīkī, “Lazalo, fumaga hanze!”

⁴⁴ Ūyo walī achile ūfuma akonzeelile myenda ya kūjīkīlwa, na a magūlū gakwe na a makono gatungilwe; nū kū būshū akundīkījiwe shitambaala. Ū Yesu ūbawīla gīkī, “Ntaligūlīlagi muneke aje.”

⁴⁵ Bayudaya bingī abo baalī biza kūbalūngūja ba Malia, aho bībona īyo akīyīta ū Yesu, būnzunya.

⁴⁶ Alīyo bamò babo būja kū Bafalisayo būūkabawīla īyo akībeeja.

⁴⁷ A bagabīji bataale na a Bafalisayo būbilinga ibanza, bandya kwiwīla gīkī, “Ī gete twīte mhayo kī? Īkī ū munhū ng'wenūyū alīja ongeja dūhū ū kūkwīja ī shimanīkījo!

⁴⁸ Ūlū tūng'wiloleela gīko dūhū pye a banhū bakūnsanya, nose a Balumi bakwiza balīkenaagūle ī lipandī lise, nī lihanga lise!”

⁴⁹ Ū ng'waka gwenūyo ū ntaale wa bagabīji walī Kayafa; nang'hwe walī hamò nabo ū ng'wibanza lyenīlo. Na lūūlū ūbawīla gīkī, “Angū a bing'we mutūmanaga,

⁵⁰ nīyo mutitegelejaga gete, gīkī shiigelile munhū ūmò abachīlīle a banhū; lītizūyagala ī lihanga ī lyose!”

⁵¹ Ū mhayo gwenūyo atihayīlile wei ng'wenekīlī dūhū, alīyo īkī ū ng'waka gwenūyo walī ngabīji ntaale. Na lūūlū akahanga, gīkī ū Yesu akūlīchīlīla ī lihanga lya Bayudaya.

⁵² Na hangī ītī ihanga lyenīlo dūhū, alīyo abakuminge pye a baana ba ng'wa Mulungu, abīnje ū mu kūsalang'hana kwabo, abingīje mu būmò.

⁵³ Hūna ū lūshikū lwenūlo ū mu gwīnda yabo būgūshesha ū gwa kūmūlaga ū Yesu.

⁵⁴ Kwīngīīla henaho ū Yesu nang'hwe oya ū kūyeela bo hape hape ū mu Bayudaya; wīnga ū mu sī yabo ūja nabo a bahemba bakwe kū nzengo gwitanagwa Eflaimu, ūyikala kwenūko; hihī na matogolo gatī na banhū.

Kwegela ko Pasaka

⁵⁵ Yahayegeela kūshika pasaka ya Bayudaya, banhū bingī kūfuma hose hose ū mu machalo būlinha ngūlya bajile Yelusalemu, kūja kwiyeeja.

⁵⁶ Aho balī ū mu hekalu būyīmīīla īmīīla bakwilalangījaga balīnkooba ū Yesu, kūnū bakwibūjaga gīkī, “Mulībona ginehe, angū mmho atūleka ū kwiza ū kū shigukulu?”

⁵⁷ A bagabīji bataale na a Bafalisayo baalī babalagīla a banhū gīkī ose ose ūyo alamone ūko alī, abawīle baje bakandime.