Yelemia 19 - Bibilia Ilagano Lya Kale 2015

Shinje ībelekile

¹ Ū SEEBA alīhaya, “Jaga kūlī mūmbi ūkagūle shinje; hūna ūsole na banamhala hamò na bagabīji balebe,

² ūfume nabo ū mu nzengo, muje kū longa lwa Beni-hinomu. Ūlū ng'ūshika ha mita gwa mabelagūkīle ga nungū īhayage hoi ī mihayo īyo nalīkūwīla.

³ Ūkūhaya gīkī, ‘Gūdegelekagi ū mhayo go ng'wa SEEBA bing'we batemi ba Yuda, na a bazengi ba Yelusalemu, ū SEEBA wa mabità, ū Mulungu wa Isilaeli, alīhaya gīkī, Ī lipandī lyenīlī nakūlyenhela būkenaagūji būtaale. Būlī munhū ūyo wigwa a matū gakwe gakūding'himīla.

⁴ Nguno a banhū benaba banīība, būlīgalūcha ī lipandī lyenīlī kūbiza lya bamulungu bageni; bakūpembaga moi shitambò kūlwa bamulungu abo batabamanile a boi benekīlī, nūūlū a bataale babo, pyī na a batemi ba Yuda batabamanile; hama ī lipandī lyenīlī baalyokaja mininga ga banhū batī na shilingo.

⁵ Baazenga mo mapandī ga higūlya kūlwa ng'wa Baalī, gīkī bayūboocha mu moto bitūnja babo, kūlwa kūbafunya shitambò sha kūpemvwa kūlī Baalī, mhayo ūyo natagūlagīlile nene, nūūlū nataalī kūgūhaya, hangī gūtaalī nūūlū kwingīla mu maganiko gane.

⁶ Alilūūlū itegelejagi, ū SEEBA alīhaya gīkī, jikwiza shīkū ī lipandī lyenīlo līkooya ū kwitanwa Tofesi nūūlū longa lwa Beni-hinomu, alīyo lūkūbiza longa lwa bafu.

⁷ “Nīyo ī long'we ya banhū ba Yuda na a ba Yelusalemu nakwīkenaagūlīla ū ng'wipandī lyenīlī. Nakūbīīta bamalwe na banishi babo wa līlūshū; bakūbūlūgwa na makono ga banhū abo bakūbūkoobaga ū būpanga wabo. Ī mibimba yabo īkūfunyiwa ībize shilīwa sha noni ja kūlala na shiinū ja mu matogolo.

⁸ Ū nzengo gwenūyū nakugūkenaagūla gūbize ipandī lya kūdalahwa, bakūyūbīta moi baajinjimala kūnū balīgūbbyeeda, kūlwa kūkenaagūlwa kwago.

⁹ Nakūbīīta bayūbalya nyama a baana babo bagosha na bakīma; ū mu shikū ja būdito bo makoye kūlwa kūpīndiwa na banishi babo abo balībūkooba būpanga wabo, būlī ng'wene akūlya nyama ya mīlī gwa nzenganwa ng'wiye.”

¹⁰ Alilūūlū, ī shinje ūkwībela balolile a banhū abo ūlīja hamò nabo benabo.

¹¹ Hūna ūbawīla, “Ū SEEBA wa mabità alīhaya gīkī, Ī lihanga lyenīlī nakūlītobagūla nū nzengo gwenūyū, gīt'ūmo yatobagūkīla ī shinje ya kūbeejiwa na mūmbi yenīyī; na ītīko kūbeejiwa hangī. Bakūbajīka a bafu babo mu Tofesi, kūshisha gūtūsaaga ho ng'wanya gwa kūjīkīla hangī.

¹² Ū SEEBA alīhaya gīkī, h'ūmo nakūlyītīla nī lipandī lyenīlī na a bikaji baamo; ū nzengo gwenūyū nakūgwīta gūbize gītī Tofesi.

¹³ Ī numba jose ja Yelusalemu nī ja batemi ba Yuda jikūsosohajiwa gītī ī lipandī lya Tofesi lyenīlī, pyī ī jose ījo higūlya yajo bakazuukījaga būbbani kūlwa kūlīlamya pyī ī libità lya ng'wigūlū, na kūbafunīja bamulungu babo shitambò sha kūng'wiwa.”

¹⁴ Hanuma ya yenīyī, ū Yelemia ūshoka kūfuma ī Tofesi, ūko walī watūng'wa na SEEBA kūjūhanga; ūshika wīmīīla ng'wibīndo lya numba ya ng'wa SEEBA; ūbawīla a banhū,

¹⁵ “Ū SEEBA wa mabità, ū Mulungu wa Isilaeli alīhaya, ‘Degelekagi ng'witegeleje!’ A bikaji ba mu nzengo gwenūyū nī mizengo īyo īgūpīndije nakūbenhela būkenaagūji, pyī ūbo naabisagīja gīkī nakūwenha; nguno balī na mitwe midaamu no, balemile gete ū kwīyiigwa ī mihayo yane.”