Yelemia 6 - Bibilia Ilagano Lya Kale 2015

Yelusalemu kūgobanīlwa

¹ Bīng'we lūganda lwa ng'wa Benjamini, peelagi ng'wipīje; Peelagi ng'wīnge ī Yelusalemu! Ng'ang'ajagi nhaaninga ū mu Tekoa, nī Beti-hakelemu īnungīnjagi lūbembeela! Nguno mayanga galīfuma sukuma, galiza galī mu nzīla ī haha; būkenaagūji būtaale nīyo no.

² Nakūgūkenaagūla ū nzengo gwa Sayuni; ū goi ī chene nzengo soga, hangī gūgaliililwe chiza no.

³ Badīīmi bakwiza na madaale gabo ga ng'holo bagūdumīle, bakūkoma mahema gabo bagūgobanīle. Būlī ng'wene akūdima ipandī lyakwe lya kūdīīmīla.

⁴ Malīīlagi kūlwa būlūgū mukalwe nago! Būūkagi tūje tūkagūdumīle līmi nyange. Agaya, nī gīsī lyagwa būlī ī līīmi, nī minengeeji ya mhīndī yalīha.

⁵ Yūū, nahene ndūhū ū mhayo, tūkūja būjikū tūkandumīle, tūkajikambagūle ī ndugu jakwe Ījo jimpīndīlīgije!

⁶ Ū SEEBA wa mabità alīhaya, “Temagi mitī mubeeje matūūgo ga kūlinhīla mugūgobanīle ū nzengo gwa Yelusalemu; ū goi shiigelile gwinhwe nsango, nguno gookalile wiboneeji no.

⁷ Ūmo lūzwīlo lūkapumunhīlaga minzī gaalo, nū nzengo gwenūyo h'ūmo gūkapumunhīlaga ū būbi wago. Wiboneeji na būkenaagūji shikigwiagwa moi. Ī ndwala na a magulaagīje gaamo shilī kū būtongi wane shikū jose.

⁸ Ee Yelusalemu, chagūkaga, ūlū ītī chene nakūgalūka nakūleke, nī sī yako nīleke ībize buyīkī ītī na wa kwikala mo.”

⁹ Ū SEEBA wa mabità alīhaya, “Ni babagoodage mu welwa nhgolò pye abo basaagīīlile ū mu Isilaeli gītī masaagīīlwa mu nzabibū; bītyagi nkono hangī ū mu matambī, gītī nyobi wa mizabibu akūgoodaga.

¹⁰ Nani ūyo nang'wīle igwe ahūgūke? Alīho nani ū wa kūnidegeleka? A matū gabo gachibīgije batūdūla ū kwigwa; ū mhayo go ng'wa SEEBA gūkūbipamyaga a boi, batī na būyegi nago.

¹¹ Alīyo ū nene nookalile būpelanu bo ng'wa SEEBA, nalīlemeelwa ū kūbūhangīja. Būhooleelage ū kū banīgīnī ū mu mapanda, na a badinha ū mu magelè gabo ūmo bakibilingīlaga; na a batooleke munhū na nke būkūbihoolekela; na a bakūji būkūbakūbanīja, kūja kū bakuu kuu ku.

¹² Nakūgūgoloola ū nkono gwane nilwishe nabo a bikaji ba mu sī, ī numba jabo jikūja na banhū bangī, pye na a malaale gabo; būyaga na a bake babo,” alīhaya SEEBA.

¹³ Bose pye ūmo bagelelile balī na lwahahi kū sabo, kwandīja bado kūja kū bataale. Ū ng'hangi atikīlile nū ngabīji, bose bakatūmamīlaga būlomolomo.

¹⁴ Ī lilonda lya banhū bane bakalīlagūlīlaga minala, bakalībambaga higūlya gūlya, kūnū būhaya, “Mhola mhola;” alīyo ītīho ī mhola!

¹⁵ Ahene bakaachaga soni ū kwīta Ī ya malofu? Mm, biya, batī na soni na hado yaya; nūūlū ū gwa kūcha minala batagūmanile. Alilūūlū, nabo bakūchīla ū ng'wigelè lya babūlagwa. Bakūgwa ūlū lyūshika ī likanza lya kūbinha nsango, alīhaya SEEBA.

