Yelemia 10 - Bibilia Ilagano Lya Kale 2015

Mulungu na shiikolile sha kūlamiwa

¹ Bing'we numba ya Isilaeli, gwigwagi ū mhayo ūyo alīmuwīla ū SEEBA.

² Ū SEEBA alīhaya gīkī, “Yaya ū kūjiilanga ī nzīla ja banhū ba mahanga, yaya nū kūdetemiwa shose shose Īsho shilonga kūfuma kwigūlū, īsho būshogoha banhū ba mahanga.

³ Nguno ī nhūngwa ja banhū benaba jitī na gwa kūmugunanha; bakabbutaga līntī lya ng'wipolu, koolī walībeegeleja mu būgaliili na mbīzo yakwe shabiza shikolo.

⁴ Hanuma bashibeegejaga būlenji bo feza na zahabu, hūna bashikoma na mizumali kūshidaamya gīkī shitizūnegena.

⁵ Ī shiikolile shabo shibange gītī makango mu shisasīla sha makūbī ga limbe; shitadūgije kūlūngalūnga, hama sha kūyūbūūchiwa, nguno shitashimīzaga. A bīng'we yaya ū kūshogoha, nguno shitīko kwenha makoye, nūūlū shitī na būdūla wa kwīta mhayo gwawiza.”

⁶ Ee SEEBA, ū bebe ūlī ntaale, atīho wa kūbiza gītī bebe, nī lina lyako līlī na būdūla būtaale,

⁷ Ee Ntemi wa mahanga, nani ūyo akūkīja kūkogoha ū bebe? Ū mhayo gwenūyo gūkwigeleelilwe. Nguno ū mu ba masala bose abo bal'ū mu mahanga, pye na a mabūtemi gabo a gose, atīho ū wa kūbiza gītī bebe.

⁸ Bose bachilūchilū na babbūūlī, pyī ūmo bagelelile; īyo bakilangaga kūfuma kū shiikolile sha kūpūnza Ītī na fiilū.

⁹ Ī feza ījo jikabeejiagwa shiikolile sha kūsula jikafumaga Talishishi, Ī zahabu najo Ufazi. Bakoolī ba kūbeeja shiikolile, na basuji ba zahabu bakabeejaga baamala ū nīmo gwabo, hūna ī shiikolile shazwīkwa myenda ya langi ya būlulu na ya nzulunge; nayo ya kūbejiwa na bakoolī.

¹⁰ Alīyo ū SEEBA hū ng'wene ū Mulungu wa ng'hana, ū wei alī Mulungu mpanga, na Ntemi wa welelo na welelo. Ūlū ūsaaya īkadetemaga ī sī, a mahanga gatīko kūwīmīla ū būpelanu bokwe.

¹¹ “Alilūūlū bawīlage gīkī, ‘A bamulungu abo batalīsūmbile ī ligūlū nī sī, bakūyagaala bashile ū mu sī, batūbiza ho a ha sīlīlī y'igūlū.’”

¹² Alīyo ū Mulungu hū ng'wene wīsūmba ī sī na būdūla bokwe, nī shiseeng'wa ī shose ūshibeeja na masala gakwe we; nī ligulu walyamba wei mu witegeleja bokwe.

¹³ Ūlū ūpalalūka gakahilimaga a minzī ū kwigūlū, a malunde akagenhaga kūfuma kū būgelelo bo sī. Ī mbula akīyenhaga na ndabi jayo, nū nyaga akagwitanaga kūfuma mu mabīkīlo gakwe.

¹⁴ Pye a banhū batī na gwa kwīta, hangī batī na witegeleja; bulī nsuji wa zahabu akagookaga kūlwa shiikolile shakwe. Nguno ī shiikolile shakwe shitī na gwa ng'hana, ū mugatī yasho ndūhū ī myūyī.

¹⁵ Shitī na ngofyoolo nūūlū hado, Ī shoi shilī shikolo sha kūdalahwa; ūlū lyūshika ī likanza lya nsango gwasho shikūkenaagūlwa.

¹⁶ Ūyo alī Inong'ho lya ng'wa Yakobo atī gīt'ūmo galī a genayo, nguno ū wei hū Meeja wa shose; hū ng'wene wameeja nū Isilaeli, ūyo alī lūganda lwa wingīji bokwe; SEEBA wa mabità, h'īlina lyakwe.

Būkwiza būkenaagūji būtaale

¹⁷ Bing'we abo mulī mu sī īgobanīlilwe na banishi, bilingagi ī shikolo shing'we musaame.

¹⁸ Nguno ū SEEBA alīhaya gīkī, “Ī haha ū ng'wikanza lyenīlī nalībaponya a bikaji ba mu sī īyī; nakūbenhela būluhi būtaale, bading'we nding'wa.”

¹⁹ Nalī mu kwihīga kūtaale no kūlwa nguno y'igulagīje lyane! Ī lilonda lyane lītī lya kūpīla! Alīyo nakiwīla gīkī, “A genaya gene makoye gane, shiniigelile naganukūle mu kwiyūmīlīja.”

²⁰ Ī liheema lyane lyakenaagūlilwe, pyī ī ngoye jalyo jatīnagūlilwe; a baana bane nabo batīho, baanilekile; natī na wa kūnikomela Ī liheema lyane, nūūlū kūnibeegeja ī ng'hambī yane.

²¹ Nguno a badīīmi babbūūlī no, batagemaga kūbūūja kūlī SEEBA nūūlū hado; h'ī chene ī mihayo yabo ītabeelaga, nī lidaale lyabo ī haha līsalang'haile pyī ī lyose.

²² Degelekagi, nhūng'wa jiliza jilī mu nzīla, shiligityo shitaale shilīfuma kū sī ya sukuma; ī mizengo ya Yuda īkūkenaagūlwa Ībize misaka yike, īkūbiza būtūūgījo bo jidīvī.

Kūlomba kwa ng'wa Yelemia

²³ Ee SEEBA, namanile gīkī ū būpanga bo ng'wa munhū būtī bokwe wei ng'wenekīlī, ū munhū atī na būdūla bo kwitongeela wei ng'wenekīlī ū mu kashimīzīle kakwe.

²⁴ Ee SEEBA, nihūgūlage; gwike mu būlamuji bo wīīma, ītī mu būpelanu wako ūtizūnimala.

²⁵ A mahanga ayo gatatogilwe kūkwitegeleja, gasukīīlage būpelanu wako, a banhū abo batalitanaga lina lyako. Nguno bangabbulile ū Yakobo; bangabbulile būmmala gete, nū wikalo bokwe būbūkenaagūla.