Yelemia 20 - Bibilia Ilagano Lya Kale 2015

Yelemia na Pashuli

¹ Ngabīji Pashuli, ng'witūnja o ng'wa Ima, ūyo walī ntaale wa batūmami ba mu numba ya ng'wa SEEBA, aho wang'wigwa ū Yelemia akūhangaga ī mihayo yenīyī,

² akalagīja ūtūlwa ū ng'hangi Yelemia, hūna ūntunga ha mantī gaalī mu jeela ha mita gwa Benjamini gwa Higūlya, ū kū numba ya ng'wa SEEBA.

³ Ū kū ntondo yaho ū Pashuli ūng'winja ū mu jeela ū Yelemia, nang'hwe ūng'wīla, “Ū bebe ū kūlī SEEBA ī lina lyako ūtī Pashuli, alīyo ūlī Magoli-misabini.

⁴ Nguno ū SEEBA alīhaya, ‘Nakūkwīta ūbize ng'hahūku na wa lyogohya ū kū banwani biyo pye a bose. Bakūbūlagwa na banishi bo līlūshū ūlolile na miso gako. Ī Yuda ī yose nakwītūūla mu nkono gwa ntemi wa Babuloni, a banhū baamo abadime abasaamīje Babuloni, nūūlū kūbabūlaga bo līlūshū.

⁵ A higūlya ya yenīyī, pyī ū būsabi bo mu nzengo gwenūyo nakūbūtūūla mu makono ga banishi babo, pyī īsho shikigelaga kūfuma mu malaale, nī shikolo shabo sha mpango pyī ūmo shigelelile, nī sabo ja batemi ba Yuda pyī ī jose. Bakūshibūūcha bashijane Babuloni.

⁶ Ū bebe Pashuli, na a banhū ba mu kaya yako pye a bose mukūding'wa mutwalwe Babuloni. Ū bebe na a banwani biyo bose abo ūkūbahangīlaga mihayo ya būmaama mukūjūchīla kwenūko mujīkwe.’”

Kwiyanda kwa ng'wa Yelemia

⁷ Ee SEEBA, ū bebe wanilembile nane nūbiza nalemvwa ng'hana, wanilebije ī nguzu ūniheeba. Naabizilikala nakūsekagwa līīmi ji, būlī ng'wene akūnigīmbaga nyachilū.

⁸ Ūlū nalīyomba nakahamukaga n'ilaka lya higūlya; nakabūhayaga ū wiboneeji nū būkenaagūji. Nose ū mhayo go ng'wa SEEBA gūkūnenhelejaga ū nene kūyikala nakūdūkīlagwa na kūsondagūlwa līīmi ji.

⁹ Alīyo ūlū nihamba kwiwīla gīkī, “Ī gete nakooya ū kūng'haya, noye nū kwikala nūlūngalūnga mu lina lyakwe,” a henaho ū mhayo gwakwe ū mu ng'holò yane gūkūbizaga gītī moto gūlībuguma, gūlugalījiwe ū mu maguha gane. Nakūnogaga no ū kwilemeja, nīyo nakūlemeelagwa gete.

¹⁰ Nakwigwaga bingī balīhwehweta, “Būlī kwene līlīho lyogohya! Mūūlagi! Bing'we, tūmūūlagi!” A banwani bane pye a bose baabizilikala banilindīīlile nahūbe, būlī gwa bakwiwīlaga; “Ū ng'wenūyū atūdīīla ū kūgwa ū mu būbi, tūkūng'heeba dūhū tūūmalīle shiilī.

¹¹ Alīyo ū SEEBA alī hamò nane gītī ngosha wa makaya, nose a baluhya bane bakūgwa, batīko ū kūniheeba. Bakūgooka nguno batūnidūla, Ī minala yabo īkūbiza ya būja na būja, ītī ya kwīwa.

¹² Gwike Ee SEEBA wa mabità, bebe ūyo ūkabalamulaga batūngīlīja, ūyo ūkīlolaga īyo īlī mu ng'holò na mu maganiko; nolekejage ī shiilī īyo ūlībamalīla naane nībone, nguno nakūtūūlīlile bebe Ī mihayo yane.

¹³ Ng'wīmbīlagi ū SEEBA! Nkumīlījagi ū SEEBA! Hū ng'wene ū nkomooji wa būpanga wa bagayiwa kwīnga mu makono ga banhū babūbi.

¹⁴ Ni lūzumagwe ū lūshikū lwa kūbyalwa kwane! Ū lūshikū ūlo mayū akanibyala lūtizag'ūpandīka mbango!

¹⁵ Ni azumagwe nū munhū ūyo akatwala ng'hūlū kūlī baba, ūkang'winha mhola ja būyegi būtaale, alīng'wīla gīkī, ‘Wabyalīlagwa ngwana, nīyo ngosha!’

¹⁶ Ū munhū ng'wenūyo n'abizage gītī mizengo īyo SEEBA akīkenaagūla, īyo atīchīlile shigongo. Ni wigwage ng'hūngū ī dilū, ī līīmi wigwe ng'wano.

¹⁷ Nguno atanībūlagīlile mu nda, ū mayū ni walī shigila shane; ī nda yakwe ni yikala nhaale ilalī.

¹⁸ Nibūlī nakafuma ū mu nda, kwiza kūmanhya na makoye na būpīna; nī shikū jane jikalīke nalī mu magooke?”