¹⁶ Ū SEEBA alīhaya gīkī, “Īmīīlagi ha nzīla maaka mulole, mujigīsīlīje ī nzīla ja kale, mubūje ūko īlī ī nzīla ī nhengeke; muyūshimīzīla ng'wenūmo, hū jikwifuula ī ng'holò jing'we. Alīyo a makoye ging'we mulemile, muhayile gīkī, ‘A bise yaya ū kūshimīzīla ng'wenūmo.’

¹⁷ Nakamutūūlīla bahūgūji, nūmuwīla gīkī, ‘Līdegelekagi ī lilaka lya nhaaninga!’ Alīyo ng'ūlema mulīhaya, ‘Tūtūdegeleka.’

¹⁸ Alilūūlū, igwagi bīng'we mahanga, deebelagi bīng'we mabità, yitegelejagi īyo īlī hihī kūbagwīla.

¹⁹ Ee bebe sī, īgwaga! A banhū benaba nalībenhela mayanga, itwajo lya mihayo īyo bakīhelaga; nguno batatogilwe ū kwīdegeleka Ī mihayo yane, nī shilagīlo shane bashilemile.

²⁰ Ū nene nalī na nīmo kī nabo ū būbbani bo kūfuma Sheba; nūūlū ī dalasini ja ng'waso gwawiza, Ī ja kūfuma kū sī ja kūle? Ī shītambo shing'we sha būlī mbika, nī shitambò sha kūpemvwa shitūdūla ū kūniyeja, shitīko ū kwanukūlwa.”

²¹ Alilūūlū, ū SEEBA alīhaya gīkī, “A banhū benaba nakūbatūūlīla mashikī ga kūbipamya; gakūbipamya a babyaji na baana pye a bose; bazenganwa na banwani bakūyagaala.”

²² Ū SEEBA alīhaya, “Managi gīkī ibità līlī mu nzīla līliza kūfuma sī ya sukuma, ihanga itaale līkwigolanyaga kwīngīīla kū mapandī ga kū būkalīkījo wa sī.

²³ Babūūkije būta na machimu; bakalī no, hangī batī na shigongo, badamhīlile falasa jikūpogomaga gītī ng'huutumo gwa nyanza. Bizile bamanukile ūmo bashilikale bakīītīlaga ūlū bajile kū būlūgū; baliza kūkūdumīla Ee, Sayūni.”

²⁴ Twalwigwile ū lūkumo lwabo, gonzololokile no a makono gise, twagwīlilwe būpīna būdito; būsūngū watūdimile gītī nkīma alī ng'wikanza lya kūbyala.

²⁵ Lekagi ū kūja kū malaale, yaya nū kūyeela yeela mu mapanda; nguno alīho ng'wanishi na shilanga shakwe, būlī kwene īlīho mihayo mibi ya kūdetemya.

²⁶ Ee, banhū bane zwalagi shizwalo sha magūnīla, galagalagi na mu mabu. Līlagi mutūle ng'hūngū mu kūsaatwa kūtaale, gītī munhū akūnīlaga ng'wana, myalwa wakwe ūmò wike. Nguno ū nyagaja akūtwifumbūkīja, akūtūsanga tūtamanile.

²⁷ Naakwītile kūbiza gītī ngemi wa chūma, ūkūbagema a banhū bane jimanīke Ī nzīla jabo; ūmo chūma shikagemelagwa bo kūbītiwa mu moto.

²⁸ Nguno pye a bose bagomi hangī bagūnu no, bakajaga balībība būsīīgani wabo, būlī kwene ūko balībītīla. Badiimu no gītī shaba na chūma, a bose balī na shītīle shabūbi.

²⁹ Ī miguba īkūfugutaga no, nū moto go kwaabīja būsoso mu chūma nsebu kīngī nasho. Gwike ū nīmo gwa kūsheeja ī chūma gūlīcha mpandagīlo, nguno a babūbi bataalī ū kūshila.

³⁰ A benabo h'abo bakwitanagwa makamba kamba ga feza, nguno ū SEEBA wabalemile.