Yelemia 15 - Bibilia Ilagano Lya Kale 2015

¹ Hūna ū SEEBA ūniwīla, “Nūūlū ba Musa na Sang'weli bīmīīla ū kū būtongi bone, ī ng'holò yane ītīko kūbagalūkīla a banhū benaba. Bīnjage gete ū kū būtongi bone; ni bīngage a henaha!

² Ūlū būkūbūūja, ‘Tūje halī?’ Bawīlage; Ū SEEBA alīhaya gīkī, ‘Abo babalīlilwe kūcha, bakache; abo babalīlilwe līlūshū, kū līlūshū; abo babalīlilwe kūnanuka, bananuke; abo babalīlilwe būding'wa, baje kū būding'wa.’”

³ Nakūbatūmīla būkenaagūji bo mbika inè, alīhaya SEEBA; līlūshū lya kūbabūlaga, mawa ga kūbasaasagūla, na manoni ga kūlala na mashiinū ga mu mapoolu, gabalye na kūbakenaagūla.

⁴ Nakūbīīta babize na saalaala ū kū mabūtemi ga mu sī pye a gose, kūlwa nguno ya būbi bo ng'wa Manase, ng'witūnja o ng'wa Hezekia, ū ntemi wa Yuda, ūbo owīta ū mu Yelusalemu.

⁵ Ee Yelusalemu, nani akūkūchīla shigongo? Nani akūkūlīla ū bebe? Nani akwīma agīsīlīje mhola jako?

⁶ Ū bebe wanilema ū nene, alīhaya SEEBA, “Ūkwikalaga ūkolobela kūshoka numa dūhū. Alilūūlū, nakūkūgoloolela nkono nakūkenaagūle, natikala nūkūchīla shigongo biya.

⁷ Nakūbasūngūla mu lūhūngo ha mibita ya mu sī yabo. A banhū bane nakūbenhela mhayo gwa kūshilīlwa batogwa babo na būkenaagūji. Nguno balemile ū kūgalūcha ī ng'hūngwa jabo.

⁸ A bakīma babo a bachilwa nakūbakwīja no kūtinda maseni ga ha ng'walo gwa nyanza. A bakīma nakūbenhela bayagaja bayūbayagaja a bitūnja babo līīmi nyange. Nakūbenhela mayanga na lyogohya, shibisanganīje batamanile.

⁹ Ū nkīma ūyo abyalile baana mpungatī akūgwa mhūngīli atīne ng'holò; ū kūlī wei ī līīmi līkūgwa alīyo būtaalī ū kwila, akūgishiwa minala na kūgooka. Abo balasaagīīle nakūbamala bo līlūshū mu butongi wa banishi babo,” alīhaya SEEBA.

¹⁰ Ee mayū, hīmba būlī ūkanibyala! Nguno pyī ī sī īkwilwishaga nū nene, nilemeelilwe nayo. Ū nene natī n'igasa kūlī munhū, nūūlū atīho ūyo alī n'igasa kūlī nene; alīyo būlī ng'wene akūnizumaga.

¹¹ Ū SEEBA ūhaya, “Nakūkūpīja nalī na nguno soga; a banishi bako nakūbīīta bakwikūmbīlīje ū mu makanza ga mayanga na būluhi wabo.

¹² Alīho munhū wa kūdūla kūbīnza chuma, ī chūma sha kūfuma sukuma, nūūlū ī shaba?

¹³ Ī sabo jako nū wibīkīja wako nakūshifunya shisolwe, shikūjanwa dalali; ū kūlwa nguno ya shibi shako shose ū mu sī yako yose pye.

¹⁴ Nakūkūtūūla kū banishi bako, ūbize nsese mu sī īyo ūtīmanile; nguno ū būpelanu wane būkūbacha moto gwa kūkūbbiisha ū bebe.”

¹⁵ Ee SEEBA, ū bebe ūdeebile gete, nizūkagwe ūnigune. Nimalīlage shiilī ū kū baluhya bane. Ūtizūniyagaja nguno ū bebe ūlī ng'wiyūmīlīja; managa gīkī nakwikalaga nūdūkwa kūlwa nguno yako.

¹⁶ Ee SEEBA, Mulungu wa mabità, Ī mihayo yako īkaniizīīla nīlya, yūbiza būyegi wane, yūtogwa ī ng'holò yane; nguno nakwitanagwa mu lina lyako.

¹⁷ Nataalī kwigasha ng'wigelè lya banhū bakwiyejaga, nūūlū nataalī kūsangīla mu būyegi wabo. Nakikalaga iyene, nguno ū nkono gwako gūlī halī nene; ū bebe wanokaja būpelanu.

¹⁸ Nibūlī ū kūsaatwa kwane kūtūkalīkaga? Nibūlī ī lilonda lyane lī mholela kū limu līlemile ū kūpīla? Ū bebe ūkūbiza gītī mongo gūtī na minzī ū kūlī nene, gītī lūzwīlo lwakalamukile lūmala minzī?

¹⁹ Alilūūlū, ū SEEBA alīhaya, “Ūlū ūgalūka na kwandya kūnitūmamīla, nakūkūshosha ūmo walī na kale; ūlū wandya kūlūngalūnga mihayo Ītūngīlīgije, ītī ya nyahūnga, ūkūbiza Nomeeji wa mihayo yane. A banhū benaba ni bakūshokelage ū bebe, alīyo ū bebe yaya ū kūshoka kū boi.

²⁰ Nakūkwīta ūbize ndugu ya shaba; bakwilwisha nang'ho, alīyo batūdūla ū kūkūheeba, nguno ū nene nalī hamò nang'ho, kūkūpīja na kūkūkomoola,” alīhaya SEEBA.

²¹ Nakūkūpīja ū mu makono ga bakenaagūji, na nakūkūkomoola wīnge ū mu nkono gwa ng'wiboneeji.