Yelemia 50 - Bibilia Ilagano Lya Kale 2015

Mhayo kūlwa Babuloni

¹ Ū mhayo ūyū akagūhaya ū SEEBA mu nzīla ya ng'hangi Yelemia kūlwa nguno ya Babuloni, kūlwa sī ya Bakalidayo.

² “Gūkumūchage ū mu mahanga, tūlaga kaluulu, nunjaga lūbembeela ūgūkumūche. Yaya ū kūbisa shose shose, hayaga gīkī, ‘Ī Babuloni īkūding'wa, ū Beli akūpondwa soni, ū Melidaki akūzwangana, a mashigīmbo gakwe gakūgooka, a mashiikolile gakwe gakūzwangana.’

³ Ihanga līkwīngīīla sukuma lize kūndumīla, ī sī yakwe līkwīleka īlīdalali. Atilonga wa kwikala mo, a banhū bakūsaama mo, pye nī dimu.

⁴ Ū mu shikū jenījo, nī likanza lyenīlo,” alīhaya SEEBA, “A banhū ba Isilaeli na a ba Yuda, pye a bose bakūja balīīlīla bakūnkoobaga SEEBA Mulungu wabo.

⁵ Bakūgīsīlīja ūko īlī ī nzīla ya kūja Sayuni; h'ūko bakūgalūkīla. Bakwiza bisangīje kūlī SEEBA mu nzīla y'ilagane lya būja na būja, Īlo lītī lya kwīwa.

⁶ A banhū bane baalī babiza ng'holo jijimīīlile; a badīīmi bajo baalī bajitaja, būjenheleja kūtagaalīja kūyikala mu ngūlū; jūbiza ja kūja jikūyūngaga sagala mu ngūlū nhaale na ndo, Ī numba jajo jīyīība.

⁷ Ose ose ū wa kūjibona wajilyaga; a banishi a bene būyūhaya gīkī, ‘A bise tūtī na būhūbi, nguno boi benekīlī bankenya ū SEEBA, ūyo al'idīīmīlo lyabo lya ng'hana, ū SEEBA ūyo alī kwisagīlwa kwa bakūlūgenji babo.’

⁸ Peelagi ī Babuloni; Īngagi ū mu sī ya Bakalidayo, bizagi gītī ngulyati Ījo jikatongeelaga madaale.

⁹ Nguno nakūlaalīka mahanga mataale kūfuma sī ja sukuma, gize galī na gwīnda īmò; ya kwīdumīla ī Babuloni. Na ng'hana gakwamba būlūgū gīdumīle; Īkwandījiwa sukuma ū kūding'wa. A masonga ga mahanga genayo gakūbiza gītī bashilikale bamanile kalwīīle ka būlūgū, abo batazumalagwa.

¹⁰ Ī sabo ja Bakalidayo jikūsolwa, nīyo a basoji bajo bakūpandīka sha kūbigela pye a bose,” alīhaya SEEBA.

¹¹ A bing'we bakenaagūji ba wingīji wane īkī mukwikalaga mu būyegi na kūsangabala, hangī mukūsadagūkaga gītī ndogoosa ya ng'ombe īlī ha nīmo gwa kūpandagīla būsīga, na mukwikalaga ng'ūdaaya gītī ng'osha ja falasa,

¹² Ū nining'we akūgooka, ūyo wamubyala akūpondwa soni; akūbiza ihanga lya kū numa kūtinda pye a mahanga, itogolo lītī na solobo, sī ng'halamuku ītī na minzī.

¹³ Kūlwa nguno ya būpelanu bo ng'wa SEEBA, Ī Babuloni ītalazengwa mo banhū. Hūna lūūlū īkūbiza shilugu shiike; Pye abo bakūbītīla ī Babuloni bakūyūdedebala na kūdalahīja, kūlwa kūgabona a magulaagīje gayo py'a gose.

¹⁴ “Bing'we bashilikale ba masonga, ambagi būlūgū; īgobanīlagi ī Babuloni pyī ī yose. Īlasagi! Yaya ū kūgalekeela a masonga; nguno yītile yabūbi no ū kūlī SEEBA.

¹⁵ Īlīgījagi ng'wano būlī kwene! Ī haha ītī na gwa kwīta, ī ng'hambī ja bashilikale baamo jaakambagūlilwe, ī ndugu jayo jiikījiwe hasī. Nīyo īkī ū mhayo gwenū gūlī gwa kwīmalīla shiile ya ng'wa SEEBA Ī sī yenīyo, īmalīlagi shiilī ng'hana; yītīlagi nayo gīt'ūmo yajīītīla sī jingī.

