Yelemia 49 - Bibilia Ilagano Lya Kale 2015

Mhayo kūlwa sī ya Amoni

¹ Ī mihayo īyī īlī kūlwa nguno ya Baamoni: Ū SEEBA alīhaya gīkī, “Ū Isilaeli, atī na bitūnja? Atī nabo a bingīji? Nibūlī ī Gadi īding'we na Moleki? Nibūlī a banhū bakwe bazenge ū mu mizengo ya Gadi?

² Gwike shikū jikwiza,” alīhaya SEEBA, “Ū nzengo gwa Laba ya Baamoni nakūgūlīgīja ng'wano gwa būlūgū; gūkūbiza itūūgo lya makambagūkīle, na a magūngūli ayo galī bbihī nago gakūtwing'wa moto. Hūna ū Isilaeli akūbataaja ī sī abo baalī bantaaja ū wei,” alīhaya SEEBA.

³ Tūlaga ng'hūngū bebe Heshiboni, nguno ī Ai īlīkenaagūlwa! Bing'we bikaji ba Laba, līlagi ni laka lya higūlya! Itungagi shizwalo sha magūnīla mulīle ng'hūngū. Jagi ng'ūsūūsūūba hose pye ū mu mizengo īyo īpīndīlīgije ndugu; nguno ū Moleki akūtwalwa mu būsaamiwa hamò na a bagabīji bakwe na a batūmami bakwe!

⁴ Nibūlī ūkwikumīlīgījaga malago gako, Īkī ūkwikumīlīgījaga gīkī a malago gako gakaponaga no! Bebe ng'wanikī nambu, ūkasanyaga būsabi wako kūnū ūhaya, “Nani wa kūgima kūnidumīla ū nene?”

⁵ Nakūkwenhela lyogohya kūfuma kū bose abo bakūpīndije hose hose, alīhaya Seeba, ū SEEBA wa mabità. Būlī ūmò wing'we akūpeejiwa īnge, na atilonga wa kūbabilinga a babūngi.

⁶ “Alīyo a ha numa ya henaho, a Baamoni nakūbashokeja ī jabo,” alīhaya SEEBA.

Mhayo kūlwa sī ya Edomu

⁷ Ī mihayo īyī īlī kūlwa nguno ya Edomu: Ū SEEBA wa mabità alīhaya gīkī, “Ī gete gaagayile ī haha a masala ū mu Temani? Ī long'we yachile ū mu bitegeleja? A masala gabo gaajimīlile gete?

⁸ Bing'we bikaji ba Dedani, nyamukagi mupeele, ingīlagi mu mahalo ng'wibise. Nguno ūlū lyūshika ī likanza lya kūng'winha nsango ū Esau nakūngwisīja mayanga mataale no.

⁹ Ūlū biza ūko ūlī bahūlūji ba mizabibu, batūkūlekela twa kūpūmbīīla dūhū? Nūūlū biibi biza mu būjikū, batiba gīt'ūmo batogelilwe?

¹⁰ Alīyo ū Esau nakūng'wīngīja pyī ī shikolo, naneke dalali; nakūgafunangūla pye a mapandī gakwe ga kwibisīla, agayiwe a ha kwibisīla. A baana bakwe na a badūgūye bakūshila, na a bazenganwa biye; nū wei atikala ho hangī.

¹¹ Balekage a baana bako a bapīna nakūbalang'hana nene bikale mhola; na a bakīma abo baalīchīlwa bagoshi babo ni banisanyage nene.”

¹² Nguno ū Seeba alīhaya, “Ūlū baashing'wile ī shikombe sha nsango abo batigeleelilwe kūshing'wa, ni būlī a bing'we muleke ū kwinhwa ū nsango? Mutūleka ū kwinhwa ū nsango, ning'we mukūshing'wa dūhū ī shikombe.

