Yelemia 13 - Bibilia Ilagano Lya Kale 2015

Nshipi gwa kitaani

¹ Hūna ū SEEBA ūnīwīla, “Jaga ūkagūle nshipi gwa kitaani, ūgwitunge mu nkīmbīlī gwako; gwike ūtizūgūlobya na minzī.”

² Ng'hana nūkagūla ū nshipi gīt'ūmo akanilagīīlīla ū SEEBA, hūna nūgwitunga mu nkīmbīlī gwane.

³ Ū mhayo go ng'wa SEEBA gūnizīīla hangī lūkangala lwa kabīlī; gūhaya,

⁴ “Gūsolage ū nshipi ūyo wagūlile, ūyo ūgwitungile mu nkīmbīlī gwako, jaga nago kū mongo go Fulati ūkagūbise kwenūko ng'wihalo lya shiganga.”

⁵ Nūja ng'hana nūkagūbisa ū nshipi gwenūyo mu ng'hilimvwa ya mongo go Fulati, gīt'ūmo akaniwīlīla ū SEEBA.

⁶ Jūbīta shikū ningī; hūna ū SEEBA ūniwīla, “Būkaga ūje ū kū mongo go Fulati, ūkagūsole ū nshipi ūyo nakakūlagīla ūkagūbise kwenūko.”

⁷ Nūja ū kū mongo go Fulati, nūkafukūūla ū nshipi aho naalī naagūbisa, nugūsola. Alīyo nūbona gīkī ū nshipi gwenūyo gwalī gwabipa no, gūtigeleelilwe kū nīmo gose gose.

⁸ Hūna ū mhayo go ng'wa SEEBA gūnizīīla gūniwīla,

⁹ “Ū SEEBA alīhaya gīkī, ‘H'ūmo nakūbūkenaagūlīla nū wikumīlīja wa banhū ba Yuda, nū wikumīlīja būtaale ū bo nzengo gwa Yelusalemu.

¹⁰ A banhū benaba nabo bakūbiza git'ūmo gūlī ū nshipi gwenūyū, ūyo gūtigeleelilwe kū nīmo gose gose nguno babūbi no. Balemile ū kwigwa ī mihayo yane, bakashimīzaga mu kūlondeela būgang'hanazu wa ng'holò jabo; kūnū būbalondeela bamulungu bangī kūbatūmamīlaga na kūbalamya.

¹¹ Nguno ūmo nshipi gūlī na nīmo kūlī munhū kwitunga mu nkimbīlī gwakwe, nū nene h'ūmo naalī nabatungīlile halī nene pye a banhū ba numba ya Isilaeli na a ba numba ya Yuda, alīhaya SEEBA, ‘gīkī babize banhū bane, kūlwa lina lyane, na kūnikūja nene, na kūlw'ikūjo lyane; alīyo būlema ū kūniigwa.’”

Mabīkīlo ga divai

¹² “Alilūūlū bawīlage ū mhayo ūyū, ‘Ū SEEBA, ū Mulungu wa Isilaeli alīhaya gīkī, Būl'ibīkīlo lya divai līkookajiwa divai.’ Nabo bakūkūshokeja balīhaya, ‘Ūliganika a bise tūtamanile gīkī būl'ibīkīlo lya divai shiigelile lyokajiwe divai?’

¹³ Nang'ho ūkūbashokeja, ‘Ū SEEBA alīhaya gīkī, A bikaji ba mu sī yenīyī nakūbang'wisha shikoji shibakole pye a bose; na a batemi abo balī h'isumbī lya būtemi lya ng'wa Daūdi, na a bagabīji, na a bahangi, na a bazengi ba mu Yelusalemu bose pye.

¹⁴ Nakūyūbatūlanya būlī munhū na ng'wiye; na a babyaji kū baana bano, alīhaya SEEBA. Natizunīlīja nago ū gwa kūbachīla shigongo, yaya nūūlū kūbasaatwa, nūūlū kūbalekeja gīkī naleke kūbayagaja.’”

Kūlīho kūtwalwa mu būding'wa

¹⁵ Igwagi na mudīlīle; lekanagi ū wikumīlīja, nguno ū SEEBA wamalile kūhaya.

¹⁶ Ū SEEBA Mulungu wing'we ng'winhagi ikūjo, kūko ataalī kwenha giiti; a magūlū ging'we gataalī kwipama mu ngūlū ja giiti. Aho ataalī kūlīgalūcha ī lisana īlo mukūlisagīlagwa lībize giiti sha gamha, na kūlyīta kūbiza nengeeji gwa lūfu.

¹⁷ Alīyo ūlū mutiigwa, nakūlīla ū mu gatī ya ng'holò yane kūlwa wikumīlīja wing'we; a miso gane gakūlīla mu kūsaatwa kūtaale gahūūme shisoji, nguno ī lidaale lya ng'wa SEEBA līkūtwalwa mu būding'wa.

¹⁸ Ū ntemi nū nina, ū ngole, ng'wīlagi gīkī, “Ikagi a ha masumbī ging'we ga būtemi; nguno ī ngikili jing'we j'ikūjo jikūgwa hasī kūfuma ū kū mitwe ying'we.”

¹⁹ Ī mizengo ya Negebu īkūlugalwa, na atigela wa kwīlugūla hangī. Ī Yuda īkūsaamiwa pyī ī yose; bose pye bakūtwalwa mu būding'wa.

²⁰ Būūchaga a miso gako ūbalole abo baliza kūfuma sukuma. Līlī halī ī lidaale lyako īlo winhwa? Ī ng'holo jako ī niiza niiza?

²¹ Ūkūhaya ginehe ūlū bīītwa kūbiza bataale bako abo waalī wisolela ūbagīmba gīkī banwani biyo? Ūtūgelela kūzwangana na kūlīla dūhū gītī nkīma akūlījiagwa būlūgū ng'wikanza lya kūbyala?

²² Ūlū wibūūja ū mu ng'holò yako gīkī, “Ū mhayo gwenūyū gwanilongelile kūlwa nguno kī ū nene?” Īlī kūlwa wingī bo shibi shako, h'ī chene wakunūjiwe ī shizwalo shako, nū mīlī gwako gwibengelejiwe.

²³ Ū munhū ng'wilabūzu adūgije kwigalūcha ī likoba lyakwe, nūūlū ī sūbī a mabbado gayo? H'ūmo īlī na a bing'we abo mumanīīlile kwīta yabūbi, mutūdūla kwīta yawiza.

²⁴ “Nakūmusambaaja gītī meela gakūheheejiagwa nyaga gwa kūfuma kwitogolo ikalamuku.

²⁵ Ū gwenūyū hū ngabo gwako, h'ī ngele īyo naakūhelelile,” alīhaya SEEBA; kūlwa nguno wanīība, ūyūsanya bamulungu ba kwigīmbīja.

²⁶ Alilūūlū, nakūkūkunūja ī shizalo shako shize kū būshū wako; ī minala yako īkūbiza hape,

²⁷ nū būshihani wako būkwitenda, nū lwahahi lwako ūlo lūkakwītaga wikale ūkūlījiagwa wīmīlīzu, pyī nū būmalahya wako ūbo ūkūwītaga ndūhū na kūcha soni! Nī mihayo yako y'ipelanya nībonile ū mu ngūlū nū kū matogolo. Ee Yelusalemu, ūlī mu kwihīga! Ūkwikala ūlī nsoso kūshisha nanalī?