Yohana 1 - Bibilia Ilagano Lya Kale 2015

Mhayo kūbiza mīlī

¹ Kūfuma ha wandījo walīho Mhayo; nang'hwe ū Mhayo walī hamò na Mulungu; nīyo ū Mhayo ng'wenūyo olī Mulungu.

² Ū wei alī hamò na Mulungu kūfuma haho wandījo.

³ Pyī ī shikolo shubeejiwa mu nzīla yakwe, hama ūlū ni atī wei ni shitabeejiwe nūūlū shimò, ū mu shose īsho shibeejiwe.

⁴ Ū mulī wei būlīmo būpanga. Ū būpanga wenūbo būlī isana lya banhū.

⁵ Ī lisana līkwaakaga mu giiti, nīyo ī giiti shitūdūla ū kūlīheeba!

⁶ Akilonga munhū walī atūmilwe kūfuma kūlī Mulungu, lina lyakwe Yohana.

⁷ Ū munhū ng'wenūyo akiza kūlwa būkaanīji, alīkaanīle ī lisana, gīkī pye a bose bazunye kūlwa nguno yakwe.

⁸ Ū wei walī atī ī lisana lyenīlo, alīyo akiza gīkī afunye būkaanīji, kūlīkaanīla ī lisana lyenīlo;

⁹ Ī lisana lya ng'hana, īlo lizaga ū mu sī kūlwa kūng'wakīla būlī munhū.

¹⁰ Walī mu sī; nīyo ī sī īkabeejiwa mu nzīla yakwe, alīyo a ba mu sī batang'witegelegije.

¹¹ Akiza kū bakwe, gwike a bakwe batang'wanukūlile.

¹² Alīyo pye abo bakūng'wanukūla na kūlīzunya ī lina lyakwe, akūbinha būdūla bo kūbiza baana ba ng'wa Mulungu;

¹³ abo batī ba kūbyalwa mu nhūngwa ja mīlī, nūūlū ītī mu kūsola na kwikūmva kwa banhū, alīyo kūfuma kūlī Mulungu.

¹⁴ Ū Mhayo akabiza munhū, wigasha hamò nise. Nī likūjo lyakwe tūūlībona, ikūjo gītī lya Myalwa ūmò wike ūyo afumile kūlī Sīswe, okolile shigongo na ng'hana.

¹⁵ Ū Yohana akahamuka n'ilaka lya higūlya akūnkaanīlaga alīhaya gīkī, Ūyū hū ng'wene nakang'haya gīkī, ‘Ūyo aliza ha numa yane alī ntaale wane, nguno ū wei anitangile ū kūbiza ho.’

¹⁶ A bise bose tūkwanukūlaga mbango ja būlī mbika kūfuma kūlī we, ūyo okolile na kokolīle kose.

¹⁷ Nguno ī shilagīlo tūkinhwa mu nzīla ya ng'wa Musa; alīyo ī haha shizile shigongo na būtūngīlīja mu nzīla ya ng'wa Yesu Kilisito.

¹⁸ Ndūhū munhū nūūlū ūmò ūyo wabīta kūmona Mulungu ikanza lyose lyose; Myalwa ūmò wike, ūyo alī Mulungu hamò na Sīswe; h'ūyo wang'oolekije!”

Būkaanīji bo ng'wa Yohana

¹⁹ Ūbū hū būkaanīji bo ng'wa Yohana, aho Bayudaya ba Yelusalemu bakatūma bagabīji na Balawī kūjūmūja gīkī, Ū bebe, ūlī nani?”

²⁰ Akahaya hape, atabisile nūūlū hado; ūbawīla gīkī, Ū nene natī Kilisito.”

²¹ Būmūja hangī gīkī, “Hama lūūlū ū bebe ūlī nani ī gete, kolaga ūlī Eliya?” Ūhaya hangī, “Natī ng'wene!” “Hamo ū bebe hū ūlī ng'wene ū Ng'hangi?” Ūshosha hangī, “Mm, yaya.”

²² Hūna būng'wīla hangī gīkī, “Hama ūlī nani lūūlū? Tūtogilwe ishosho lya kūbatwalīla abo batūtūmaga; ū bebe ūlihaya ginehe?”

²³ Ūhaya, “Nal'ilaka līkūhamukaga mu matogolo; gīkī, ‘Goloolagi nzīla ya ng'wa Seeba;’ gīt'ūmo ng'hangi Isaya ahayīlile.”

²⁴ Abo baalī batūng'wa baalī bafuma kū Bafalisayo;

²⁵ hūna būmūja balīhaya gīkī, “Hama nibūlī lūūlū ūkūbatīījaga, ūlū ūtī Kilisito nūūlū Eliya, nūūlū ū Ng'hangi ng'wenūyo?”

²⁶ Nang'hwe ū Yohana ūbashokeja ūhaya gīkī, Ū nene nakūbatīījaga na minzī; alīyo alīho ūmò wīmīīlaga hamò ning'we, ūyo mutaamanile a bing'we.

²⁷ Hū ng'wene ūyo aliza ha numa yane, nīyo ū nene natigeleelilwe nūūlū kūtaligūla matungījo ga shilatū shakwe ū wei!”

²⁸ Pyī ī yose īyī īkīītwa Betania kū nkīlo gwa Yolodani, ūko wabatīsījaga ū Yohana.

