Yelemia 7 - Bibilia Ilagano Lya Kale 2015

Kūlamya shiikolile gūtī na ngofyoolo

¹ Ū mhayo ūyū gūkiza kūlī Yelemia kūfuma kūlī SEEBA gūhaya:

² Īmīīlaga a ha mita gwa numba ya ng'wa SEEBA, ūgūhaye ū mhayo ūyū ūlī henaho; gīkī, “Bīng'we banhū ba Yuda abo mukabītīlaga ha mibità īyī kwiza kūnamya SEEBA, gūdegelekagi ū mhayo go ng'wa SEEBA.

³ Ū SEEBA wa mabità, ū Mulungu wa Isilaeli, alīhaya gīkī, Galūchagi ī nhūngwa jing'we nī shītwa shing'we, hū nakūmuleka ng'wikale ū ng'wipandī lyenīlī.”

⁴ Yaya ū kwikala ng'ūsanya mihayo ya kwilembagūla mulīhaya, “Īyī yene hekalu ya ng'wa SEEBA, hekalu ya ng'wa SEEBA, hekalu ya ng'wa SEEBA!”

⁵ Ūlū ng'ūgalūcha ng'hana ī nhūngwa jing'we nī shītwa shing'we, ng'ūbiza na shītwa shitūngīlīgije būlī ng'wene ū kū biye;

⁶ ūlū ng'oya ū kūbiboneela a balobeji na a bapīna, na a bachīlwa, na a banhū abo batī na shilingo ng'oya kūbabūlagīla ū ng'wipandī īlī; na a bamulungu a bangī ng'oya ū kūbalondeela, nguno ū mhayo gwenūyo gūlī gwa kūmuminya bīng'we benekīlī;

⁷ a henaho hū nakūmuzunīlīja ng'wikale ū ng'wipandī lyenīlī; ū mu sī īyo naabinha bakūlūngeji bing'we welelo bose.

⁸ Alīyo a bīng'we musanije mihayo ya kwilembagūla, īyo ītī na ngofyoolo.

⁹ A bīng'we mukwikala ng'wiba na kūbūlaga banhū, na kūshihya, na kūlahīla nyamaama, na kūmfunīja būbbani Baalī, hamò na kūlondeela bamulungu bangī abo mutabamanile,

¹⁰ hūna ng'wiza kwīmīīla mu būtongi bone ū mu numba yenīyī, īyo īkitanīlagwa kū lina lyane, ng'walinhya kūhaya, “Tūlī mhola no,” mhola ng'wikale mukwītaga mihayo ying'we ya malofu?

¹¹ Ī numba yenīyī, īyo īkitanīlagwa kū lina lyane, yabizile ipilinga lya basambo ū kū bīng'we? Alīyo managi gīkī, ū mhayo gwenūyū nagūbonile dūhū, alīhaya SEEBA.

¹² Jagi ī Shilo ī haha, ū kwipandī īlo nakandya kūtūūla wikalo kūlwa lina lyane; jagi ko mukībone īyo nakalyītīla ī lipandī lyenīlo kūlwa nguno ya būbi wa banhū bane a Baisilaeli.

¹³ Aho ng'wīyītaga pyī ī yenīyī, alīhaya SEEBA, nikalaga nakūmuwīlaga ng'hangala na ng'hangala, alīyo ndūhū ū kūdegeleka; nūūlū nang'witana ng'walī mutidīkaga.

¹⁴ Alilūūlū, īyo nakīyīta ū kū nzengo gwa Shilo, nakwīyīta nī haha ū kū numba īyo īkitanīlagwa kū lina lyane; ī hekalu īyo ng'wisanije, ī lipandī īlo naang'winha bīng'we, hamò na a bakūlūgenji bing'we.

¹⁵ Nakūmuponya kūle, ng'wīnge ū mu būtongi wane; gīt'ūmo nakabaponeja badūgū bing'we, a banhū ba Efulaimu pye a bose.

¹⁶ Lekaga ū kūbalombela a banhū benaba, nūūlū kūnilīlīīla na kūnikūmbīlīja kūlwa nguno yabo; lekaga gete ū kūnidayīīla; nguno natūkūdegeleka.

¹⁷ Ū bebe ūtībonaga īyo bakwīyītaga ū mu mizengo ya Yuda, nū mu mayīla ga Yelusalemu?

¹⁸ A banīgīnī bakūsenhaga ng'hwi, a basaabo baapemba moto, hūna a bakīma baaluba mbilya kūlwa kūmeegeja migatī Ngole wa Ng'wigūlū; na shakwinha sha kūng'wiwa bakūfunyaga kūlwa bamulungu bangī, bongeja kūnipelanya ū nene.

