Yelemia 3 - Bibilia Ilagano Lya Kale 2015

¹ Ī gīsī ūlū ngosha ūneka nke wakwe yūcha ī kaya yabo, hūna ū nkīma ng'wenūyo wīnga ūūkatoolwa na ngosha ūngī, angū, ū ngoshi adūgije kūnshokela hangī? Ū mu gīko ītūsosohala no ī sī? Ū bebe ū mu būmalahya wako wakwījaga no a bagosha ba kwikala nang'ho; alīyo ūdūgije kūnishokela hangī, alīhaya SEEBA.

² Alibūūchaga a miso wilalangīje ūgalole a magūlya makalamuku! Līlīho ipandī lyose lyose ūko ūtaalī kūshihījiwa? Ūkahūūnyaalaga mu mayīla ūkūbalindīīlaga a bitogwa bako, gītī nyūngi mu mabūga. Ī sī wīsosohagije kūlwa būmalahya na nhūngwa jako ja malofu.

³ H'ī chene ītūzunīlījiagwa ī mbula ū kūtūla nūūlū iswaalala dūhū, nī mizumbī ya mu mīīsa ītīho! Alīyo īkī ūlī na būshū būgūnu kūlwa būmalahya, ūlemile ū kūcha soni nūūlū hado.

⁴ Tūhaya haha haha dūhū walūnitanaga ūlīhaya gīkī, “Baba nwani ng'wichane wa kūfuma ha būdinha bone,

⁵ ūkwikala ūnipelanīlile gwa? Ū būpelanu wako būkūbaka ilalī? H'ūmo ūkayombelaga; alīyo ū kūnū wīyīta ī ya malofu gīt'ūmo ūtogilwe!”

Isilaeli atī wa kūsanyiwa

⁶ Ū mu shikū ja ntemi Yosia, ū SEEBA akaniwīla, “Wībona īyo wīyīta ū nkīma ū ngomi ū Isilaeli? Waaja akūshihyaga būlī hene a ha ngūlya nīhu, nū mu mbeho ja mitī ya madūūtū mingī.

⁷ Ū nene nakiganika gīkī, ūlū ūmala ū kwīyīta ī yenīyo akūnishokela, alīyo atashokile. Nū ng'wanong'wawe, ū Yuda, ū ng'hūnga, akībona ī mihayo yenīyī.

⁸ Ū Isilaeli nakaneka kūlwa kūlema kūniigwa, nūng'winha talaka ūja, nguno ya nhūngwa jakwe ja būshihani. Alīyo ū ng'wanong'wawe ū Yuda ū ng'hūnga, atogohile; nang'hwe ūfuma būshimbe, wandya kwīta būmalahya.

⁹ Nīyo īkī ū Isilaeli atabūbonile ū būmalahya bokwe gīkī būlī na būbi, akīsosohaja no ī sī kūlwa kūshihya na mawe, na mantī.

¹⁰ Hama ū mu yose yenīyī, ū Yuda, ū ng'wanong'wawe ū ng'hūnga, atanishokelile na ng'holò īmò, alīyo mu wibeeleleja dūhū.” Alīhaya SEEBA.

¹¹ Ū SEEBA akaniwīla, “Ū Isilaeli nūūlū īkī ngomi, alīyo wiyoolekije gīkī ntūngīlīja kūtinda ū Yuda, ū ng'hūnga.”

¹² Jaga ī sukuma ūkīyombe ī mihayo yenīyī; ūhaye gīkī, “Bebe Isilaeli ngomi, shokaga; alīhaya SEEBA. ‘Natikala naakūmining'halīlaga, nguno nalī na shigongo,’ alīhaya SEEBA. ‘Natūkūpelanīla ilalī.

¹³ Ū bebe ng'wene zunyaga dūhū ī gīkī ūlī ng'hūbi, wangomela ū SEEBA Mulungu wako, ū būtogwa wako ūkūwaalanyaga sagala kū bamulungu bangī, būlī hene a ha mbeho ya ntī gwa madūūtū mingī. Hū kūhaya ūlemile ū kūliigwa Ī lilaka lyane,’” Alīhaya SEEBA.

