Yelemia 17 - Bibilia Ilagano Lya Kale 2015

¹ Ī shibi sha banhū ba Yuda shandīkilwe bo kalamu ya chūma, sholilwe na lyoolelo lya mawe madaamu a ha ng'holò jabo, na a ha mapembe ga myalīlo yabo.

² Na a baana babo bataalī bīyizūkwa Ī myalīlo yabo nī ng'hīngī ja ng'wa Ashela, Ījo jisīmbīlile bbihī na mitī mifulumu, na kwigūlya ya ngūlū.

³ Bebe lūgūlū lwa sī yane nī sabo jako nū wibīkīja wako pyī ū bose, na a mapandī gako ga higūlya, shose shenīshi nakūshifunya shijanwe kūlwa nguno ya shibi īsho shisambaalile hose pye ū mu sī yako.

⁴ Ū wingīji ūbo naakwinha ūkūbūjimīīja kūlwa nguno ya būhūbi wako. Nakūkwīta ūbize nsese kū banishi bako mu sī īyo ūtīmanile. Nguno ū būpelanu wane wawenhelegije kūpembeka, na ng'hana būkūbaka ilalī.

⁵ Ū SEEBA alīhaya gīkī, “Azumilwe ū wa kūtūūla kwisagīlwa kwakwe halī munhū ūngī, ūyo asendamīlile nguzu ja banhū, alīyo ī ng'holò yakwe īlīkūle nū SEEBA.

⁶ Akūbiza gītī mpumbula ndoto ng'witogolo ikalamuku, ū wiza nūūlū būlīng'wizīīla atūbūbona, ū wikalo bokwe būkūbiza mu sī ya matogolo makalamuku; sī ya munhu, ūmo batazengaga banhū.

⁷ Alīyo alī na ū munhū ūyo ang'wisagīlilwe SEEBA; ūyo kūsanya kwakwe kūlī mulī we.

⁸ Nguno akūbiza gītī ntī gūhambilwe hihī na minzī, ūyo miji yago yikilimbīgije mu mongo. Ū goi gūtogohaga nūūlū shingīla chū shisebu, na a madūūtū gago gakikalaga manīlīzu gwa. Nūūlū ng'wikanza lya būūmà gūtazwanganaga, nū kūtwaja gūtalekaga.

⁹ Ī ng'holò ya munhū nemba lembi no kūtinda shose na shose, hangī īlī na būsaatu būtī wa kūpīla. Nani adūgije kwīyitegeleja?

¹⁰ Nene SEEBA, hū nakagīsīlījaga ng'holò ja banhū, na a maganiko nakagagemaga, būlī munhū nangabīle mheela gīt'ūmo īlī shīmīzīle yakwe, kūlenganīla na shītīle shakwe.

¹¹ Ū munhū wa kūpandīka sabo mu būnyeecha, atikīlile na noni ya kūbandīla magī ītagateelile yoi. Jikūnsambaala ataalī ha gatī ya būlamu bokwe, ū kūng'halīlo akūbiza būbbūūlī.

¹² Ī lipandī lise lyeela h'ī lisumbī lya būtemi ly'ikūjo na līgūngūhiwe kūfuma wandījo.

¹³ Ee SEEBA, ū kūlī Isilaeli ūlī kwisagīlwa, bose abo bakūūlema bakūgooka; abo bakūgalūka būkūleka ū bebe, a mina gabo gakwandīkwa hasī mu maseni; kūlwa nguno ya kūneka ū SEEBA, ūyo alī lūzwīlo lwa minzī mapanga.

¹⁴ Ee SEEBA, nilagūlage nakūbiza mpanga, nigunage nakūpīla, nguno ū bebe hū nakakūkumīlījaga.”

¹⁵ Alīyo bakwikalaga būniwīla, “Gūlī he ū mhayo go ng'wa SEEBA? Ali ka ni gwizage shi lūūlū!”

¹⁶ Ū nene nataalī kūgūpeela ū nīmo gwa būdīīmi ūyo waninha; hangī ūmanile gīkī nataalī kwikūmvwa kūbiza mu lūshikū lwa mayanga. Īyo nakīlūngalūngaga na nomo gwane Īlī hape ū kūlī bebe.

