Yelemia 18 - Bibilia Ilagano Lya Kale 2015

Yelemia kūja kū ng'wa mūmbi

¹ Ū mhayo ūyū gūkiza kūlī Yelemia kūfuma kūlī SEEBA:

² “Būūkaga ūje kū ng'wa mūmbi, ūlū ūshika ko nakūkwinha ū mhayo gwane.”

³ Na ng'hana nūja ū kū ng'wa mūmbi, nūshika ū kū numba yakwe, nūnsanga alī h'idandali lyakwe lya kūbūmbīla.

⁴ Ī shiseme sha malongo īsho wabūmbaga ū mūmbi g'wenūyo shūbipīla mu nkono gwakwe, nang'hwe ūshigalūcha ūbeeja shingī nasho hangī, gīt'ūmo akatogelwa wei ng'wenekīlī.

⁵ Kwimanīla ū mhayo go ng'wa SEEBA gwanizīīla gūlīhaya,

⁶ “Bīng'we numba ya Isilaeli, ū nene natadūgije kūng'wītīla a bīng'we ūmo wītīla ū mūmbi ng'wenuyu?” Alīhaya SEEBA. Managi gīkī ūmo līlī ī libūmba ū mu nkono gwa mūmbi, na a bingwe h'ūmo mulī ū munkono gwane.

⁷ Nguno ikanza lyose lyose ūlū nūfunya būlamuji bo gīkī ihanga nūūlū būtemi būlebe wīnjiwe, būsambaagūlwe, nūūlū būkenaagūlwe,

⁸ hūna ī lihanga īlo naalīhūgūlaga ūlū lyugalūka, lyoya ū būbi walyo, ū nene nane nakūgalūka, naleke ū kūlīgwisīja a mayanga ayo naalūhayaga kūlyenhela.

⁹ Hama hangī ūlū ikanza lyose lyose nūfunya būlamuji wa gīkī ihanga nūūlū būtemi būlebe būzengwe nūūlū būhamvwe,

¹⁰ alīyo ī lihanga lyenīlo ūlū lyīta yabūbi ū kūlī nene, lyūlema ū kūniigwa, a henaho nakūgalūcha a maganiko ū kū yawiza īyo naalūhayaga kūlyītīla.

¹¹ Alilūūlū, ī haha bawīlage a banhū ba Yuda, na a bazengi ba mu Yelusalemu, Ū SEEBA alīhaya gīkī, “Managi nalīgolanya būkenaagūji kūlwa nguno ying'we, nalī n'iganiko lya kwilwisa ning'we. Galūkagi, būlī ūmò wing'we shiigelile īnge ū mu nzīla jakwe ī jabūbi; galūchagi ī shīmīle nī shītwa shing'we.”

¹² Alīyo a boi bakūshosha gīkī, “Ūlījimīīja makanza, a bise tūkūja nayo dūhū īyo twamalile kwīhela; būlī ūmò wise akwīta kūlondeela būgang'hanazu wa ng'holò yakwe yabūbi.”

¹³ Hūna lūūlū, ū SEEBA alīhaya gīkī, “Būūgīlījagi hose pyī ū mu mahanga, nani ūyo wabīta kwigwa mhayo gūlī gīkī? Ū munhya ū Isilaeli wītile mhayo gwa malofu no.

¹⁴ Ī gīsī, ī ngūlū ja Lebanoni jikamalaga ī seluji ū mu mawe gajo? A minzī ga seluji gakakamaga gakamile ū mu ngūlū, ī njonga joya kūsela minzī manedeku?

¹⁵ Alīyo a banhū bane baanība ū nene, bakūgazuukījaga būbbani mashiikolile gatī na ngofyoolo, ayo gakabenhelejaga kwipama ū mu nzīla jabo, ī nzīla ījo jadūlīka kale ya kale. Balī mu nzīla ja kūtagaalīja mu masaka; gatī makūūwa mataale.

¹⁶ Ī sī yabo īkūbiza dalali ībipe no, līkūbiza ipandī lya kūdalahwa ilalī, pye a banhū bakūyūbīta moi baajinjimala kūnū bakūshingishaga mitwe.

¹⁷ Nakūbiza gītī nyaga gwa kīya, nakūbasambaaja babapeele a banishi babo. Ū mu lūshikū lwa mayanga gabo, nakūbinhīla ngongo.”

¹⁸ Hūna biwīla, “Bīng'we nzūgi tūlomane ī ya kūng'wītīla ū Yelemia; nguno tūtūzunya ū kūjimīīja a kalangīle ka shilagīlo ūmo bakūtūlangīlaga a bagabīji, nūūlū īyo tūkūganikīlagwa na banhū ba masala; pyī nūūlū īyo īkūhayiagwa na ng'hangi. Tūntūlagi bo mihayo ya ndīmi jise, yaya ū kwikala twagadelekaga a mamihayo gakwe.”

¹⁹ Ee SEEBA nidegelekage, yiigwage nī yīyo bakwīhayaga a babūūji bane.

²⁰ Ū wiza būyūlīpīlwa yabubi? Baanisīmbīlile ichongo, bakūbūkoobaga ū būpanga bone. Izūkagwa gīkī naalī nīmīīlile kū būtongi wako nakūlūngalūngaga yawiza kulwa nguno yabo. Ī ng'hūmbū jane jalī kūbūgalūcha ū būpelanu wako būbīngīle a boi.

²¹ Ī gete a baana babo baponyage mu makoye ga nzala. Balekanījage bamalwe līlūshū; a bake babo bachīlwe baana na bagoshi babo, a bagosha bashile kūcha, a baana babo a basūmba bashilīle mu būlūgū.

²² Batūmīlage ibità lya banishi mu kwifumbūkīja, ī kaya jabo jizulung'hanye ng'hūngū; nguno baanisīmbīlile ichongo gīkī nagwīle moi, būbisa na mitego ya kūgwasha mhambala jane.

²³ Alīyo Ee SEEBA, ū bebe ūbūmanile pyī ū būlomani wabo ū wa kūkooba kūnibūlaga. Ūtizūbalekeja ū būbī wabo, yaya ū kūshijimya ī shibi shabo ū mu butongi wa miso gako. Ni bagwage ūbiloleelile; ū ng'wikanza lya būpelanu wako bīītīlage īyo ībigeleelilwe.