Yelemia 24 - Bibilia Ilagano Lya Kale 2015

Matangwa abīlī ga shisuumo

¹ Ū ntemi Nebukadineza wa Babuloni akandima ū Yekonia ng'witūnja o ng'wa Yehoyakimu ntemi wa Yuda, hamò na bataale ba būsugi wa Yuda, na baselemala na basuji ba chūma, ūbasaamya ī Yeluselemi ūbatwala Babuloni mu būsese. Aho gwabīta ū gwenūyo ū SEEBA ūnoolekeja matangwa abīlī ga shisuumo sha tiini, gakīndīkilwe kū būtongi bo hekalu ya ng'wa SEEBA.

² Ī litangwa ī līmò lyalī na shisuumo shisoga no, gīt'ūmo shikabizīlaga shisuumo sha kwandya kūpya. Alīyo ī litangwa lya kabīlī ī shisuumo shalyo shalī shabūbi no; shitadūgije kūliwa kūlwa nguno ya būbi washo.

³ Hūna ū SEEBA ūnibūūja gīkī, “Ūlībona kī Yelemia?” Nane nūnshokeja, “Tiini ī nsoga jilī nsoga du, alīyo ī jabūbi najo mbi jigi, jitīko kūliwa nūūlū hado.”

⁴ Hūna ū mhayo go ng'wa SEEBA gūniwīla:

⁵ “Ū SEEBA, ū Mulungu wa Isilaeli, alīhaya gīkī, ‘Ūmo shilī ū wiza ī shisuumo sha tiini īshi, h'ūmo nabisaabīlile a banhū ba Yuda abo baading'wa; abo naabīnja ū ng'wipandī īlī nubatwala kū sī ya Bakalidayo.’

⁶ A miso gane gabalolile a benabo, kūlwa kūbīītīla yawiza, nīyo nakūbashosha hangī ū mu sī īyī. Nakūbazenga, natūbasambaagūla; nakūbahamba, natūbadubbūla na hado yaya.

⁷ Nakūbinha ng'holò ya kūniitegeleja gīkī ū nene nalī SEEBA. Bakūbiza banhū bane, nū nene nakūbiza Mulungu wabo; nguno bakūnishokela na ng'holò yose.

⁸ “Alīyo ī tiini ī jabūbi, ī mbi gete ījo jitadūgije kūliwa, Ū SEEBA alīhaya gīkī, ‘H'ūmo nakūng'wītīla ū Zebedayo, ū ntemi wa Yuda, na a bataale ba mu būsugi wakwe; na a bangī abo balīsaagīīla mu Yelausalemi; babize balikala ū mu sī īyī, nūūlū baje Misili.

⁹ Nakūbīīta babize na saalaala na banhū b'ipelanya ū kū mabūtemi ga mu sī pye a gose; na ba kwibengelejiwa, na kūsondagūlagwa, na kwikala bineenelegejiwa, na kūdūkīlwa būlī kwene ūko nūbaponya.’”

¹⁰ Hama nakūbatūmīla koi līlūshū, nzala n'ihūūya; kūshisha bakenaagūlwe bashile gete ū mu sī īyo naalī nabinha boyi na bakūlūgenji babo.