Yelemia 14 - Bibilia Ilagano Lya Kale 2015

Būūmà, nzala na būlūgū

¹ Ū mhayo ūyū go ng'wa SEEBA, gūkang'wizīīla Yelemia kūlwa būūmà nguno ya sī kūgayiwa mbula,

² “Ī Yuda īlī mu būpīna, Ī mizengo yamo yazwanganile, a banhū bakwīlīlīīlaga ī sī; Ī ng'hūngū ya mu Yelusalemu īkwigwiagwa kūle.

³ A bataale bakūbatūmaga kū minzī a batūmami babo, alīyo ūlū bashika ū kū nzwinzī gatīmo a minzī. Ī shiseme bakūshokaga nasho shilī dalali, bigumīīlaga myenda kū mitwe, bachaaga minala na kūgwa ng'holò.

⁴ Ī sī yatandagūkile milala nguno ī mbula ītūtūlaga; a balīmi babizilikala bigumīīlaga myenda kū mitwe bachaaga minala.

⁵ Nī sūbūya ja kū matogolo jilīyūbabyala a baana jabaleka kūlwa kūgaya maswa.

⁶ Ī ndūūlū jikwīmīīlaga mu magūlya makalamuku jikūseesemaga gītī nyamhaawa. A miso gajo gaabbopomile kūlwa kūgayiwa maswa.”

⁷ Ee SEEBA, nūūlū īkī ū būbi wise būkūtūkaanilaga, alīyo nahene ītaga mhayo kūlwa nguno ya lina lyako. Nguno ng'hana ī chene ū būgomi wise wingī no; twakwītīla shibi ū bebe.

⁸ Ū bebe hū ūlī Kwisagīlwa kwa ng'wa Isilaeli, ūlī Mpīja wakwe mu makanza ga mayanga. Hama nibūlī wabizile gītī ūlī ngeni ū mu sī īyī, gītī mīti wa kūlaalīja būjikū būmò dūhū, ntondo ajile?

⁹ Nibūlī ūlībiza gītī munhū wa kwisanganījiwa mhayo nebe, nūūlū gītī nshilikale atī na būdūla wa kūgunanha? Ū bebe SEEBA ūlī hamò nise, nīyo tūkitanīlagwa mu lina lyako; yaya ū kūtūlekanīja.

¹⁰ Ū SEEBA alībahaya a banhū aba gīkī, “Baamanīīla no ū kūtagaalīja, balemeelilwe ū kūgalang'hana a magūlū gabo. Alilūūlū, ū SEEBA atūbanukūla; ī haha akūwizūkwa ū būbi wabo, akūbinha nsango kūlwa shibi shabo.”

¹¹ Ū SEEBA ūniwīla, “Ūtabalombelage ī yawiza a banhū benaba!

¹² Nūūlū bafunge natūkwigwa ū kūlīla kwabo, nūūlū bafunye shitambò sha kūpemvwa na shitambò sha būsu, natūshanukūla. Alīyo nakūbamala bo līlūshū (būlūgū), na nzala, na mahūūya.”

¹³ Nane nūhaya, “Ee Seeba MULUNGU, a bahangi bakwikalaga būbawīla gīkī, ‘Ū būlūgū būtīho, pyī nī nzala mutībona. Ū nene nakūng'winha mhola ya kūshinga ho ū ng'wipandī lyenīlī.’”

¹⁴ A henaho ū SEEBA ūniwīla, “A bahangī bakūhangaga mihayo ya būlomolomo mu lina lyane. Ū nene natīnabatūma, nūūlū kūbasola kūlwa nīmo gwenūyo nataalī; pyī nūūlū kūlūngalūnga nabo dūhū yaya. Bakūmuhangīlaga ya koolekegeje ka mihayo ītīho, būmanīja ūbo būtī na gwa kūpya, na ya mu maganiko gabo ga kūlembagūla banhū.

¹⁵ Hūna lūūlū, ū SEEBA alīhaya gīkī, A bahangi abo bakūhangaga mu lina lyane, natabatūmile ū nene; nūūlū īkī bakūhayaga, ‘Ū būlūgū nī nzala shitiza ū musī yenīyī.’ Ali lūūlū, a bahangi benabo bakūyagaala kūlwa būlūgū na nzala.

¹⁶ Hama na a banhū abo bakūbahangīlaga, nabo bakūponyiwa hanze, mu ū mapanda ga Yelusalemu; nguno bakūshila kūcha kūlwa būlūgū na nzala. Atilonga wa kūbajīka, a boi benekīlī na a bake babo, na a bitūnja babo, na a bashīke babo. Nguno nakūbitīīla a mayanga ayo gabigeleelilwe kūlwa būkenaagūji wabo.”

¹⁷ Bawīlage gūūyū mhayo; gīkī, “A miso gane ni gahūūmage shisoji shitī sha kūshila, līmī na būjikū; nguno ū nshīke wane (a banhū bane), watūlilwe igulaagīje itaale, nīyo lūguma lūbi no.

¹⁸ Ūlū naaja ū kū mabbaala balīko abo bakūbūlagagwa būlūgū; ūlū ningīla ū mu nzengo nakūbonaga ng'henaagūlīle ya nzala. A bahangi na a bagabīji a bose bakūlūbalūbaga mu sī ītī yabo na batīmanile.

¹⁹ Ū bebe wīlemile hamo shi Ī Yuda? Ī ng'holò yako yīkolilwe ī Sayuni? Nibūlī watūtūlile ha bbahu gīko, nose tutīko nūūlū kūpīla hangī? Twalisagīlagwa mhola, alīyo shitaalī kwigela shawiza shose shose; n'ikanza lya kūpīla, alīyo līlīho idetemya lyabūbi.

²⁰ Ee SEEBA, tūlibūūla ū būbi wise nū būkenaagūji wa bataale bise, nguno twakwītīla shibi bebe.

²¹ Kūlwa nguno ya lina lyako, tūlīlomba ūtizūtūkolwa; yaya ū kūlīkenaagūla ī likūjo ly'isumbī lyako lya būtemi; ī lilagane lyako īlo watwinha lizūkagwe ūtizūlīponya.

²² Ū mu bamulungu ba kūgīmba, a ba mahanga, alīho ose ose ūyo adūgije kwenha mbula? Nūūlū ī ligūlū līdūgije kūsūlūlūcha iswalala lyoi lyenekīlī dūhū? Ītī gīko, alīyo bebe Ee, SEEBA Mulungu wise. H'ī chene ū kwisagīlwa kwise kūlī halī bebe, nguno ū bebe ūlī ng'wīti wayo pyī ī yose yenīyī.”