¹⁴ “Bīng'we bagomi, nishokelagi; nguno ū nene hū nalī ngoshi wing'we,” alīhaya SEEBA. “Nakūmusola nang'wenhe Sayūni; ūmò kūfuma mu nzengo, na babīlī kūfuma mu lūganda.

¹⁵ Hanuma nakung'winha badīīmi abo balī ha ng'holò yane, bayūmutongeela mu būmani na witegeleja.

¹⁶ Hūna ū mu shikū jenījo ūlū ng'wiyongeja ng'wūkwīla ū mu sī yenīyo,” alīhaya SEEBA; a banhū bakooya ū kūyomba gīkī, “Isandīko ly'ilagane lya ng'wa SEEBA.” Lītingīla ū mu maganiko gabo, nūūlū batūlizūkwa hangī, nūūlū ni kūlīkūmbūla dūhū yaya; na lītūbeejiwa līngī hangī.

¹⁷ Ū ng'wikanza lyenīlo ī Yelusalemu īkwitanwa Isumbī lya Būtemi lya ng'wa SEEBA; hūna pye a mahanga gakwibilīngīla ū mu Yelusalemu kū būtongi walyo, mu miso ga ng'wa SEEBA. Nīyo bakooya ū kūshimīzīla mu būgang'hanazu wa ng'holò jabo jabūbi.

¹⁸ Ū mu shikū jenījo ī numba ya Yuda īkwisangīja nī numba ya Isilaeli, bose pye bakūfuma kū sī ya sukuma, bashoke ū mu sī īyo nakabinha bakūlūgenji bing'we kūlwa wingīji wing'we.

¹⁹ Ū nene nakahaya, “Ni nayega no ū kūng'wisaaba gīkī mulī baana, na kūng'winha sī ya wingīji būsoga kūtinda mahanga gose.” Niganikaga mukūyūnitana, “Baba” na gīkī mutūgalūka ng'oye ū kūnilondeela.

²⁰ Ee numba ya Isilaeli, ūmo nkīma ng'hūnga akanekelaga ngoshi wakwe, na a bīng'we mulī bahūnga ū kūlī nene. Alīhaya SEEBA.

Kūkomigwa kūngalūkīla SEEBA

²¹ Ilaka lya kūlīla līlīfuma kū magūlya makalamuku, Baisilaeli bakūlīlaga na kwiyanda, nguno ya kūjikenaagūla ī nzīla jabo kūlwa kūng'wība ū SEEBA Mulungu wabo.

²² Bing'we banhū ba ng'haani, shokagi; nakūmulagūla kūshile ū kūshoka numa kwing'we. Alichene, tūlīkūshokela bebe, nguno ū bebe h'ūlī SEEBA Mulungu wise.

²³ Ī gete ng'hana ū kwikala twilamīlīja nakūyoganya mu ngūlū ndo na nhaale tūkilembaga dūhū. Ū gwa ng'hana gūlī gīkī, ū būpīji wa Baisilaeli būlī mulī SEEBA Mulungu wise.

²⁴ Alīyo kūfuma kale kūko tūtaalī bado, pyī īsho babyaji bise bakanogaga kūshikooba shikashilaga kūliiwa na mashiinū ga minala; h'ūmo jikashilīlaga ī ng'holo nī ng'ombe jabo, pyī na a bitūnja na a bashīke babo.

²⁵ Tūlambalalagi hasī kūlwa magooke, Ī minala yise ītūkundīkīje. Nguno kūfuma ha būdinha wise kūshisha lelo, tūlī ba shibi ū kūlī SEEBA Mulungu wise; a bise benekīlī na a babyaji bise tūtaalī ū kūbiza biigwi ū kūlī SEEBA Mulungu wise.