Yelemia 29 - Bibilia Ilagano Lya Kale 2015

Nyalūba ya kūja kū bading'wa

¹ Ī mihayo īyī īfumile mu nyalūba īyo ng'hangi Yelemia akītūma kūfuma Yelusalemu kū banamhala abo baalī bashiigīīla ū mu banhū abo baalī bading'wa, na bagabīji na a bahangi; pye na a banhū a bangī abo Nebukadineza walī wabīnja Yelusalemu ūbatwala Babuloni būkikala kwenūko mu būding'wa.

² (Ahenaho ū ntemi Yekonia nū nina ū ngole numho basaamiwe ī Yelusalemu, balī mu būding'wa; hamò na a bataale ba ng'wikūlū, na batongeeji ba Yuda, na ba nzengo gwa Yelusalemu, būyaga na baselemala na basuji ba chūma.)

³ Ī nyalūba yenīyī akabinha ba Elasa ng'wana Shafani, na Gemalia ng'wana Hilikia, abo Sedekia ntemi wa Yuda akabatūma kūja Babuloni, kūlī ntemi Nebukadineza. Ī nyalūba yalī īhayile.

⁴ Ū SEEBA wa mabità, ū Mulungu wa Isilaeli, alībawīla pye a banhū abo wabīnja Yelusalemu ūbatwala Babuloni mu būding'wa; alīhaya gīkī,

⁵ Zengagi numba mupandīke wikalo mulembeele; nī migūnda līmagi muyūhamba ng'walya īsho shiligela mo.

⁶ Nū gwa liitoola gwītagi dūhū, mubyale baana bagosha na bakīma; na a bitūnja bing'we batoojagi, a bashīke bing'we nabo balekagi bayūtolwa; nabo babyale baana bagosha na bakīma, iyongejagi ko ū kwenūko, mutizūgeha.

⁷ Hama nū nzengo gwenūyo ūko naamusaamīja gūkoobelagi mhola na kwīlūkīlwa; ng'ūgūlombela ū kūlī SEEBA, nguno ū goi ūlū gwīlūkīlwa mbango, nū bing'we hū ng'wīlūkīlagwa.

⁸ H'īyo, ū SEEBA wa mabità ū Mulungu wa Isilaeli, alīhaya gīkī, “Yaya ū kūbazunīlīja bikale būmulembagūla a bahangi bing'we, na a bachembi ba ngoko, abo balī hamò ning'we. Oyagi nū kwikala ng'ūdegeleka ī shiloti shabo īsho mukabahimbīlījaga bikale bakūlootaga.

⁹ Bakūmuhangīlaga mihayo ya būlomolomo mu lina lyane; ū nene natabatūmile.” Alīhaya SEEBA.

¹⁰ Ū SEEBA alīhaya gīkī, “Ūlū yūkwīndanha ī myaka makūmi mpungatī ī ya Babuloni, nakwiza namushikīlīgīje ū kwisagīja kwane kūlw'ilagane lyane lya shigongo; nakūng'wenha hangī ū kwipandī īlī.

¹¹ Nguno nagamanile a maganiko ayo nakang'wganikīlaga a bing'we,” alīhaya SEEBA, “maganiko ga kūng'wītīla misoga, gatī ga kūmuminya yaya; maganiko ga kūmutūūla mu kwisagīlwa kwawiza kūlwa mihayo ya kū būtongi.

¹² Hūna mukūyūnitana, ng'wiza nū kūnilomba; nane nakūmudīīlīla.

¹³ Hangī mukūnikooba munipandīke, shitange munikoobe na ng'holò īmò.

¹⁴ Nakūzunya munipandīke.” Alīhaya SEEBA, “Nīyo nakūng'wenha kūfuma ū kū būding'wa wing'we. Nakūmubilinga kwīngīīla kū mahanga a gose, na a mapandī pye a gose ūko naamuponya.” Alīhaya SEEBA. “Nakūng'wenha hangī ū kwipandī īlo nakang'wīnja nūmutwala mu būding'wa.”

¹⁵ Mushikile kūhaya, “Ū SEEBA watwinhile bahangi ū kūūnū Babuloni;

¹⁶ alīyo ū SEEBA alī na mhayo gwa kūhaya kūlwa ntemi ūyo igasīgije isumbī lya būtemi lya ng'wa Daūdi, na a banhū abo basaagīīlile ū mu nzengo ūyū, a badūgū bing'we abo batajile hamò ning'we ū mu būding'wa;

¹⁷ ū SEEBA wa mabità, alīhaya gīkī, “Nakūbatūmīla līlūshū, nzala na mahūūya; nakūbīīta babize gītī tiini jabūbi ījo jitūdūla kūliwa kūlwa nguno mbi no.

