Yelemia 8 - Bibilia Ilagano Lya Kale 2015

¹ Ū SEEBA alīhaya gīkī, “Ū ng'wikanza lyenīlo, maguha ga batemi na ga bataale ba Yuda, na maguha ga bagabīji na ga bahangi, na maguha ga bazengi ba mu Yelusalemu gakūjūkūūlwa ū mu shigila.

² Gakūsambaagījiwa ha ng'wape, kū būtongi bo līīmi na ng'weji nī sonda pyī ī ja kwigūlū, shikolo īsho baalī bashitogilwe na bashitūmamīlaga; h'īsho bashilondeelaga na kūkooba būgunanhwa kūfuma kūsho, na bashilamyaga. A maguha genayo gatūbilingwa nūūlū kūjīkwa; alīyo gakūbiza gītī ndeelya jisambaalile higūlya ya sī.

³ Ū SEEBA wa mabità alīhaya gīkī, būlī kwene ūko nūbasalang'hanīja a banhū ba būshiigo ū mu shibyalīlwe shabūbi īshi, pye a bose bakwikūmvwa kūcha, kūtinda kwikala bapanga.”

Ī shibi shilī na nsango gwasho

⁴ Bawīlage hangī gīkī, “A banhū ūlū būūgwa batabūūkaga? Ūlū munhū wīnga mu nzīla, atagalūkaga washoka mo hangī?

⁵ Nibūlī lūūlū a banhū benaba bīnga ū mu nzīla? Nibūlī ī Yelusalemu īkikalaga Ītīmo ū mu nzīla? Badimīīlile būlomolomo, balemile ū kūgalūka.

⁶ Ū nene nakūdegelekaga mu welwa ng'holò, alīyo batalūngalūngaga mitengeke; atīho nūūlū ūmò wa kūgalūka alekane nabo ū būbi bokwe, atīho wa kūhaya: “Nibūlī nalīīta mhayo gūlī gīkī?” Būlī ng'wene akalondeelaga yakwe dūhū, gītī falasa īlīpeela ījile kū būlūgū.

⁷ Nūūlū ī lweelwe īyo īkalalaga kwigūlya īlīmanile ī likanza īlo īhelelilwe, pyī nī mhunda nī gulumambī; būyaga na ng'oong'oli jose, jigalang'hanile a makanza gajo ga kūsaama. Alīyo a banhū bane batīmanile īyo ayītogilwe ū SEEBA.

⁸ Mukūhaya ginehe ī gīkī, “A bise tūlī na masala nguno tūlī nasho ī shilagīlo sha ng'wa SEEBA,” alīyo ū kūnū a bandīki ba shilagīlo bakwītūmamīlaga ī kalamu kwandīka ya būlomolomo?

⁹ A ba masala bakūgooka, bakūgwashiwa bazwangane. Ī gīsī īkī bagūlemile ū mhayo go ng'wa SEEBA, masala kī nago a genayo?

¹⁰ Alilūūlū, a bake babo nakūbinha bagosha bangī, na a malaale gabo nakūbagabīla banhū bangī. Bose pye ūmo bagelelile balī na lwahahi kū sabo, kwandīja bado kūja kū bataale. Ū ng'hangi atikīlile nū ngabīji, bose bakatūmamīlaga būlomolomo.

¹¹ Ī lilonda lya banhū bane bakalīlagūlīlaga minala, bakalībambaga higūlya gūlya, kūnū būhaya, ‘Mhola mhola;’ alīyo ītīho ī mhola!

¹² Ahene bakaachaga soni ū kwīta Ī ya malofu? Mm, biya, batī na soni na hado yaya; nūūlū ū gwa kūcha minala batagūmanile. Alilūūlū, nabo bakūchīla ū ng'wigelè lya babūlagwa. Bakūgwa ūlū lyūshika ī likanza lya kwinhwa nsango, alīhaya SEEBA.

¹³ “Ū SEEBA alīhaya gīkī, ‘Nakūbīngīja īsho bakagesaga. Ī mizabibu ītūtwaaja ī zabibu, nī tiini jitūbizamo ū mu mitiini; a madūūtū gayo gakūūma. Īsho naabinha bakūtaajiwa.’”

¹⁴ Nibūlī tūtaalī twigashaga? Twibilingagi tūpeelele kū mizengo īpīndīlīgije ndugu tūkache kwenūko! Nguno ū SEEBA Mulungu wise watūbalīlile lūshilo, ūtwinha minzī ga kūng'wa gasangije būsūngū, nguno twang'wītīla shibi.

¹⁵ Twalisagīlwa kūpandīka mhola, alīyo gūtilongile gwa kūpya; n'ikanza lya kūpīla, alīyo twagwīlilwe lyogohya itaale.

¹⁶ Ī falasa ja banishi jikūpogomaga, tūkūjiigwaga kūfuma Dani. Ī nzagamba ja falasa jabo jikūdaayaga yadetema pyī ī sī. Bizile kwīgabbula pyī ī sī nī shose īsho shilīmo, nū nzengo na a bikaji baamo.

¹⁷ Ū SEEBA alīhaya, “Managi gīkī nakūmutūmīla nzoka ja būsūngū jiyūmuluma, ng'hoboko ījo jitī na būlagūlīle.”

¹⁸ Ee nūngūja mu būpīna wane, Ī ng'holò yane īlī n'isūngū itaale.

¹⁹ Degelekagi, ng'hūngū ya banhū bane īlīfuma kū sī ya kūle: “Ū SEEBA atīho ī Sayūni? Ū Ntemi waamo atīmo ī shikū īji?” “Nibūlī balīniikoloosha banisaayīche kūlwa mashigīmbo gabo, na mashiikolile gatī na ngofyoolo ayo gakalamiagwa mu mahanga?”

²⁰ “Ī likanza lya magesa lyabītile, nī chū shashikaga kū ng'halīlo, alīyo tūtaalī ū kūpījiwa.”

²¹ Ū kūsheedekejiwa kwa banhū bane hū kwane nū nene, nakwilīlaga mazumanda, naagwīlilwe igekemaja.

²² Ū mu Gileadi ītīmo ī mitī ya kūlagūlīla? Atīmo moi nūūlū mfumu? Nibūlilūūlū a magulaagīje ga banhū bane gatūpīlaga?