Ng'wana wa Ng'holo

²⁹ Kū ntondo yaho ū Yohana ūmona ū Yesu aliza kūlī wei: Ūhaya gīkī, “Nolagi ū Ng'wana wa Ng'holo wa ng'wa Mulungu, ūyo alī mūcha wa shibi sha ba mu sī.

³⁰ Ū ng'wenūyū hū ng'wene ūyo nakamuwīla gīkī, ‘A ha numa yane aliza munhū ntaale kūtinda ū nene, nguno ū wei anitangile ū kūbiza ho.’

³¹ Ū nene naalī nataamanile, alīyo nizile nakūbatīījaga na minzī gīkī amanīke hape ū kū Baisilaeli.”

³² Hangī ū Yohana ūkaanīla alīhaya gīkī, “Namonile ū Moyo alika kūfuma ng'wigūlū, alī mu mīlī gītī gwa ng'hūūlū; wiza ūlembeela a halī we ū ng'wenūyū.

³³ Ū nene naalī natandeebile, alīyo ūyo akanitūma kūbatīīja na minzī, akaniwīla gīkī, ‘Ūyo ūlamone Moyo wang'wikīīla na kūlembeela halī wei, ū ng'wenūyo hū ng'wene ūyo akūyūbatīīja na Moyo Ng'wela.’

³⁴ Na ng'hana naabonile; hūna lūūlū nalīkaanīla, gīkī ū ng'wenūyū alī Ng'wana wa ng'wa Mulungu.”

Bahemba ba kwandya

³⁵ Ū kū ntondo yaho hangī, ū Yohana walī wīmīīla na babīlī ba bahemba bakwe.

³⁶ Ūmona ū Yesu alīshimīza; ūhaya gīkī, “Nolagi ūūyo ū Ng'wana wa Ng'holo wa ng'wa Mulungu!”

³⁷ A bahemba a babīlī benabo aho bang'wigwa alīhaya gīko, būnondeela ū Yesu.

³⁸ Ū Yesu wikībūka ūbabona balīnondeela, ūbabūja gīkī, “Mulīkooba kī?” Būng'wīla, “Rabi (makūlū gaho Nangi), ūkwikalaga halī?”

³⁹ Nang'hwe ūbawīla, “Nzugwi ning'we mkubona.” Būja nang'hwe ng'hana, būūkabona aho wikalaga, būdīla nang'hwe ū lūshikū lwenūlo; gaalī makanza ga sa gītī ikūmi.

⁴⁰ Ūmò wa babīlī benabo, abo bakang'wigwa ū Yohana būnondeela Yesu, walī Andulea; ng'wanong'wawe na Simoni Petelo.

⁴¹ Ū ng'wene akajūnkooba tame Simoni ng'wanong'wawe; ūng'wīla gīkī, “Twamonaga ū Masīya, (makūlū gaho Kilisito).”

⁴² Ūntonga ū kūlī Yesu. Ū Yesu aho wamona ūhaya, Ū bebe ūlī Simoni ng'wana Yohana, ūkūbizitanwa Kefa (kūshomeleja kwaho Petelo).

⁴³ Ū kū ntondo yaho ū Yesu ūja Galilaya, ūmona Filipo ūng'wīla, “Nilondeelage.”

⁴⁴ Ū Filipo walī muna Betisaida, nzengo ūyo gwalī gwa fumo ya ba Andulea na Petelo.

⁴⁵ Nang'hwe ū Filipo aho wamona Natanaeli ūng'wīla gīkī, “Twamonaga ūyo andīkilwe mu shilagīlo sha ng'wa Musa, na mu bahangi; Yesu wa Nazaleti, ng'witūnja wa ng'wa Yosefu.”

⁴⁶ Ū Natanaeli nang'hwe ūng'wīla gīkī, “Shikolo kī shawiza shidūgije kwilonga kūfuma Nazaleti?” Ū Filipo ūng'wīla, “Nzūgū ūkūbona!”

⁴⁷ Ū Yesu aho wamona ū Natanaeli aliza kūlī we ūhaya, Ū yū ng'wene Ng'wisiraeli wa Baisilaeli gete, ū mulī we ndūhū būka bose bose!”

⁴⁸ Nang'hwe ū Natanaeli ūng'wīla, “Wanideeba ginehe?” Ū Yesu ūnshokeja ūng'wīla, “Naakūbonaga kūfuma aho ataalī kūkwitana ū Filipo, aho olī wīmīīlaga mu mbeho ya ntini.”

⁴⁹ Ū Natanaeli ūnshokeja ūng'wīla, “Rabi nabona gīkī ū bebe ūlī Ng'wana o ng'wa Mulungu; ūlī Ntemi o Baisilaeli.”

⁵⁰ Ū Yesu ūnshokeja ūng'wīla, Ū bebe hū wazunya īkī nakūwīla gīkī naakūbonaga kūfuma aho olī wīmīīlaga mu mbeho ya ntini? Ūkūbona mitaale kūtinda īyī.”

⁵¹ Ongeja kūng'wīla, “Nīyo nalīmuwīla gwa ng'hana gīkī mukūlībona ī ligūlū lyalugūkaga, na bamalaika ba ng'wa Mulungu balīyūlinha ko, hangī bika a halī Ng'wana wa Munhū!”