Yelemia 39 - Bibilia Ilagano Lya Kale 2015

Nzengo gwa Yelusalemu kūding'wa

¹ Mu ng'weji gw'ikūmi ng'waka gwa kenda go ng'wa Sedekia ntemi wa Yuda, ū ntemi Nebukadineza wa Babuloni akiza kūgūūbūkīla ū nzengo gwa Yelusalemu, walī nalyo pyī ī libità lya bashilikale; būgūgobanīla.

² Lūshikū lwa kenda lwa ng'weji gwa kanè, ng'waka gw'ikūmi na gūmò gwa būsugi bo ng'wa Sedekia, ī ndugu ya nzengo yūkambūlwa.

³ Pye a basugi ba mu selekaali ya ntemi wa Babuloni bingīla mu mita gwa ha Gatī bigasha. Baalī, Neliga-shaleza, Samuga-nebo, Sasekimu ntaale wa batūmami, na Naliga-shaleza nshilikale nkūjiwa; na a bataale a bangī pye a ba selekali ya ntemi wa Babuloni.

⁴ Ū Sedekia ū ntemi wa Yuda hamò na a bashilikale bakwe pye a bose aho bababona a banishi benabo, bakagūtoloka ū nzengo būjikū, būbītīla mu ngūnda gwa ntemi, yalīmo nzīla ībītile ha gatī gatī ya ndugu ibīlī; būtūngīīla ipandī lya Alaba.

⁵ Alīyo ī libità lya bashilikale ba Bakalidayo bakabakūūbīja, ū ntemi Sedekia būmpandīkīla mu mbūga ya Yeliko. Būndima būntwala ū kūlī ntemi wa Babuloni ū Nebukadineza, walī mu sī ya Hamasi, nzengo gwa Libūla; ūng'hamīla kwinhwa nsango.

⁶ Ī Libūla kwenūko ū ntemi wa Babuloni ūbabūlaga a bitūnja ba ng'wa Sedekia mu būtongi bo miso gakwe, na a banikūlū ba Yuda pye a bose ūbabūlaga.

⁷ Hūna ū Sedekia ūnkobola a miso, ūntunga na nhendele ja shaba antwale Babuloni.

⁸ A Bakalidayo būlītwima moto ī likūlū, nī numba ja banhū; nī ndugu ja Yelusalemu būjikambagūla.

⁹ A banhū abo bakalekeelwa ū mu nzengo Nebuzaladani ntaale wa balang'hani ba ntemi, akabasangīja na a babo baalī baja kūbagwīla mu magūlū Bakalidayo, na a bangī pye abo baalī basaagīīla, ūbatwala būding'wa Babuloni,

¹⁰ Alīyo ū Nebuzaladani ntaale wa balang'hani ba ntemi akabalekeela bamò ba bakunese ū mu sī ya Yuda, banhū abo baalī batī na shose shose; ī likanza lyenīlo ūbagabanhya migūnda ya mizabibu na malaale ga kūlīma.

¹¹ Ū ntemi Nebukadineza wa Babuloni ūnagīla mihayo ū Nebuzaladani ū ntaale wa balang'hani ba ntemi, yalī kūlwa ng'wa Yelemia; ūng'wīla gīkī,

¹² “Ndimage ūnang'hane, yaya ū kūng'wītīla mhayo mi gose gose; ng'wītīlage būlī gwene ūyo ūkūlomba.”

¹³ Hūna lūūlū ū Nebuzaladani ū ntaale wa balang'hani ba ntemi, nū Nebushazibani ū ntaale wa batūmami, nū nshilikale nkūjiwa ū Naliga-shaleza, na a bataale ba selekali ya ntemi wa Babuloni a bangī pye,

¹⁴ būtūma banhū kūja kūng'wīnja ū Yelemia ū mu gwalugwa ya balang'hani; būntwala kūlī Gedalia ng'witūnja o ng'wa Ahikamu, ng'wana Shafani; gīkī aje nang'hwe kū ng'wakwe. Ū mu gīko wikala hamò na banhū ba sī ya ng'wawe.

Ebedimeleki kwisagījiwa

¹⁵ Ū Yelemia aho ataalī ū mu gwalugwa ya balang'hani, mhayo go ng'wa SEEBA Mulungu gūkang'wizīīla gūhaya gīkī,

¹⁶ “Jaga ū kūlī Ebedimeleki ū muna Esiopia; ūkang'wīle, ‘Ū SEEBA wa mabità, ū Mulungu wa Isilaeli alīhaya gīkī, Nalī hihī kwīshikīlīja ī mihayo īyo nīyisagīja kūgwītīla ū nzengo gwenūyū, kūgwenhela mayanga; ītī yaya. Ū ng'wikanza lyenīlo īkūshikīlījiwa ūlībona na miso gako.

¹⁷ Alīyo nakūkūpīja ū mu lūshikū lwenūlo ū bebe, alīhaya SEEBA; ūtūtūūlwa mu makono ga banhū abo ūbogohile.

¹⁸ Nakūkūpīja, ūtūchīla ū mu būlūgū; alīyo ūkūpūlūgūka, būpīle ū būpanga wako; kūlwa nguno ūnisanije nene, alīhaya SEEBA.’”