¹³ Nalilahīla mu lina lyane nene ng'wenekīlī.” Alīhaya SEEBA, “gīkī ī Bozila īkūkenaagūka, na īkūbiza shikolo sh'igekemaja n'ibengwe, na sh'izumo; hama ī mizengo yamo pyī ī yose īkūkenaagūka ilalī.”

¹⁴ Nigwile mhayo kūfuma kūlī SEEBA, ntūng'wa otūmilwe kūja kū mahanga kūgawīla, “Ibilingagi mukagūdumīle ū nzengo gwenūyo! Būkagi muje kū būlūgū!”

¹⁵ “Alilūūlū ū bebe nakūkwīta ūbize ndo wa bado ū mu mahanga; ndalahwa kū banhū bose.

¹⁶ Ī lyogohya lyako īlo ūkabakangīlaga banhū nū wikumīlīja wa ng'holò yako, shikūkūlemba lembaga; ū bebe ū wikalo wako būlī mu mahalo ga mawe, ū wikalo wako wabūtūūla kwigūlya ya ngūlū. Alīyo nūūlū ūtūūle ū nzengo gwako kwigūlya gītī chanjo sha ng'hoonà, ū nene nakūkūholomola wīnge ko,” alīhaya SEEBA.

¹⁷ Ī Edomu īkūbiza shikolo sh'igekemaja; pye a babītīji ba mu nzīla yenīyo bakūyūdedebala na kūdalahīja, kūlwa kūgabona a magulaagīje gayo pye a gose.

¹⁸ Ūmo īkakenaagūlīlwa mizengo ya Sodoma na Gomola, nī yīyo yalī ībīmbīkanilwe nayo, alīhaya Seeba, “Hūna lūūlū nū ng'wenūmo atīho ose ose wa kūzenga mo; atilonga wa kwikala ū mu sī yenīyo.

¹⁹ Ūmo shimba īkapulukīlaga mu masaka ga mongo gwa Yolodani yaja kū madīīmīlo ga mitugo īkūkūngīlaga, h'ūmo nū nene nakwīyisanganīgīja ī Edomu nīpeeje, yīnge bo nhambo ū mu sī yayo. Nani ū nsolwa ūyo shiniigelile nantūūle a ha nīmo gwenūyū? Nani ū wa kūlenganīla na nene, gīkī tūgeme kwiheeba? Alīho ndīīmi kī ūyo ashikile kūnīīmīla ū nene?”

²⁰ Alilūūlū, līdegelekagi ī liganiko Īlo alī nalyo ū SEEBA kūlwa Edomu, ū mhayo ūyo agūhelile kūlwa bikaji ba mu Temani: Gīkī, a bado bado bakūgwesanjiwa gītī baana ba ng'holo bajanwe, na a madīīmīlo gabo akūgakenaagūla kūlwa nguno yabo.

²¹ Ū ntindo gwa kūgwa kwabo gūkwītinginya ī sī; ī ng'hūngū yabo īkūzulung'hanya kūshisha kū Nyanza Yaza.

²² Ng'hoonà īkwinunga ng'wigūlya hūna īkwelemuke yikile, kūnū yambaga a manana gayo kwīyikīīla ī Bozila. Ū mu lūshikū lwenūlo ī ng'holò ja bagosha ba mbagashūūla ba Edomu jikūbiza gītī ng'holò ya nkīma alīlung'wa būsūngū.

Mhayo kūlwa Damasiko

²³ Ī mihayo īyī īlī kūlwa nguno ya Damasiko: Ī mizengo ya Hamasi na Alipadi yazwanganile nguno yajiigwile ī ng'hūlū ja masūūku. A banhū baamo bagwile ng'holò, baayabūkile būmala ū būlembeezu; balī gītī mahuuli ga nyanza yasalaga.

²⁴ Ī Damasiko yagogolohile no, Ī haha yanyamukaga īpeele nhambo. Hangī nīyo yabbahile kībi no; Īlī mu makoye na kūsaatwa kūtaale, mu būsūngū gītī nkīma alī ng'wikanza lya kūbyala.