¹⁹ Ī gīsī nani ūyo bakūng'wikolooshaga, ū nene ūyū? Alīhaya SEEBA. Ītī gīkī bakwiminyaga boyi benekīlī dūhū bagwe mu magooke?

²⁰ Hūna lūūlū, ū Seeba MULUNGU alīhaya gīkī, Ū būdaki nū būpelanu bone būkūliidīkīla ī lipandī lyenīlī, būbidīkīle a banhū, nī mitugo, pyī nī mīti ya mu matogolo, na a matwajo ayo galīmo ū mu sī; būkūbaka gītī moto gūtī na būjimīje.

²¹ Ū SEEBA wa mabità, ū Mulungu wa Isilaeli alīhaya gīkī, Ī shakwinha shing'we sha kūpemvwa shisangījagi nī shitambò shing'we ī shingī, mulye bīng'we ī nyama.

²² Nguno ū ng'wikanza lya kūbīnja Misili a bakūlūgenji bing'we, aho nalīyomba nabo, natagelelile kūbawīla mihayo ya shitambò sha kūpemvwa na shitambò dūhū.

²³ Alīyo nakabinha nī shilagīlo īshi; gīkī, Niigwagi, hū nakūbiza Mulungu wing'we, na a bīng'we mukūbiza banhū bane. Shimīzīlagi ū mu nzīla pyī ījo nalīmulagīla, ī mihayo ying'we īkūgololoka.

²⁴ Alīyo batadegelekile nūūlū kūdīlīla yaya, a ha ng'wanya gwaho būyūlondeela kasolele kabo dūhū kūlwa būgang'hanazu wa ng'holò jabo jabūbi; bongeja kūshoka kū numa, batajile kū būtongi.

²⁵ Kūfuma lūshikū lwa bakūlūgenji bing'we kwīnga mu sī ya Misili kūshisha lelo īyī, nakishokeelaga kūmutūmīla batūmami bane, a bahangi ng'hangala na ng'hangala, ntondo na ntondo.

²⁶ Alīyo batanidegelekile nūūlū kūnidīlīla. Baalī na mitwe midiimu no, kūtinda a bakūlūgenji babo.

²⁷ Ūkūbawīla pyī ī mihayo yenīyī, alīyo batūkūdegelaka, nū kūbitana ūkūbitana alīyo batūkwidīka.

²⁸ Alilūūlū bawīlage gīkī, “Ī lyenīlī h'ī lihanga lya banhū abo balemile kūng'wigwa SEEBA Mulungu wabo, nūūlū kūlondeela kahūgūlīle kakwe. Ī ng'hana īchile, ītīmo ū mu milomo yabo.

²⁹ Jimoogage ī nzwīlī jako ūjiponye, līlaga ng'hūngū kū magūlya makalamuku; ū SEEBA washilemile ī shibyalīlwe shenīshi, ūshileka na ūshileka, nguno shilī ha sīlīlī ya būpelanu bokwe.”

Būbūlagi mu Beni-hinomu

³⁰ Ū SEEBA alīhaya gīkī a banhū ba Yuda baanītīlile mibi no. Baatūūlile shiikolile shabo sha malofu ū mu numba īyo īkitanīlagwa kū lina lyane, bīsosohagije.

³¹ Na mapandī gabo ga higūlya ga Tofesi baagazengelile mu longa lwa Beni-hinomu, gīkī ū ng'wenūmo bayūboocha mu moto bitūnja na bashīke babo, mhayo ūyo natagūlagīlīle nene, nūūlū gūtaalī kwingīla mu maganiko gane.

³² Alilūūlū itegelejagi, ū SEEBA alīhaya gīkī, jikwiza shīkū ī lipandī lyenīlo līkoya ū kwitanwa Tofesi nūūlū longa lwa Beni-hinomu, alīyo lūkūbiza longa lwa bafu, nguno bakūbajīka a bafu babo ū mu Tofesi, kūshisha gūtūsaaga ho ng'wanya gwa kūjīkīla hangī.

³³ Hūna lūūlū ī mibimba ya banhū benaba īkūbiza shilīwa sha noni ja kūlala, na shiinū ja mu matogolo, na atūbiza ho ose ose wa kūjipeeja jīnge.

³⁴ Ū mu mizengo ya Yuda na a mapanda ga Yelusalemu, nakūgīnja a malaka ga būyegi na būzalabanu, na a malaka ga batoolwa na batooji; nguno ī sī īkūbiza dalali.