¹⁷ Ūtizūbiza wa kūnogohya ū nene, nguno ū bebe ūl'ibūngīlo lyane mu lūshikū lwa mayanga.

¹⁸ Ni bagookage abo bakūniluhyaga, alīyo ū nene nilang'hanage natizūgwa mu magooke. Ni baminyiagwe lyogohya, alīyo ū nene nilang'hanage natizūminyiwa boobà. Benhelage lūshikū lwa būkenaagūji, ūbakenaagūle mu ng'henaagūla nhaale.

Ī sabato shiigelile īkūjiwe

¹⁹ Ū SEEBA akaniwīla, “Jaga ūkīmīīle a ha mità gwa kūbītīla banhū, aho batemi ba Yuda bakabītīlaga ūlū balingīla na kūfumīla, na a ha mibità ī yīngī ī ya Yelusalemu.

²⁰ Ūbawile gīkī, Gwigwagi ū mhayo go ng'wa SEEBA bīng'we batemi ba Yuda, na banhū bose pye ba mu Yuda, na a bazengi ba Yelusalemu pye abo mukabītīlaga a ha mibità īyī.

²¹ Ū SEEBA alīhaya gīkī, Ilang'hanagi, yaya kūbūūcha nigo gose gose mu lūshikū lwa sabato; yaya nūūlū kūgūbītya a ha mibità kwingīla nago mu nzengo gwa Yelusalemu.

²² Yaya nū kūfunya nigo mu numba jing'we, nūūlū kūtūmama nīmo gose gose mu lūshikū lwa sabato. Alīyo lūlang'hanagi ū lūshikū lwa sabato lwikale lwela, gīt'ūmo nakabalagīīlīla bakūlūgenji bing'we.

²³ Gwike batadegelekile nūūlū kūdīlīla batadīlīlile; baalī na mitwe midaamu no, batadegelekile nūūlū batawanukūlile ū būhūgūji.

²⁴ Alīyo ū SEEBA alīhaya gīkī, ūlū ng'ūbiza belwa ng'holò ū kūniigwa, ng'ūlūlang'hana ū lūshikū lwa sabato lwikale lwela, ng'ūleka kūbītya nigo gose gose a ha mibità ya nzengo gwenūyū ū mu lūshikū lwa sabato, ng'ūleka nūūlū kūtūmama nīmo gose gose ū mu lūshikū lwenūlū,

²⁵ ū mu gīko a batemi abo bakigashaga h'isumbī lya būtemi lya ng'wa Daūdi bakwingīla kūbītīla a ha mibità ya nzengo gwenūyū, balī hamò na a bataale ba būsugi wabo. A boi na a basugi ba ha sīlīlī yabo bakwingīla balī mu magogoteni ga būlūgū, na badamhīlile falasa. Na a banhū ba Yuda na a bikaji ba mu Yelusalemu bakūbiza hamò nabo; hūna ū nzengo gwenūyo gūkūbiza na banhū shikū jose ilalī.

²⁶ Banhū bakwiza kūfuma mu mizengo ya Yuda, nū mu magūngūli ga hihī hihī na Yelusalemu, bangī bakūfuma na kū sī ya Benjamini; na kū mbūga ja ng'weli, na kū sī ja magūlya, na Negevu. Pye a benaba bakwenha shakwinha ū mu numba ya ng'wa SEEBA; bakwiza na shitambò sha kūpemvwa, na shitambò, na shitambò sha būsu na būbbani; hamò na shakwinha sha kūlūmba.

²⁷ Alīyo ūlū mutūniigwa ū mu mhayo gwa kūlweja ū lūshikū lwa sabato, gīkī ū mu lūshikū lwa sabato mutizūbīta a ha mibità ya Yelusalemu mubūkije miligo, ū nene nakūbacha moto gūtī na būjimīje a ha mibità yenīyo, gūjinogoteje pyī ī numba j'ikūlū ū mu Yelusalemu.”