Yohana 10 - Bibilia Ilagano Lya Kale 2015

Ndīmi o wiza

¹ “Nalīmuwīla gwa ng'hana gīkī, ū munhū wa kūbītīla kūngī ūlū alingīla mu Lubigili lwa ng'holo, ūleka kūbītīla ha mita, ū ng'wenūyo sambo; hangī nyoli.

² Alīyo ū ndīīmi wajo ī ng'holo akabītīlaga ha mita.

³ Ū ng'wenūyo akalugūlīlagwa nū nang'hani o ha mita, nī ng'holo jikaliigwaga ī lilaka lyakwe, nīyo akajitanaga būlī yene na lina lyayo, wajichilūla.

⁴ Ūlū ūjichilūla akatongelaga, najo jayūnondeela, nguno jilīmanile ī lilaka lyakwe.

⁵ Ū ngeni jitūnondeela, jikūmpeela nguno jitagamanile a malaka ga bageni.”

⁶ Ū Yesu aho wabinha ū lūsumo lwenūlo, bakakīja ū kwīyitegeleja īyo wabawīlaga.

⁷ Hūna lūūlū ū Yesu ūhaya hangī, “Nalīmuwīla gwa ng'hana gīkī, ū nene nalī nyango gwa ng'holo.

⁸ Abo baanitanga ū kwiza, pye a bose basambo na banyoli; alīyo ī ng'holo jitabigwile.

⁹ Ū nene nalī mita, būlī ng'wene ū wa kwingīla kūbītīla mulī nene akūpīla; akwingīla na kūfuma, hangī akūpandīka shilīwa.

¹⁰ Ū sambo atizaga ūlū ītī kūlwa kwiba na kūbūlaga, na kūkenaagūla. Ū nene nizile gīkī ī ng'holo jipandīke būpanga, nīyo bupanga gete!

¹¹ Ū nene nalī Ndīīmi wawiza; ū ndīīmi wawiza akeegaga būpanga bokwe kūlwajo ī ng'holo.

¹² Alīyo ū ng'witūmamīja wa mheela, ūyo jitī jakwe ī ng'holo, ūlū ūbona mhūge īliza akajilekaga wapeela. Yakūhayūshika ī mhūge yandya kūjibūlaga, yūjitaja jūbbalasana!

¹³ Ū wei īkī ng'witūmamīja wa mheela dūhū, atīko ū kūjidīlīla ī ng'holo.

¹⁴ Ū nene nalī Ndīīmi wawiza; najimanile ī jane, nī joi ī jane jinimanile ū nene.

¹⁵ Ūmo animanīlile ū Baba, nū nene h'ūmo naamanīlile ū wei; na nalīweega ū būpanga bone kūlwajo ī ng'holo.

¹⁶ Hangī nalī najo na jingī, ījo jitīmo ū mu lūbīgīlī lwenūlū; najo īnigeleelilwe najenhe, lībize idale līmò, ha sīlīlī ya Ndīīmi ūmò. Nī jene jikūyūliigwa ī lilaka lyane.

¹⁷ Ū Baba anitogilwe kūlwa nguno yenīyī, ī ya kūweega ū būpanga bone, gīkī nabūsole hangī.

¹⁸ Atīho wa kūnitaaja; nene ng'wenekīlī nalībūfunya, nalī na būdūla bo kūbūfunya, hama nalī nabo nū būdūla bo kūbūsola hangī. Ū mhayo gwenūyū nagwanukūla kūfuma kūlī Baba.”

¹⁹ A henaho wigela wikīla kīji hangī ū mu Bayudaya kūlwa mihayo yenīyo.

²⁰ Bingī būhaya gīkī, “Alīkoyiwa lishibu ū ng'wenūyū; nūwe nsaji, wakī mulikala ng'wandegelekaga?”

²¹ Bamò būyūhaya gīkī, “Ī yenīyī ītī mihayo ya munhū w'ishibu; ū w'ishibu adūgije kūfumbūla miso ga babboku?”