²⁵ Nibūlī ū nzengo ū nkumūku gwenūyū gūtalekilwe, ū nzengo ūyo nagūyegelile?

²⁶ Na ng'hana a basūmba baamo bakūgwīla mu mapanda; ū mu lūshikū lwenūlo a bashilikale baamo pye a bose bakūhuumūlīla mu būlūgū, alīhaya SEEBA wa mabità.

²⁷ Nakūjikūbīka moto ī ndugu ja Damasiko, gūjikenaagūle ī ng'hambī ja kūpīlīla, Ī ja ng'wa Benihadadi.

Mhayo kūlwa Kedaali na ntemi Hazoli

²⁸ Ī mihayo īyī īlī kūlwa nguno ya Kedaali na sī ja ng'wa Hazoli, ījo Nebukadineza ntemi wa Babuloni akajidumīla: “Ū SEEBA alīhaya gīkī, ‘Būkagi ng'wīdumīle ī Kedaali, mukabayagaje a banhū ba kīya.’

²⁹ A maheema gabo na a madaale gabo ga ng'holo gakūsolwa, ī ng'hambī jabo jikūjanwa, nī shikolo shabo nī ngamīla jabo. Bakūlīgījiwa ng'wano balīwīlwa, ‘Mupīndiwe mihayo ya kogohya!’

³⁰ Bing'we bana Hazoli, peelagi wangū ng'wīnge, kalembeelagi mu gatī mu mahalo.” Alīhaya SEEBA. Ū ntemi Nebukadineza wa Babuloni wamusīīgile mhayo mi no, ahelile kūng'wītīla mibi a bīng'we.

³¹ “Būkagi mukadumīle ihanga, līkibonaga līlī mu mhola gwa; ihanga lisanije shikū jose,” alīhaya SEEBA, “Ihanga lītī na mibita nūūlū malugalīlo ndūhū; ihanga lya banhū bakikalaga iyene.

³² Ī ngamīla jabo jikūbiza nding'wa, na a madaale gabo ga ng'ombe gakūjanwa. Abo bakageng'haga nzwīlī jabo nakūbasalang'hanya kūja hose hose; hanuma nakūbenhela mayanga kwīngīīla mu mapandī gose,” alīhaya SEEBA.

³³ Ī Hazoli īkūbiza būtūūgījo bo jidīvī, itogolo lītī na shose shose ilalī. Atilonga wa kwikala moi; munhū ose ose atūzenga mo.

Mhayo kūlwa Elamu

³⁴ Ūyū mhayo go ng'wa SEEBA ūyo gūkang'wizīīla ng'hangi Yelemia kūlwa nguno ya sī ya Elamu. Yalī mu shikū ja wandījo wa būsugi bo ng'wa Sedeki ntemi wa Yuda.

³⁵ Ū SEEBA wa mabità alīhaya gīkī, “Managi nakūbūbīnzagūla ū būta wa bana Elamu, ūbo būkabinhaga ī nguzu jabo.

³⁶ Ī Elamu nakwīyenhela miyaga īnè kwīngīīla kū mapandī anè g'igūlū; nakūbasalang'hanīja ū kū miyaga īnè yenīyo, na lītūbiza ho ihanga nūūlū līmò ūko batūtwala a basaamiwa ba kūfuma Elamu.

³⁷ Ī Elamu nakwīdedebaja mu būtongi wa banishi bayo; mu būtongi wa banhū abo ng'hūmbū jabo jilī kūbabūlaga. Nakūbenhela mayanga, ee ū būkalī wa būpelanū bone,” alīhaya SEEBA. “Nakūbakūūbīlīja bo līlūshū kūshisha nabayagaje pye.

³⁸ Ī lisumbī lyane lya būtemi nakūlītūūla ū mu Elamu, ū ntemi waamo nakūnyagaja na a basugi ba ha sīlīlī yakwe,” alīhaya SEEBA.

³⁹ “Alīyo ū kū shikū ja kū būtongi, Ī Elamu nakwīshokeja ī jayo,” alīhaya SEEBA.