¹⁶ Bamalagi pye ū mu Babuloni, nīmi ose ose atizilonga, pyī nū ngesi nī ligeselo lyakwe ū mu malaale ga shilīlwa. Kūlwa nguno ya līlūshū lya ng'wiboneeji būlī munhū ni ashokage kū bang'wawe, būlī munhū apeelela kū sī ya ng'wawe.

¹⁷ Ū Isilaeli alī idaale lya ng'holo jibbalasanile, Īlo līkakūūbīlījiagwa mashimba. Ntemi wa Ashulu h'ūyo akandya ū kūjilya, hūna ntemi Nebukadineza wa Babuloni wamalīīgije ū kūgapaanagūla a maguha gajo.”

¹⁸ Alilūūlū, ū Seeba wa mabità, ū Mulungu wa Isilaeli alīhaya gīkī, “Nakūng'winha nsango ū ntemi wa Babuloni hamò nī sī yakwe, gīt'ūmo nakang'winhīla nsango ntemi wa Ashulu.

¹⁹ Alīyo ū Isilaeli nakūnshosha kū madīīmīlo gakwe hangī, ayūdīīmīla mu ngūlū ja Kalimeli na Bashani; ī nzala yakwe īkūshilīla mu ngūlū ja Efulaimu na Gileadi.

²⁰ Ū mu shikū jenījo, nī likanza lyenīlo,” alīhaya SEEBA, “Ū būhūbi wa Isilaeli būkūkoowa alīyo būtilonga, nī shibi sha Yuda shikūkoowa alīyo shitūbiza ho, nguno nakūbalekeja pye a ba būshiigo abo nalībalekeela.

²¹ Jagi mukīdumīle ī sī ya Melataimu, na a bikaji ba mu Pekodi. Ng'ūbakūūbīlīja ng'wababūlaga mubamale gete,” alīhaya SEEBA “Ītagi būlī mhayo ūyo nalīmulagīla.

²² Gūlīīlīla ng'wano gwa būlūgū ū mu sī yenīyo; ng'wano gwa būkenaagūji būtaale.

²³ Ī nundo īyo yalūpaanagūlaga sī yabīnzagūkile yūshila gete! Ī Babuloni yaamalile ū gwa kūpya ū mu mahanga!

²⁴ Ee Babuloni, nakagūtega ntego gūūkūgwasha ūtamanile; wapandīkilwe ūding'wa kūlwa nguno ya kwilwisha na SEEBA.

²⁵ Ū SEEBA walīlugūlile ī libīīkīlo lya shilanga shakwe, ūshifunīja hanze ī shilanga sha būpelanu bokwe; nguno ū Seeba MULUNGU wa mabità alī na nīmo gwa kūbeeja ū mu sī ya Bakalidayo.

²⁶ Nsangagi bing'we bana kūle, gakambagūlagi a mafumà gakwe; ntūlīīlagi mu matūūgo matūūgo gītī matūūgo ga būsīga, nkenaagūlagi gete mutizūnekeelela būshiigo nūūlū hado.

²⁷ Ī nzagamba jakwe ī songi jibūlagwe pye, ni jitwalagwe kwisīnsīlo! Jilī mu kwihīga nguno ū lūshikū lwajo lwashikaga; Ī likanza lya kwinhwa nsango.

²⁸ Badegelekagi ū mu Sayuni abo baapeelile kūfuma Babuloni, bakwīsomboolaga ī mihayo ya shiilī Īyo SEEBA Mulungu wise wīyītile; shiilī kūlwa hekalu yakwe.

²⁹ Bakomelejagi a balasi bīdumīle ī Babuloni, pye abo bamanile kūduta būta. Komagi ng'hambī kwīpīndīlīja, atizilonga wa kūpūlūgūka nūūlū ūmò. Ī sī yenīyo yītīlagi kūlenganīla nī shītwa shayo; Īyītīlagi ūmo īkīītlaga ī yoi, nguo yīndalahile ū SEEBA, ū Ng'wela wa Isilaeli.

³⁰ H'ī chene a basūmba baamo bakūbūlagīlwa mu mapanda; a bashilikale baamo bakūhuumūjiwa pye a bose ū mu lūshikū lwenūlo,” alīhaya SEEBA.

³¹ “Ū bebe ūlī ng'wikumīlīja, managa gīkī nalī ng'wilwisha wako;” alīhaya Seeba, ū SEEBA wa mabità; “Nguno ū lūshikū lwako lwashikaga, ī likanza lyako lya kūkwinhwa nsango.