Shigukulu sha kwiyeeja

²² Ikanza ilebe mu shikū ja mbeho ya mu shiyaga, ū mu Yelusalemu shikabiza ho shigukulu sha banhū kwiyeeja.

²³ Lwise lūmò ū Yesu aho akūshimīza shimīzaga mu hekalu, ng'wibīndo lya ng'wa Solomoni,

²⁴ kūhayimanīla Bayudaya bampīndya; bandya kūmūja gīkī, “Alīyo ī gete ūkwikala watūzwanjaga maganiko kūshisha nanalī? Ū bebe ūlū ūlī Kilisito tūwīlage hape!”

²⁵ Nang'hwe ū Yesu ūbashokeja gīkī, Ū nene naamalile kūmuwīla ng'ūlema ū kūzunya. Nīyo nī milīmo īyo nakūyītaga mu lina lya ng'wa Baba īkūnikaanīlaga.

²⁶ Alīyo a bing'we mutūzunyaga nguno mutī bamò ba mu ng'holo jane.

²⁷ Ī ng'holo jane jikaliigwaga ī lilaka lyane, nū nene najimanile; nīyo jikanilondeelaga,

²⁸ nane najinha būpanga butashilaga. Hūna lūūlū ī joi jitūcha kūshisha welelo bose; na hangī atīho nūūlū ūmò ūyo adūgije kūjipula ū mu nkono gwane.

²⁹ Ū Baba ūyo waninha alī ntaale kūtinda pye a bose, na lūūlū atīho nūūlū ūmò wa kūdūla kūjipula ū mu nkono go ng'wa Baba.

³⁰ Ū nene nū Baba tūlī ūmò.”

³¹ A Bayudaya būsola mawe hangī gīkī bamponde.

³² Nang'hwe ū Yesu ūbabūja gīkī, “Naamalile kūng'oolekeja milīmo yawiza mingī ī ya kūfuma kūlī Baba; gūlī ginehe ū mu yenīyo ūyo gūlīng'wenheleja kūniponda mawe?”

³³ Nabo a Bayudaya būnshokeja gīkī, “Tūtūkūpondaga kūlwa nguno ya nīmo gwawiza, alīyo kūlwa nguno ya kwigīmba gīkī ūlī Mulungu; ū bebe ūyo ūlī munhū dūhū!”

³⁴ Nang'hwe ū Yesu ūbashokeja alīhaya, “Ī gīsī ū mu shilagīlo shing'we ītandīkilwe gīkī, ‘Nene nahayile, a bing'we mulī bamulungu?’

³⁵ Nose ū Mulungu ūlū alībahaya gīkī bamulungu abo mhayo gokwe gūkabizīīlaga, alīyo nī shandīkwa hū shitīko kulamba,

³⁶ a bing'we ūyo wejiwa na Baba ūtūng'wa mu sī, hū mulīng'wīla gīkī, ‘Ūlī n'ibengwe;’ īkī nalīhaya nalī Ng'wana wa ng'wa Mulungu?

³⁷ Ūlū natūbeejaga milīmo ya ng'wa Baba lekagi ū kūnizunīlīja.

³⁸ Alīyo ūlū nalībeeja, nūūlū īkī mutūnisanyaga ū nene, īzunyagi ī milīmo mupandīke kūmana na kwitegeleja gīkī ū Baba alī mulī nene, nū nene nalī mulī Baba!”

³⁹ A henaho hangī būgaagaana kūhaya kūndima, alīyo ū wei ūbijimīīja ūbiza wīnga ū mu makono gabo.

Seeba ng'wene bupanga

⁴⁰ Ūja hangī kū nkīlo gwa Yolodani, ūūkikala kwenūko; ūko Yohana akandīja kūbatīīja.

⁴¹ Aho alī kwenūko bingī būyiza koi, nīyo būyūhaya gīkī, “Ī chene ū Yohana atabeegije shimanīkījo shose shose, alīyo ī mihayo īyo wang'hayaga ū munhū ng'wenūyū, pyī ya ng'hana!”

⁴² Nū kwene būkwīla a ba kūnzunya.