Yelemia 12 - Bibilia Ilagano Lya Kale 2015

Kwiyanda kwa ng'wa Yelemia

¹ Ee SEEBA, ū bebe ūlī ntūngīlīja būlī gwa ūlū naakūdaayīīla. Gwike leka nakūbūūje ī mihayo ya kalamulīle kako. Nibūlī a babūbi bakīlūkīlagwa ū mu nzīla jabo? Nibūlī pye a biboneeji bakikalaga balī mu mhola dūhū?

² Bebe h'ūyo wabahamba būkoma miji, būfuluma na kūyūtwaja matwajo. Ū mu kalūngalūngīle kabo ūlīmo pa, lelo ū mu ng'holò jabo balī kūle no nang'ho.

³ Alīyo ū bebe SEEBA ūnimanile ū nene; ūkanibonaga gwa, na a maganiko gane ū kūlī bebe ūgadeebile ūmo galī. Bagwesaage gītī ng'holo jilītwalwa kūsīnzwa; basolanhyage ūbatūūle heeke kūlw'ikanza lya kūsīnzwa.

⁴ Ī sī īkūlīla kūshisha nanalī. na a matogolo gakūgaya maswa kūshisha nanalī? Ī ndimu nī noni jashilile pye kūlwa būbi bo nhūngwa ja bikaji baamo. Nīyo balīyiwīla na gīkī, “Atūdūla ū kwībona īyo Īlatwilongele ū kū ngelelo yise.”

Ishosho lya ng'wa Mulungu

⁵ Ūlū ūseedeechiwa mhayo gwa kwishiga nhambo na banhū, ūkūdūla ginehe ū kwishiga na falasa? Ūlū wipama ūlī mu sī īlenganīlile, al'ū mu masaka ga Yolodani ūkwīta ginehe?

⁶ Abo baakwijombokile ū bebe, badūgūyo gete, baana ba ng'wing'we; bakūlīlaga kūlwa nguno yako. Yaya ū kūbasanya nūūlū babize balīkūhaya chiza na ginehe.

⁷ “Ī numba yane nakwīyība, ū wingīji wane nakūbūlekanīja. Ū ntogwa wane nakūntūūla mu makono ga banishi bakwe.

⁸ A banhū ba wingīji bone baabizile gītī shimba īlī ng'wisaka ū kūlī nene; bakūnipogomelaga, hūna lūūlū naabakolilwe.

⁹ A banhū ba wingīji bone, ū kūlī nene bikīlīlile kī nī ging'hi, ī noni īyo noni jingī jikīdumīlaga? Jagi mukajikobye pyī ī shiinū ja mu bū mujenhe jize jilye.

¹⁰ Badīīmi bingī baagūkenaagūlile ū ngūnda gwane gwa mizabibu, baalītobangile no ī litongo lyane, Ī lilaale lyane baalīgalūkije lyūbiza itogolo lītī na solobo.

¹¹ Baalyītile kūbiza buyīkī, nose īkī līlī buyīkī līkūnilīlīīlaga. Pyī ī sī īlī dalali ī haha, alīyo atīho wa kūfung'wa ng'holò.

¹² Bakenaagūji biyitile pye a hose ū kū matogolo ga magūlya makalamuku; nguno ī līlūshū lya ng'wa SEEBA līkūjaga lyūbalya hose pye; kūfuma ipandī līmò lya sī kūshisha ipandī līngī. Ndūhū ūyo akwikala mhola.

¹³ Bakūbībaga ngano alīyo bagesa ming'hwa, bakūnogaga kūtūmama milīmo, alīyo ndūhū ī sha kwīnja. A magesa gabo gakūbaponda soni kūlwa nguno ū būpelanu bo ng'wa SEEBA būlī būtaale no.”

¹⁴ Ū SEEBA alīhaya, “Pye a bazenganwa bichane a babūbi, abo bakūdaatyaga wingīji bone ūbo naabinha banhū bane a Baisilaeli, nakūbadubbūla nabīnje ū mu sī jabo; nī numba ya Yuda nakwīdubbūla yīnge ū mubo.

¹⁵ Gwike ūlū nūmala ū kūbadubbūla, a hanuma yaho nakūbachīla shigongo; būlī ng'wene nanshoshe hangī mu wingīji bokwe, mu sī ya ng'wawe.

¹⁶ Nīyo ūlū būjiilanga mu būkalalwa ī nzīla ja banhū bane, nū kwilahīla būyilahīla mu lina lyane, gīkī, ‘Ūmo SEEBA alī mpanga,’ gīt'ūmo baalī babalangīla a banhū bane kwilahīla mu lina lya ng'wa Baalī, a henaho nabo bakūzengwa babize hamò na a banhū bane.

¹⁷ Alīyo ūlū ihanga lyose lyose lyūlema ū kwigwa, nakūlīdubbūla nalyīnje nalīkenaagūle gete.” Alīhaya SEEBA.