³² Ū ng'wikumīlīja akwipama agwe, na atilonga wa kūngūngūmūla; ī mizengo yakwe nakwītwima moto, ūyo gūkūbalamba pye abo bampīndije.”

³³ Ū SEEBA wa mabità alīhaya gīkī, “A banhū ba Isilaeli biboneelwa no, pye na a banhū ba Yuda. A badīīmi babo babahandatīīlile; balemile ū kūbalekela nūūlū hado.

³⁴ Alīyo ū Nkomooji wabo alī na nguzu, SEEBA wa mabità, h'ī lina lyakwe. Akūbalwīīla na nguzu ū mu mihayo yabo, kūlwa kwīyenhela kwifuula ī sī yabo; alīyo a bikaji ba Babuloni akūbenhela kūzwangana.

³⁵ A Bakalidayo līkūbikīīla līlūshū!” Alīhaya SEEBA; Līlībasanga a bikaji ba Babuloni, na a basugi baamo, na a bamasala ba ng'wenūmo!

³⁶ Ī līlūshū līkūbikīīla a bahangi a balomolomo! Bakūbiza babbūūlī ba babbūūlī. Na a bashilikale babo līkūbikīīla ī līlūshū! Bakūgwīlwa boobà būtaale.

³⁷ Ī līlūshū līkūjikīīla nī falasa jabo, na a magogoteni ga būlūgū, na a bashilikale ba kūgoodishiwa abo alī nabo mu mabità gakwe! Bakūbiza gītī bakīma. Ī līlūsha līkūgikīīla na a mabīīkīlo ga sabo jakwe; jikūjanhwa pyī ī jose!

³⁸ Na a minzī gaamo gakūgwīlwa būūmà gakame; nguno ī sī yenīyo īlī na mashiikolile, ayo gakabasajaga kūlwa boobà.

³⁹ “Ī Babuloni īkūbiza sī ya mashiinū ga mu masaka na mabiti, būyaga na maging'hi. Ītalikalīlwa na banhū hangī ilalī, kūshisha shibyalīlwe na shibyalīlwe.

⁴⁰ Ūmo Mulungu akīkenaagūlīla mizengo ya Sodoma na Gomola nī yīyo yalī ībīmbīkanilwe nayo,” alīhaya SEEBA. Hūna lūūlū nū ng'wenūmo atīho ose ose wa kūzenga mo; atilonga wa kwikala ū mu sī yenīyo.

⁴¹ Managi gīkī ibità līlīsamīlījiwa kūfuma sukuma, ihanga itaale līkwiza na batemi bingī ba kūfuma kūle, kū ngelelo ya sī.

⁴² Bakwiza babūkije būta na machimu; bibonya no, hangī batī na shigongo. Badamhīlile falasa jabo kūnū bakūlījaga ng'wano; ū nding'himo gwa mitindo yabo gūbangile gītī nundumo gwa mahuuli ga nyanza yasalaga. Ee Babuloni, bakūkūsanga bamalīīlile kūlwa būlūgū bize bakūdumīle.

⁴³ Ū ntemi wa Babuloni walwigwile ū lūkumo lwabo; gaamalile ī nguzu a makono gakwe, wagwīlilwe igendeeji, alī na makoye no gītī ga būsaatu bo nkīma alīlung'wa būsūngū.

⁴⁴ Ūmo shimba īkapulukīlaga mu masaka ga mongo gwa Yolodani yaja kū madīīmīlo ga mitugo īkūkūngīlaga, h'ūmo nū nene nakwīyisanganīgīja ī Babuloni nīpeeje, yīnge bo nhambo ū mu sī yayo. Nani ū nsolwa ūyo shiniigelile nantūūle a ha nīmo gwenūyū? Nani ū wa kūlenganīla na nene, gīkī tūgeme kwiheeba? Alīho ndīīmi kī ūyo ashikile kūnīīmīla ū nene?

⁴⁵ Alilūūlū, līdegelekagi ī liganiko Īlo alī nalyo ū SEEBA kūlwa Babuloni; ū mhayo ūyo agūhelile kūlwa sī ya Bakalidayo: Gīkī, a bado bado bakūgwesanjiwa gītī baana ba ng'holo bajanwe, na a madīīmīlo gabo akūgakenaagūla kūlwa nguno yabo.

⁴⁶ Ū ntindo gwa kūding'wa Babuloni gūkwītinginya ī sī; ī ng'hūngū yabo īkūzulung'hanya ū mu mahanga.