¹⁸ Nakūbakūūbīlīja bo līlūshū na nzala, na mahūūya; hangī nakūbīīta babize na saalaala ū kū mabūtemi ga mu sī pye a gose, na shikolo sh'izumo n'igekemaja, na sha kūdalahwa na kwibengelejiwa ū mu mahanga a gose ūko nakūbasambaagīja.

¹⁹ Kūlwa nguno ya kūlema kwīdima ī mihayo yane.” Alīhaya SEEBA, “Mihayo īyo nikalaga nūbatūmīla ng'hangala na ng'hangala mu nzīla ya batūmami bane, a bahangi. Na a bing'we abo mulī mu būding'wa h'ū gūmò dūhū; mulemile ū kūdegeleka, alīhaya SEEBA.

²⁰ Alilūūlū, gwigwagi ū mhayo go ng'wa SEEBA bing'we bose abo akamusaamya kūfuma Yelusalemu ūmutwala Babuloni.

²¹ Ī mihayo ya ba Ahabu, ng'witūnja o ng'wa Kolaya, na Sedekia ng'witūnja o ng'wa Maaseya, abo bakūmuhangīlaga būlomolomo mu lina lyane, ū SEEBA wa mabità, ū Mulungu wa Isilaeli, alīhaya gīkī, ‘A benabo nakūbatūūla mu makono ga ng'wa Nebukadineza ntemi wa Babuloni, ababūlage mulolile na miso ging'we.’

²² Kūlwa nguno yabo a benaba, pye a banhū ba kūfuma Yuda abo balī mu būding'wa, bakūyūbazuma a banhū bo kūtūmamīla lūsumo lūhayile gīkī, ‘Ū SEEBA akwītīle gīt'ūmo akabīītīla ba Sedekia na Ahabu, abo ntemi wa Babuloni akabapemba mu moto.’

²³ Nguno bīīta mihayo y'ipelanya no ū mu Isilaeli, bashihyaga na bake ba bazenganwa bichabo; hama hangī ī haha bakūyombaga mihayo ya būlomolomo mu lina lyane, mhayo ūyo natabalagīlile kūgwīta. Ī yenīyī nīmanile no ū nene, nalī nkaanīji wayo.” Alīhaya SEEBA.

Mhayo gwa kūtwalīlwa Shemaya

²⁴ Ū Shemaya ūyo wafuma Nehelamu ng'wīlagi gīkī,

²⁵ “Ū SEEBA wa mabità, ū Mulungu wa Isilaeli, alīhaya, ‘Ū bebe wabatūmīlile nyalūba pye a banhū ba Yelusalemu mu lina lyako bebe ng'wenekīlī; ūntūmīla nū Sefania ū ng'witūnja wa ngabīji Maaseya, na a bagabīji a bangī pye a bose.’ Ū Sefania wang'wīlile gīkī,

²⁶ ‘Ū SEEBA wakwītile ū bebe kūbiza ngabīji ntaale ha ng'wanya go ng'wa Yehoyada, ūbize ntaale wa numba ya ng'wa SEEBA; ūlī na būdūla bo kūndima nsaji ose ose, ūyo akwishatyaga mu nīmo go būhangi, ūntuga nhendele ūmponya mu jeela.

²⁷ Hama nibūlī lūūlū ūtūng'hamaga ū Yelemia ū muna Anasosi, ūyo akwigīmbaga gīkī ng'hangi wing'we?

²⁸ A bise watūtūmīlile mhayo ū kūnū Babuloni, alītūwīla angū gīkī, Ī likanza līkūlīha, hūna lūūlū zengagi numba mupandīke wikalo mulembeele; nī migūnda līmagi muyūhamba ng'walya īsho shiligela mo.’”

²⁹ Ū ngabīji Sefania akīsoma ī nyalūba yenīyo kū būtongi bo ng'hangi Yelemia.

³⁰ Hūna ū mhayo go ng'wa SEEBA gwiza ū kūlī Yelemia, gūlīhaya:

³¹ A banhū abo balī mu būding'wa pye a bose batūmīlage gūūyū mhayo, Ū SEEBA alīng'wīla ū Shemaya ū muna Nehelamu gīkī, Kūlwa nguno ū Shemaya akūmuhangīlaga a bing'we alīyo natantūmile ū nene, nose akūng'wenhelejaga kūsanya mihayo ya būlomolomo,

³² Ū SEEBA alīhaya gīkī, Shiniigelile nang'winhe nsango ū Shemaya ū muna Nehelamu; ū wei ng'wenekīlī nū būbyīle bokwe. Ū mu banhū benaba atūlekeelelwa munhū wakwe nūūlū ūmò, nī yawiza īyo nakūbīītīla a banhū bane atībona na hado yaya, alīhaya SEEBA, kūlwa nguno akūlomeelaga mihayo ya kūnigomela.